¹ Ngechi bene Mbowasi waile ku chikolo cha nganda cho watumbamene athi kuje bene. Chojo bwathibwathi, na uje kabushoko kendi yendekeleho wethzile bene kuje kwa kele ikeye. Cho Mbowasi wethzile kuli ikeye ngwendi, "Kabuthamba, ija u tumbame kuno." Cho na uje munalume wethzile cho wa tumbamene athi. ² Cho Mbowasi wambatele likumi lya baje bamyata ba mu nganda na kwendeka kuli bakebo ngwendi, "Tumbameni athi aha." Chojo ba tumbamene bene. ³ Cho Mbowasi wendekele kuli uje kabushoko kendi ngwendi, "Naomi, ou nelukoni kutunda chifuti cha Mowambu, a land,etha lihya lya ndolome yetu Elimeleki. ⁴ Ngechi nja tondo ngwange u thzubukechi cho na kukuleka ngwange, 'Lilande mu chitona mesho chei mbunga ili hano, cho lalo na ku mesho a bamyata ba banu bange aba'. Cho umona ngwe unashaka ngwobe uli lande, cho lilande. Olojo u mononi ngwe yobe kuwa shakele ngwobe u lilande, cho njileke lalo, mangana oni nange nji thzubuke, mafwa na umo wai ya na pande kulilanda kutubakana yobe, chojo yange njinapu wa mu chibalyoni kuli yobe. Chojo uje mukwabo wendekele ngwendi, Kumani njili landa bene. ⁵ Cho Mbowasi wendekele ngwendi, "A litangwa bene lije liuka landa lije lihya na ku fumitha ku liboko lya Naomi, una pande lalo na kwambatoni Lute uje munakathzi wa muyati wa Mowambaiti, fwile ya ndungo yabo, mangana u twale lutwe lihzina lya ndungo yabo aje a bufuko bwendi bwana thethze. ⁶ Olonini uje kabushoko kendi wendekele ngwendi, " Umona ngwe mukemwo mu china pande kupwa ngechoni cho kunjathoni kulilanda mwafwa cho nji thzimbalethelamoni na bufuko bwange buje bunji ka thethza munima yange. Chojo kumani yobyoni lilandelelyo, mwafwa yange nji nonowoni kulilanda." ⁷ Cho echoni chikecho bene cha pwiloni chithemunwina mu myaka yaku thang'ulu muje mu Isalela kupandama kuku landa na kuku landetha bufuko. A kulinga ngwabo munu a sholwethe ngwabo ng'anda inahu mwa mubwa, uje munu wakele waku shomona ng'aku yendi ku lindi na ku yana kuli uje mukwabo wa lyatele nendi; omu mukemwo mu ngila imo muje bakele na ku litabathanenamo banu mu Isalela. ⁸ Chojo uje kabushoko kendi wendekele kuli Mbowasi ngwendi, 'Yobe bene lilandelelyo," cho wa shomwene bene na ng'aku yendi. ⁹ Kathinoni Mbowasi wendekele kuli baje ba myata na kuli banu boshe ngwendi, "Munapu bakaleho lelo ngwe nji na landa byoshe bije bya pwile bya Elimeleki, na bije byoshe bya pwile bya Kilione na Maloni kufuma ku liboko lya Naomi. ¹⁰ Chojo nou bene Lute munakathzi wa ku Mowambaiti, mwebo lya Maloni, nendi njina lya mbatelayoni kupwa mwebwange, mangana njetheke ku twala lutwe lithzina lya muthsi na bufuko bwendi, ngechi lithzina lyendi kethi limbituke na ku libala a kati ka bandolome bendi na ku chikolo cha limbo lyendi. Ngechi lelo chilibene munapu bakaleho." ¹¹ Ngechibene banu boshe baje bakele kuje ku chikolo na ba myata bendekele ngwabo," Chili bene tubakaleho. Yehoba a pwithe ou munakthzi na kobela mu njubo yobe ngwe Lakele na Leya, baje babali ba tungile njubo ya Isalela; cho nobe lalo pwa muka kufuka mu muyati wa Efilata na kupwa wa luthsimo mu Mbetelehema. ¹² Na njubo yobe ikale ije njubo ya Pelezu, uje ya kitile Tamale na Yunda, kwitila mu naanga ije Yehoba a kwana nou mumbanda. ¹³ Ngechi bene Mbowasi wambatele Lute, cho nendi wa pwiloni mwebwendi. Cho wa limwene nendi, chojo Yehoba a mu tabethele kwimita, ngechi wa kwatele mwana wa munalume. ¹⁴ Chojo banakathzi bendekele kuli Naomi ngabo, "Yehoba bamu lemethe mwakama, mwafwa lelo ka kuthethzele waku jeneka kabushoko kobe wa a mbunge yobe, ou bene kakeke. Lithzina lyendi likale na luthsimo mu Isalela. ¹⁵ Apwe kuli yobyoni uje wa ku kwatha mu kuyoya chobe choshe na kuku nenela ku bwahelela kwoshe mu bukulukathzi bwobe, mwafwa nyokomweno, ou wa kuthzema, ou wa mubwa kuli yobe kutubakana na bana ba banalume ba tanu na babali, na ku kitilaye ou." ¹⁶ Chojo Naomi wambatele uje mwana, na ku mu kambeka a nulo yendi, na ku mu lela bwino bwino. ¹⁷ Cho banakathzi baje ba lyatele nabo ba mulukile lithzina, na kwendeka ngwabo, "Kuli Naomi kuna themuka mwana wa munalume." Chojo ba mwanene lithzina lya Ombendi. Cho ikeye bene wa pwile ishe ya Njese, uje wethzile na kupwa ishe ya Ndabiti. ¹⁸ Ngechi ei ikeyoni naanga ya Pelezu: Pelezu uje ya kitile Hezuloni, ¹⁹ Hezuloni wa kitile Lamu, Lamu wa kitile Aminandambu, ²⁰ Aminandambu wa kitile Nashoni, Nashoni wa kitile Salumoni, ²¹ Salumoni wa kitile Mbowasi, Mbowasi wa kitile Ombendi, ²² Ombendi wa kitile Njese, cho Njese wa kitile Ndabiti.