¹ Kaha ua sanene vandongesi veni likumi na vavali veze kuli ikeye uava hielengolo ku muzimu ua ku zuala ku vifumisa, naku kanguisa misongo yose yeka na yeka na mavezi ose eka na eka. ² Vunoni mazina a vapositolo vaze likumi na vavali akeo. Akalivanga, Simone (uze aluile Petulu), na Anduleo muanaye; Tiango muana Sembendeo, na Yoano muanaye; ³ Filipu, na Mbatolomeo; Tomasi, na Mateo mukua milambu; Tiango muana Alefeu, na Tandeo; ⁴ Simone ua ku Kanana, na Yundasa Iskaliota, ikeye uze ua muendele vungungu. ⁵ Ava likumi na vavali Yesu uava tumine. Kaha uavasikele ngueni, "Kati muye munjila yavakua vifuti, na mumembo ava Samaliya kati mu kovelemo. ⁶ Vunoni hamenu ku vampanga va kuzimbala vaku ndzivo ya Isalela; ⁷ kaha amo mumukuya, ambululenu nguenu, ' Vulimu hiehi vuangana vua muilu.' ⁸ Kanguisenu mivezi, sangulenu vatsi, lelesenu vakua mbumba, fumisenu vandemone. Vuana vumuatambula ngoco, vu hanienu ngoco. ⁹ Keti mu lilengeyele olo, ni patala nkengelezi ku miva yenu. ¹⁰ Keti umbate ngonga vungendzi, cipue zinkaku, cipue mulamu muomu mukua kupanga na pande ku-lia ceni. ¹¹ Kaha omo muka kovela muimbo limo, hulenu mukua kumi viukila a limo, kaha tumamenu neni noho mu kakatuka. ¹² Kaha omo mukovela mundzivo, sambelelenu. ¹³ Kaha nga vakua ndzivo ize vana viuka cili, ciyulo cenu cihetemo. Vunoni nga kava viukile, kaha ciyulo cenu ci hilukile kuli enu vavene. ¹⁴ Kaha uose ka mitambula enu cipue ka halakana ku mezi enu, omo mutuhuka ku ndzivo ize cipue kuimbo, totomonenu mpumputa ku viliato vienu. ¹⁵ Mua vusunga njikumileka nguange, kupihia calimbo lize cika hiana cize ca Sondoma na Ngomola kulitangua lia ku sampa milonga. ¹⁶ "Talenu, njikumituma ngue vampanga hakati ka tungunga, ngoco vene kalenu vaka mangana konkamenu ngue mavembe. ¹⁷ Fuma kuvantu! Vaka mituala ku zimpunga zia ku sompela milonga, kaha vaka miveta makole mu visinangonga yavo. ¹⁸ Cili vene vaka mituala kumeso a vanguvulu a vamiangana omo yange, akapue vukaleho kuli vakevo na kuli vakua vifuti. ¹⁹ Vumoni omo va kamituala, kati mu kome mitima nguenu vati ni vika vimu kahandeka, muomu hatsimbu ize vene vakamihia vize vimuka handeka. ²⁰ Muomu kati enu mu kahandeka, vunoni muzimu ua Isuenu akahandeka mu kati kenu. ²¹ Kaha muanaye akatuala muanaye ku ku-tsa, Ise na muaneni. Kaha vana vaka katukila visemi vavo vaka va tsihisa. ²² Nenu vose vaka mizinda muomu lizina liange. Vunoni mukua kukolesa na ku katoka, ikeye a kovoka. ²³ Vunoni omo vamiyandesa kuimbo eli, tinenu kuimbo likuavo, muavusunga njikumileka, nguange kamu kamenesa membo ose a Isalela ku vanga muana muntu neza. ²⁴ "Ndongesi ka hiana mulongesi, cipue mukuamanda ka hiana kukueni. ²⁵ Kaha ndongesi na puisamo ngue a pua hamo na mulongisi ueni, na mukuamanda na kukueni. Ivene ndzivo ngue vana mu tumbula Mbelesembulu, ka vakahiana ku vakua ndzivo yeni ni! ²⁶ Ngoco vene kati muvatine, muomu kakuesi camu fuika cika fukuka, cipue caku suekesa kavaci solola. ²⁷ Evi vinji kumileka mu milima, vi handekenu ha mutana, kaha nevi vimu kuivua mu lituitui, vitambekeliene ha tusongua tua ndzindzivo. ²⁸ Kati mu ivue vuoma vua vatsiha muvila vunoni muono kutsa kava hasa kutsiha, vunoni vuoma vua uze a haa kunongesa muono na muvila viose vivali mu ngehena. ²⁹ Kaveku landesa tuzila tuvali tua tundende na cindeyi cimo, ni? Kaha na umo uahi uavo ka uila ha mavu ku vanga ku cizango caisuenu. ³⁰ Vunoni na zinkambu vene zia ku mitue yenu vana zitanda ziose. ³¹ Ngoco vene kati muivue vuoma. Seho yenu ya hiana tuzila va vengi. ³² Ngoco vene vose a kanji tava ku meso avantu, ikeye nji katava nava ku meso a a tata ali muilu. ³³ Vunoni uose a kanji viana ku meso a vantu, ikeye nji ka viana nava kumeso atata ali muilu. ³⁴ Kati mu singanieke ngecize njezile nakuneha kuunda hano ha mavu. Ka njezile na kuneha kuunda , vunoni mpoko yamukuale. ³⁵ Muomu njezile na ku hanguna muntuna ize, na muanava mpuevo na naye, na nemueno. ³⁶ Kaha vakua ndzivo ya muntu vakevo va kapua vakua nkole yeni . ³⁷ Uze a kulemesa ize na naye kuhambakana ange ikeye napande.Kaha uze akulemesa muana ua yala ni ua mpuevo kunji hiana ange ikeye kanji pande. ³⁸ Kaha uze aka tambula cilindakano ceni na ku nji kava ange ikeye kanji pande. ³⁹ Uze a uana muono veni a ka u zimbalesa. kaha uze a zimbalesa muono veni omo yange ikeye a ka u uana. ⁴⁰ Uze a mitambula enu a nji tambula ange, Kaha uze a nji tambula ange atambula uze ua nji tumine. ⁴¹ Uze a tambula kapolofeto, mulizina lia kapolofeto akatambula cilunguiso ca kapolofeto, kaha uze a tambule mukua vuviuke mulizina lia mukua vuviuke aka tambula cilunguiso ca mukua vuviuke. ⁴² Kaha uoze a ka hana mulizina lia ndongesi ngandza ya mema atontola kuli umosi va ava va vandrnde linga a nue, mua vusunga nji ku mileke, ka ka zimbalesa cilunuiso ceni na hamo hahi.