¹ Nioro nimo Iesu omova'ati uubiito maniahoumoi mabu Iehova painaida gorogoro ii'aumo naanai nimoro eraara nai kaumo. ² Imova'ati meree e'idioida nio imamahoi voudui naa kaa'ui nio oroi'ioida tutuu hivioito imova'ati diodioi voudui naai imamahoi oukaumo. ³ Ii moo via nioro keehibuo hi'a naairi oohiai oukaumo, e uubiiro anoohiaidu. Mooro himia iree everai ova'atiito modobo biaka. ⁴ Moo uumoida mo memiho ata rautu biaka, inai aa'o naai ia'aaida mo orohahi'ai bia nooradueka. Inai via mo Iesu beharo oohiai ouka. ⁵ Nuurika hivio mabui oohiai tatahaida naa ata oohiai naavadei tauoha ooradue naa biaka, Iesu ou tatahaida. Nuuro du'omuida oopiova tidioumo naanai kopiha ivohuu'oi ouka hegeraito via uubii kaukaui goroida iraahoumo naanaire.Ka uubiiro Iehova ne'ei emaraahue vadeipii nuuado eidai oukaumo. ⁶ Kaida nianaamuo, doo'ou nio iraromoiri moiti Aporosi oroi'ioi pinooradue ka nio aa'o everai ma eremato mudioumo. ''I'atiumoi naai ohodiumo aute,'' mabu mereata nuhimia mia orovai bia ouka uubi aamiiai ma imehai. ⁷ Bo'uro vododiai tutia uubi aamiiai tuiaida nio ohu dohoobo ma e'idiou moiri- Na'uira nioro idai tatahai- Tauo ageidaimo, eeka na'u hobou oroviourioira, eidai tataha dohooboi. ⁸ Nio gaupa'ee tauo pii'iumo.. Nio naana hiiro uubi tauo pii'iumo.. Nio nimo ne'eida himia iimauboi tauo poova horoumo via auo dohoobo tauo pii'iumo, kaida nimo ainiraromo kaumo nio rautu paai kopiha mane'idiou moiri. ⁹ Mo uumooka Iehovaro nimo kori hi'aida tauo pinideea nu vadei manovadueumo via uubii idomai gaboida manoroihiu moiri tauo pinorotutuaimo. Nimo hepu geemai ohuida naanai koriha ova'atii noukaumo, aneruioi doire via uubii doire. ¹⁰ Nimo Iesuri naanai ova'ati beha ova'atii noukaumo, ii nio nuuido miahaka. Nimo pupuo bia neremahibidio kaumo, ii nio pupuo iveremahi bidiodu. ¹¹ Doo'ou hi'a taimuida nimo duura oborai nioi nai kaumo via miahi'a tama naana rautu biaka. Memiho hi'a everaito inimodobuadu via nimo e'idio hi'a ne'e rautu biaka. ¹² Nimo himia tuuito pupuohi'a nova'ati kaumo. Nimo overa vade imioumo uubii ainivaabai kaumo. Temeteme hi'a everaito imodobuau moiri nimoro uoba bia nai kaumo. ¹³ Nimo painai memihoo ivaidioida nii miai haado imoaivaika. Nimo ihu hepu geemai ohuida kookoha manotiidioumoi uubi pinii'iumo, memiho naanai maniaraiboumo. ¹⁴ Nio hiipo manivairi bia ni'atika inai nio mo himia hi'a mereeiri manidomoiairi naika. ¹⁵ Iesu painaida nooro ten tausen dabi uubi ma idodiai inai via abiamioi hiiro biaka. Ka uriioi naa vadei imoa duutiiri mo nio abia kaa'u pinii'i. ¹⁶ Kaida mooro ainimaaka nio moo omo'uio uubi mai'ii moiri. ¹⁷ Aa'o nairi mooro nioido mo himia hi'a meree atai Timoti nimotiodaika mabu Paidubui ova'atiida nuu pupuo hi'aka. Nuuro himia nio uumoo ivai ouka tuunioha vativatiida ii'aumo tanamotoida mooro nii imatomu dioha oraa'oia everai. ¹⁸ Nio uubi aamiiai gee'ii hi'a dohoobo iraromo kaumo mabu nio iraromoida mooro nio iivou buai bia nouka. ¹⁹ Inai via ia'aaida taitai hi'aka iivoi nouka, Paidubuiro ee anemaaida. Kaida ire gee'i dohoobo iraromoumo uubii aimo vadeipiiri biaka inai nii aimo eraarai mooro nuuado ia'ai nouka. ²⁰ Iehova pai eraarai oo'a ne'ei vadeipii bia ia'aaka inai eraarai ia'aaka. ²¹ Nio nioi na'ura- hiavo nu'aipii rautu iivoira e gi'epu iraromoiire via mia eremaabe uriioi rautu iivoira.