¹ Cho Abilahama wapwile kakulukathzi na Shukulu wamukithwile muli byuma byoshe. ² Cho Abilahama wendekele kuli ndungo yendi, uje wapwile wakukola manene uje wakele mu njubo yendi akele mukulunu wa byuma byoshe bije byakele nabyo ngwendi, "Aka maboko obe mwithi lya ntungi yange ³ cho njilinga ulithinge kuli Shukulu, Njambi wa mwilu na Njambi wa athi, ngwobe kuukatha kukambatela munakathzi munange wa munalume kutunda kuli baana ba banakathzi bamu Kanana, mukati kabo mukemo muji katunga limbo lyange. ⁴ Oloni ukaya ku lifuti lyange, na kuli baba shoko bange, na kukambata munakathzi wa munange wa munalume Isaki." ⁵ Cho ngamba wendekele kuli ikeye ngwendi, "Cho batijo umona munakathzi akonowa kukaba yange kuli lino lifuti? Cho njinapande kwilwitha munobe wa munalume kuje ku lifuti lije limwatundile ndi? ⁶ Abilahama wamukumbulwile na kwendeka ngwendi, "Buthunga bene ngwange kuwapandele kwilwitha munange wa munalume kuje! ⁷ Shukulu Njambi wa mwilu, uje wanjitundithile mu njubo ya tate naku lifuti lya babu shoko bange, cho uje wanjikulaethele na kulithinga ngwendi, kubatekulu bobe njikabana eli lifuti, cho akatuma kangelo amesho obe cho ukambatela munange wa munalume kutunda kuje bene. ⁸ Oloni umona munakathzi kashaka kukabangeya, cho wathamba kuli echi chithingo change. Kethi lika wilwithe munange wa munalume kuje." ⁹ Cho uje ngamba wakele maboko endi mwithi lya ntungi ya Abilahama shukwa ina, cho walithingile kwetheketha mwaila awa majwi. ¹⁰ Cho ngamba wambatele likumi lya ba tumelu ba shukwaina yendi cho waile. Cho lalo wambatele mishobo yoshe ya bwaana kutunda kuli shukwaina. Cho wakatukile nakuya kwimbo lya Alamu Naholaimu, ku nganda ya Nahole. ¹¹ Cho wathsikamethele tumelu athi hanja ya nganda kuli thima lya mema. Chapwile mangwethzi, thimbu ije banakathzi bakai na kutekula mema. ¹² Cho wendekele ngwendi, "Shukulu, Njambi wa shukwa nana yange Abilahama, njaneko byabibwa alitangwa lya lelo na kumwetha lithiko lya bithzango kuli shukwaina yange Abilahama. ¹³ Kenga, ano njinemana kuka bwelu bwelu ka mema, na baana ba banakathzi ba banalume ba muje mu nganda bali nakwija nakutekula mema. ¹⁴ Echeleni chipwe muje bene. Omwo njendeka ku mwanike wa munakathzi ngwange, 'Njilomba achithikumwithe munyangulo wobe linga njinwemo, cho omwo kuli yange ngwendi, 'Nwamo, njana mema ku tumelu bobe lalo,' cho mwecheleni apwe uje unangula kupwa wa ngamba yobe Isaki. Muli ebi cho njithubuka ngwange unamwetha chikumiiyo cha chithzango kuli shukwanana yange. ¹⁵ Chethzile nakupwa muje thimbu kanda amanethe kwendeka, kenga, Lambeka wethzile na njaba yendi achithzili. Lambeka wathemukile kuli Mbethiwelo mwana wa munalume wa Milika, munakathzi wa Nahole, shongo ya Abilahama wa munalume. ¹⁶ Mwanike wa munakathzi wapwile wachili manene uje kanda achilimoneo na munalume. Cho waile kulithima lya mema, nakukashulitha njaba na kwilukamo. ¹⁷ Cho uje ngamba washatukilile kuli ikeye nakwendeka ngwendi, "Njilomba njaneko tumema twatundondo kutunditha mu njaba yobe." ¹⁸ Cho wendekele ngwendi, "Nwamo, shukwa nana yange," cho wathi wathi wa shulwithile njaba yendi na kuyana mumaboko endi babenya, cho wamwanene nakunwamo. ¹⁹ Omo mwamanethele kumwana na kunwamo, cho wendekele ngwendi, "Njitekula mema aba tumelu bobe lalo, kubanga noho bakamanetha kunwa." ²⁰ Cho bwathi bwathi wanungulwile aje akele mu njaba yendi nakuaaka mu chithzau, cho washatukilile ku lithima nakutekula mema, cho watekwile mema aba tumelu boshe. ²¹ Uje munalume wamukengele mukwoloka mangana amone ngwe shukulu namu bwaethela laja bungethzi bwendi ndi embwe. ²² Omo tumelu bamanethele kunwa mema, cho uje munalume watuwithile kang'ote kakununga ka ngolinde kakujeneka kushula kakulema chitika cha mashekele, na bujomo bwa maboko endi abali a ngolinde ya kulema llikumi limo lya mashekele, ²³ na kwihula ngwendi, "Umwana wa munakathzi weya obe? Njilekethe, muliko chibatulo chimo mu njubo yaba isho linga yetu tukalemo buthsiki bumo ndi? ²⁴ Cho wendekele kuli ikeye ngwendi, "Njimwana wa munakathzi wa Mbethzewelo mwana wa munalume wa Milika, uje yathemene na Nahole." ²⁵ Cho lalo wendekele kuli ikeye ngwendi, "Tuli nabyo byabingi byoshe bibali na mwila wakubutama nou wakulya, cho lalo na chibatulo cha kukalamo yobe buthsiki bumo." ²⁶ Cho ou munalume wakulamene athi nakulemetha Shukulu. ²⁷ Cho wendekele ngwendi, "Kithsu yikale kuli Shukulu, Njambi wa shukwanana yange. Ngwe omo muli yange, Shukulu nanji twamenena mwakuthungama ku njubo ya babu shoko ba shukwanana yange." ²⁸ Cho mwanike wa munakathzi washatukile nakuya nakukaleka bamu njubo ya baina ali ebi byuma byoshe. ²⁹ Cho Lambeka wakele na ndolome yendi, na lithzina lyendi lyapwile Labani. Cho Labani washatukile kuli munalume uje wakele kumukulo wangila ya kulithima lya mema. ³⁰ Omo wamwene malyenge a kununga akumbathana kumaboko a ndokathzi yendi, cho omo wathzibile lalo majwi andokathzi yendi Lambeka, "Ebi bikebyo byendekele ou munalume kuli yange," cho waile kuli uje munalume, cho, kenga, uje wemanene na kamelu ku lithima. ³¹ Cho Labani wendekele ngwendi, "Ija, yobe iba kwithula kuli Njambi. Bikajo unemanena haja? Njinakubwaethela njubo, na chela cha tumelu. ³² Cho munalume wethzile ku njubo nakulongolola bitenga atu melu. Cho tumelu babanene mwila wakulala nou wa kulya, na kumwana mema akutana ku mendi endi na ku mendi abanalume baje bakele nabo. ³³ Bamu bwaethelele kulya ku mesho endi, oloni wendekele ngwendi, " Kunjili bya kulya kubanga njendeka bika bije njatha kwendeka." Cho Labani wendekele ngwendi, "Endeka." ³⁴ Cho wendekele ngwendi, "Yange njapwa njingamba ya Abilahama. ³⁵ Shukulu na kwithula shukwanana yange manene cho napu wakuhyana. Namwana bimanga na bingombe, siliba na ngolinde, bingamba ba banalume na bingamba ba banakathzi, na tumelu na bimulu. ³⁶ Sala, munakathzi wa shukwanana yange, wakitile mwana wa munalume kuli shukwanana yange omo nakulubala laja, cho wamwanene bufuko bwoshe buje bwakele babwo kuli ikeye. ³⁷ Shukwanana yange wanjilingithile kulithinga, ngwendi, 'Kuwapandele kukambatela munange wa munalume munakathzi kutunda kuli bana ba banakathzi bamu Kanana, muje mu lifuti lyabo munjatunga limbo lyange. ³⁸ Olojo, unapande kuya ku chithemi cha bakatate, na kubabushoko bange, nakukambata munakathzi wa munange wa munalume.' ³⁹ Cho njendekele kuli shukwanana ngwange, 'Amo munakathzi kakanji kabangeya.' ⁴⁰ Oloni wendekele kuli yange ngwendi, 'Njambi, ou njikende ku mesho endi, akatuma kangelo kendi kuya nobe cho akabwaetha ngila yobe, cho mangana ukambatele munange wa munakathzi akatunda ku babushoko bange na kutunda ku chithemi cha bakatate. ⁴¹ Oloni ukaputuka kutunda kukulithinga change ngwe ukeja kubabushoko bange cho kubakakwanaye kuli yobe. Cho ukapwa uwakupatuka kutunda ku kulithinga change. ⁴² Cho njinete lelo kulithima, nakwendeka ngwange, 'Obe Njambi wa shukwanana yange Abilahama, njalombo, mona chilibene unathinganyeka kupanga bungthethzi bwange kupwa wabubwa— ⁴³ yange uno, njinemana kulithima lya mema— echela mwanike wa munakathzi uje atuuka nakwija mukutekula mema, munakathzi uje unjendeka ngwange, "Njalombo njaneko tumema twatundondo kutunda mu njaba yobe mangana njinwe," ⁴⁴ munakathzi uje endeka kuli yange ngwendi, "Nwaa, cho lalo njitekula mema atumelu bobe"— echela apwe munakathzi uje yobe, Njambi, unangwila muna shukwanana. ⁴⁵ Thimbu kanda njimanethe kwendeka mu mbunge yange, kenga, Lambeka wethzile na njaba yendi achithsili chendi cho njendekele kuli ikeye ngwange, 'njalombo unjaneko mema akunwa.' ⁴⁶ Cho bwathi bwathi wathikumwithile njaba yendi kutunda achithsili chendi na kwendeka ngwendi, 'Nwaa, cho njana tumelu twobe mema lalo.' Cho njanwine, naku shangelela tumelu lalo. ⁴⁷ Njamwihwile na kwendeka ngwange, 'Umuna iyaa? Cho wendekele ngwendi, 'Mwana Nahole uje yakitililile kuli Milika.' Cho njamuthzikile kathzeya halijulu lyendi na matheka kumaboko endi. ⁴⁸ Cho njathikama athi nakushakethzeka Njambi, nakukwithula Njambi, Njambi ya shukwanana Abilahama, uje wanjitwamenene ngila yaibwa yakuwana mwana wa munakathzi ku babushoko bwa shukwanana kupwa munakathzi wa munendi wa munalume. ⁴⁹ Cho ngachije, oshe nalibwaethela ku mwetha chithzemo na likulaelo kuli shukwanana, cho njilekethe. Oloni ngwe kwai, cho njilekethe, mangana njitengulukile ku liboko lya chilyo nameme ku chimoshwe." ⁵⁰ Cho Labani na Mbethiwelo ba kumbulwile na kwendeka ngwabo, "Echi chuma chinaija kutunda kuli Njambi; cho kutwatha kwendeka kuli yobe bya bibi nameme bya bibwa. ⁵¹ Kenga, Lambeka ali ku mesho obe. Mwambate mangana muye, mangana akakale munakathzi wa mwana wa munalume wa shukwanana yobe, ngwe muje mwanendeka Njambi." ⁵² Omo ngamba ya Abilahama wathzibile majwi abo, wathsikamene athi ku mesho a shukulu. ⁵³ Cho ngamba watuhwile bitenga bya masiliba na bitenga bya ngolinde, na buthzalo, na kubyana kuli Lambeka. Cho lalo waanene bwaana bwa bubwa kuli ndolome yendi na baina. ⁵⁴ Cho ikeye na banalume baje bakele nendi balile na kunwa. Bakele kuje buthsiki bwoshe, cho omo bendukile mutondotondo, wendekele ngwendi, "Njitumeni kuli shukwanana yange." ⁵⁵ Ndolome yendi na baina bendekele ngwabo, "Echeleni mwana wa munakathzi atumbame netu atumatangwa twatundondo, twakwetheketha likumi limo. Athinoni akaye." ⁵⁶ Oloni wendekele kuli bakebo ngwendi ,"Kethi munjijwelethe, athimbu Njambi nathungametha laja ngila yange. Njecheleni njiluke mu ngila yange kuli shukwanana." ⁵⁷ Cho bendekele ngwabo, "Cho tumuthana mwana wa munakathzi na kukamwihula." ⁵⁸ Cho bathanene Lambeka na kumwihula ngwabo, "Uya nou munalume ndi? Cho wakumbulwile ngwendi, "Njiya." ⁵⁹ Cho batumine ndokathzi yabo Lambeka, amolika na ndungo ya Abilahama na banu bendi. ⁶⁰ Cho bakwithswile Lambeka, na kwendeka kuli ikeye ngwabo, "Ndokathzi yetu, akapwa ina ya makulukathzi a likumi lya makulukathzi, na batekulwila bobe bakafungulule bikolo bya baje babathzinda." ⁶¹ Cho Lambeka wakatukile naikeye na bingamba bendi babanike babanakathzi balondele atumelu, nakukabangeya uje munalume, Chojo uje ngamba wambatele Lambeka, cho waile ngila yendi. ⁶² Athimbu Isaki watungile mu Nengebi, cho wakele mukweta kwendi kutunda ku Mbeli Lahayi Loyi. ⁶³ Isaki waile nakukala mu lihya lyendi nakuthinganyeka mangwethzi. Wandukile nakumona, kengeni, kwakele tumelu bakele nakwija! ⁶⁴ Cho Lambeka wakengele, cho omo wamwene Isaki, watumbukilile athi kutunda akamelu. ⁶⁵ Cho wendekele kuli uje ngamba ngwendi, "Iyajo uje munu ali nakwenda mu lihya nakutumona yetu?" Cho uje ngamba wendekele ngwendi, "Ikeye shukwanana. Cho wambatele naanga yendi na kulifwikayo. ⁶⁶ Cho uje ngamba walekele Isaki byuma byoshe bije byalingile. ⁶⁷ Cho Isaki wamunenele mu tende ya baina Sala, na kwambata Lambeka kupwa munakathzi wendi, chojo wamuthzemene manene Cho Isaki bamuthzembelekele akuthsa cha baina.