¹ Moo nianaamuo, mo niodo inooi ooraduuti uumohi'a mereero oubiaka o didimoito ma iraromoi kaida nai ma ododiai evera mereero oubiaka Iehova ne'ei oopiova tidioumo naanahi'ai ivadueiri. ² Mooro nio tuiai inoraa'oiaida atana uumo ii'i biaka inai Iesu satauroida iihiai odi behaiha uumo pinii'i. ³ Nio pupuo tataha iaaimo,ka too iraromoida tamahiro iaaimoi hivioi mo nio rautu tauo pinoraa'oia. ⁴ Mo uumo vadeire via mata'uito inooraduuti mereata foosi manovai vadeipi biaka inai gabo pinovou uriiora eraara rai rautu. ⁵ Mabu noi pupuo iraromoi duupii nioito tana ii'aaka ii Iehova eraaraito ma ii'aairi. ⁶ Doo'ou nimo mia iraromoi ooraduuti uumo hi'a uubi haido nooraduuti kaumo ii ihu hepugeemai uumo uubiido biaka, o doo'ou uubii ivodaumo lidaioi biaka nanaa voroihidu. ⁷ Inai Iehova uumoi uubiiro eidai tataha everaito nooraduuti kaumo. Iehovaro uubii e'idioi oovahoro tatahaida iedeeai everai, nimoido mia ma oo'aairi. ⁸ Doo'ou e'idioumo uubii eraara aimo pai uubiida mereataro eidai biaka, niiro eidaimo roo'aato, eeka gee'ii araahoo Paidubui aiaumoi biaka. ⁹ Inai ihuu everai pi'atiumo, ''Idomai ataro eveeabua biaka, hepato ataro ororoovaibua biaka, mereehi'a kaukau ataro iraromobua biaka Iehovaro nuuido gi'epu iraromoumo uubii imododiai naai.'' ¹⁰ Aa'o naanai Iehovaro nimoido uriioi gaboida tauo pinimobodii. Uriioiro tuunioha naanai iohooika, poo'a Iehova gorohi'ai naanai. ¹¹ Uubii tuiaida mereataro naa ata uumoo ii'iito modobo biaka inai nuuado e'idio dubui uriio behai haro uumo ovai ouka. Kaida atuu everaika, mereataro Iehova ne'ei naanai uumoo ii'ii bia ouka inai Iehova uriio behai haro uumo ovai ouka. ¹² Nimo hepui uriioi eidaimo biaka inai Iehova ne'ei uriioi pineidaimo, mabu nuuro imoha beha inimohai naanai nuuado uumo ii'ii noukaumo. ¹³ Ka nimo ihu naanai meree hi'aro imatomudio uumoito bia nooraduuti kaumo inai uriioiro imatomudio modoboi nooraduuti kaumo. Uriioi naanai imoveheutiika nuhimia uriio oroi'ioida e'idioumo uubiido. ¹⁴ Duupii oroi'ioito e'idio mereeiro Iehova ne'ei uriio oroi'io naanai ioibotai bia ouka, nuuro hobou naanaito iahoi ouka. Nuuro uumo ii'ii bia ouka mabu nii uriioi hapuoi naanaaka. ¹⁵ Uriioi oroi'ioito e'idio mereeiro tuunioha naanai tauoha uumo ii'iika,mereataro naa ata omoaduei biaka. ¹⁶ '' Paidubui tiinoi ii'a naanai uumoo ii'ii mereeito mereataro nuu atanaa ematomudioi bia ouka-'' Ka nimo Iesu tiinoi ii'aa naanai uumo pinii'iumo.