¹ Sala wayoyele myaka 127. E yi ikeyo myaka ya yoyele Sala. ² Sala wathsilile mu Kiliate Alaba, ilumbununa Hebuloni, mu lifuti kya Kanana. Abilahama walilile na kuthikwoka Sala. ³ Cho oni Abilahama wa katukile na kuthethza chibimbi cha mwebendi, cho wendekele kuli bana ba Heti, ngwendi, ⁴ "Yange nji litandinda akati keni. Njilandetheniko libu kupwa chihilo mukati keni, mangana njathe kushitikao muthsi wange." ⁵ Bana ba Heti ba mukumbulwile ngwabo, ⁶ "Tutolilile shukulu, Yobe uwa bulemu wa Njambi mukati ketu. Shitika muthsi wobe ali oshe a ushaka a bihilo byetu. Naumo wai ali yetu a ku byanena chihilo chendi, mangana ushitikeo muthsi wobe.' ⁷ Abilahamu wathsikamene athi ku banu ba muje mu lifuti, kubana ba Heti. ⁸ Wendekele kuli bakebo ngwendi, "Oshe mwatabe ngweni njatha kushitika muthsi wange, njithzubeni cho endekeni na Efuloni muna Zoha, munjendekeleko. ⁹ Mwihuleni anji landetheko lithzethzengoma lya malipela, lije lyendi, lije lyakala kushongo ya lihya lendi. Anji landethelyo akati kabanu a ndando ya kushula ngwe bihilo." ¹⁰ Efuloni wa tumamene amo na bana ba Heti, cho na Efuloni ka Hitite wa kumbwilile Abilahama na banu ba Heti bali nakuthzibako, na baje boshe bethzile mu chikolo cha nganda, ngwendi, ¹¹ "Embwe, shukulu, njitolilileni. Njikwana lije liya na lithzethzengoma lije lilimo. Njilyana kuli yobe ku mesho a bana ba banu bange. Njilyana kuli yobe kushitikako bathsi bobe." ¹² Cho oni Abilahama wa thsikamene athi a mesho a banu muje mu lifuti. ¹³ Wendekele kuli Efuloni na banu boshe ba mu lifuti bali nakuthzibako, ngwendi, "Oloni oshe wa shaka, njitolilile. Njiku fweta a lije liya. Tambula bimbongo kutunda kuli yange, cho njika shitikao muthsi wange ¹⁴ Efuloni wa kumbulwile Abilahama ngwendi, ¹⁵ "Pulisi, shukulu, njitolilile. Mushuka wa libu ufwika mabundungulu a siliva bita biwana, bikajo lalo bili a kati kange nobe? Shitika muthsi wobe." ¹⁶ Abilahama wa tolililile byendekele Efuloni cho Abilahama wa landele na kwana Efuloni ije ndando ya siliva ya endekele ku mesho ya bana ba Heti, bita biwana bya mabundungulu a siliva, kwetheketha mu theteko ije bakele kwetheka na baka kulanda naku landulula. ¹⁷ Cho lije liya lya Efuloni, lije lyakele mu Makipela, lije lyatele na Mamule, bije byapwile, liya, lithzethzengoma ije lyakelemo, cho na biti byoshe bije bya kele muje mu liya na kwita munginga yalyo yoshe, ¹⁸ ba lyanene kuli Abilahama kwitila mu kulilanda ku mesho a bana ba Heti, na a mesho a baje boshe bethzile munganda. ¹⁹ Anima yechi, Abilahama wa shitikile munakathzi wendi Sala muje mu lithzethzengoma lya muje mu liya lya Makipela lije lyata na Mamile, kulumbununa ngwe, Hebuloni, mu lifuti lya Kanana. ²⁰ Cho oni lije liya na lije lithzethzengoma banene kuli Abilahama ngwe libu lyendi kupwa lya chihilo kutunda kuli bana ba Heti.