¹ Nianaamuo, mooro nio uriio oroi'io uubiito bia niahoo kaida bia nimoa duutika inai hepui uubiito niahooka, Iesu painaida e'idioumo beibi keekei dohoobo, naa uumo tataha. ² Nio amo ihi behai pinimio ma idiou moiri, kookoo iihodui nioido modobo oo'aa biaka. Doo'ou rautu atuu everaika, kookoo iihodui nioido modobo biaka. ³ Mabu nio duupiito e'idioumo uubii oroi'ioi dohoobo aha e'idio kaumo. Gie iraromoire via eremaatiire nio ipituiaida ivii'aa. Aa'o naanai aimoiri nio ihu hepui uubira, via nio nii everraiha e'idioi avaivaadu- ⁴ Nio ataairo avarooa, mo Pooro nobodooka via ataro avarooa, mo Aporos nobodooka, nio hepui uubiito araahoi avai vaadu- ⁵ Aporos bo'ura- Pooro bo'ura- Nimo Paidubuido manira romoumoi uubikaa. Mabu nuuro himia kaa'ukaa'u ova'ati tauo pinimio. ⁶ Mooro piniodouti, Aporosiro pimadouti oboi inai via maiaupai moiri noroi Iehovaro pimio. ⁷ Kaida iodouti mereei biaka via oboi imadouti mereei biaka ii orohaai Iehovaka mabu noroi nuuro imioka. ⁸ Iodouti mereeire, oboi imadouti mereeire, niiti ta'ii atuu modoboka. Niiti himiahi'a ova'atii modobo imidai oukaido. ⁹ Ka nimo Iehovari ova'ati uubika. Nio via nuu vatii hau'iika via nuu motoika. ¹⁰ Iehova miai geemairi motoi iiditi uumoi moo pinomoha, mooro goroi oovahoro ne'eiha pinododiai ka mereataro ididika. Inai ididi everai miahi'aha ma ia'aai. ¹¹ Hobou mere ataro goroi oovahoro ne'ei ododiai bia ouka, uumoo mereiro iododiaida,- aa'o naai Iesuka. ¹² Mereataro goroi oovahoro ne'ei gooru, silva, erema'e no'a kopikopi via nu'a raito aviiditia, ¹³ nuu ova'atii oobodii ouka, hivioi hegerairo koriha omododiai ouka. Ka erai ne'eito nuuado ereedeeai oukaumo. Ire'iida erairo nuuado imahiboi ouka nii iova'atiimoi nai. ¹⁴ Bo'u ova'atiira erairo uruuro tatahai ka nuu gi'epu orovaabai nai eidai ouka. ¹⁵ Ii bo'u ova'atii opoi'oi voua erairo, nuu gi'epu orovaabai nai eidai bia ouka. Nu rautu via eraida ohu'odidioi ouka ka voroi'ioa. ¹⁶ Nio uumoo biara nio duupii Iehova tanamotoika via nuu uriioi nioado ive'idioa. ¹⁷ Nuu tanamotoi bo'uro vomomo dobuaa, aa'o mereei nuuro otee'autii ouka. Iehova tanamotoi taana hi'aka, ka nio nuuka. ¹⁸ Nio mereataro himia avaavo orovai naa biaka. Doo'ou ihuu ne'idiodui hivio mabuida nio tuiaida naana miamia idodiai mereeito bo'uro varaahooa, nuu himia avaavo morododiaika, ka nuuado araahoi ouka naana miamia idodiai mereeito. ¹⁹ Ihu hepu geemaida uumooito idodiai naanai Iehova rautuida hobou naaka. Ihu everai ii'aaka, ''Naa uumo uubii nihimia oroviourioi rautu naana idodiaida iohika.'' ²⁰ Via atai ihuu everaika,''Paidubui uumo hi'aka uumo uubiito araahoumo uubii tiinoi iraromoumo naanai hobou oropoi'o beha naanaaka.'' ²¹ Aa'o nairi mereataro nuhimia ooraabui rautu hobou dubuito araaho naa biaka. Tuunioha noo naanaaka, ²² Poorora, e Aporosira, e Kefasra, e hepu geemaira, e oroi'ioira, e iihiaira, e doo'ou ii'a naanaira, e didimoi ooumo naanaaira.Tuunioha aa'o naanaai noo naanaaka, ²³ Ka no Iesu painaida e'idioka, Iesu via Iehova painaida e'idioka.