¹ Naomi bainamweno ya Lute, wendekele kuli ikeye ngwendi, "Munange, kunjatha kukutondelako mwela kwakuhwiminako, mangana byuma byende bwino nobe? ² Ololo Mbowasi, ou munalume ali na banike baba mbanda bakakupanga bamunakala nabo, kumani ikeye kethi muka naanga yetu? Kenga, akaleleka mbale chino chingwethzi kuje ku lijungwilo. ³ Cho, jwela, likwite mathzi alwengo lwalubwa, thzala buthzalo bwobe bwabubwa, cho yaa kuje kulijungwilo. Oloni kethi usholokele kuli ikeye embwe nooho a kamanethela kulya na kunwa. ⁴ Oloni omu akalala, yaa ukakenge bwino okwo kumutambela kwakalalela cho hanima ukamukabangeye, kuukafukula kumendi endi, na kulalako. Cho akakulumbunwina bya kulinga. ⁵ "Lute wendekele kuli Naomi, "Njilinga byoshe wendeka." ⁶ Cho wathikumukile waile kuje kulijungwilo, akabangeyeye mikambeyo ya mwanene ina mweno. ⁷ Omo Mbowasi wamanethele kulya na kunwa na mbunge yendi yabwaelele manene, wayile kushongo ya mutumbo wa mabale walalele kuje bene. Cho waile na kulibemba kabundondo, wafukwile lipayi ku mendi endi, cho walalele. ⁸ Mukati kabuthsiki walikomokelele. Cho mwanyangumukile mutulo watengulukile, haje bene walikomokelele hakuwana munakathzi nalala ku mendi endi! ⁹ Cho wehwile ngwendi, "Yobe iyajo "Wakumbulwile ngwendi, "Yange Lute, ngamba yobe wa munakathzi. Jala buthzalo bwobe hali ngamba yobe wa munakathzi, omo yobe ukabushoko wa muyehi." ¹⁰ Mbowasi wendekele, "Munange, Yehoba akubethzikithe. Unalingi chimwetho chakama kutubakana chije chakulibanga, mwafwa yobe kuwaile nakushakethzeka bakwenje, nambe kahutu nambe wakufuka. ¹¹ Ololo, "Munange, kethi uthzibe lyoba! Njikalinga byuma byoshe biukalomba, mwafwa banu boshe mu nganda yange bathzibuka ngwabo wapwa u munakathzi wa mubwa. ¹² Mwabuthunga yange njapwa njikabushoko, oloni kwali kabushoko wa muyehi kutubakana yange. ¹³ Kala kuno buuno buthsiki, nooho kukya, nga akalinga chilika hali yobe ngwe kabushoko, mwamubwa, mwecheleni alinge chipangi cha bushoko. Oloni nga kalingi chipangi chabushoko kuli yobe, cho njichilinga, kwetheka na kuyoya cha Yehoba. Cho lala kuno nooho mutondo." ¹⁴ Ngechi walalele ku mendi endi nooho mutondo. Oloni wendukile mutondotondo manene kutewa banu kumumona. Cho Mbowasi wendekele ngwendi, "Kethi chithzibukiwe ngwe munakathzi walalele ku chijungwilo. ¹⁵ Cho Mbowasi wendekele mgwendi, "Nena naanga yobe ikwate uyitandubule." Omu alingile echi, Mbowasi wakeleho mbale yakupwa bukama bwakweta ku makilo 6 na kumutwika, Cho waile mu nganda. ¹⁶ Omo Lute wetele kuli ba inamweno, wendekele ngwendi, "Walingile bati, munange?" Cho Lute walekele byuma byoshe bije byalingile kuli ikeye. ¹⁷ Wendekele ngwendi, "Eyi ikeyo 6 makilo a mbale na njanene, nakwendeka ngwendi, 'Kuwapandele kuya maboko boko kuli nyokomweno." ¹⁸ Cho Naomi wendekele ngwendi, "Tumama kuno, munange, nooho akathzibuka byuma byoshe mu byendela, lelo kakahwimi nooho akamanetha echi chilika."