¹ Kaha ca kele ngecize omu Yesu mua manesele kuli sika nava ndongesi ven, ua vasile na kuhana kulongesa na kuana kuambulula mu membo avo. ² Vunoni omo Yoano ua vuile mu kamenga vipangi via kulishitu, ua tumine mezi na vandongesi veni ³ na kuamba ngueni, Yove vene uze uli na kuiza, ni tu lavelele ueka?" ⁴ Yesu uava kuaniene na kuamba ngueni, "Hamenu mukamulele Yoano vi muamono na vi munevu. ⁵ Tupuputa vana kumona, vitondi vana kuenda, vakua mbumba valele, tu sinda matuitui vana kuivua, va tsi vasanguka, kaha va hutu vava zimbuila zimpande zia cili. ⁶ Kaha ua vezika uze kesi na coua caku musuntsuisa muli ange." ⁷ Ava vamala vaile mu njila yavo, Yesu ua putukile kuleka mbunga ia vantu hali Yoano, "Vika viua kele na kumona mu mpambo lihengo livali na kunikisa kuluhundzi ni? ⁸ Vunoni vika vi muaile naku mona Yala nazala via ku viuka?Talenu, vaka kuzala via viuka vali mu zindzivo zia va miangana. ⁹ Ambandzo vika vimua ilile na kumona kapolofeto? Eua njikumileka, ua kuhiana kapolofeto. ¹⁰ Uno ikeye uze ua sonekele, Talenu Jina kutuma kanganda kange ku tuleka cihanga cenu , aka vuikisa njila yove kulute luove.' ¹¹ Mua vusunga nji kumileka, nguange ha kati kavaze ava vana semuha ku vampuevo kakuesi umo ua kupulakana Yoano muka ku mbuitika.Vunoni ou ua puua munolenale mu vuangana vua muilu ikeye na muhiana. ¹² Kufuma ku matangua a Yoano muka ku mbuitika lelo, vuangana vua muilu vana ku koela na ngolo, kaha va mala vaka ku vuzualesa veku vunianguziola na zingolo. ¹³ Muomu vapolofueto uose mezi a lusiko vaku a zimbula na kuheta kuli Yoano; ¹⁴ Kaha ngue mua zange ku citava, ikeye Eliya uze ivambele nguavo akeza. ¹⁵ Ali na matuitui a kuivua, Evueko. ¹⁶ Vunoni muyati ou njika upuisa na vika? Va napu ngue vanike vana ku hehela ku vitanda, vatumama na kusana vakuavo ¹⁷ nguavo, 'Tua mi sikilile zimbendo, kaha enu ka mua cinine. Tua liniengele, kaha enu ka mua lilile.' ¹⁸ Muomu Yoano nezile ikeye kalile muka kanuine viniu, kaha va handekele nguavo, 'Ali na ndemone'. ¹⁹ Muana nuntu uezile nakulia na kunua kaha nguavo, 'Talenu, uatsaha kulia na muka na kunua viniu, kavusamba kavaka ku tambula milambu na vakua vupi! Kaha mangana vakasamba ha vipanga viavo." ²⁰ Kaha Yesu a sangumuile ku handekela membo aze mu kati kavo na kulingilamo vipupu, muomu ka valulukile. ²¹ "Cikele cove, kolazine! Cikele cove, Mbatesainda! Nguena evi vipupu via lingikile mu Tile na mu Sindone evi via lingikile kulienu, nga vana lialuluisa laza na ku zata vikeleya naku tumama mu muto. ²² Vunoni nji kumileka nguange Halitangua lia kusonga milonga njika tava Tile na Sindone kuhiana enu. ²³ Nove, Kapenamu, mpamo vaka ku halesa na kuku zundula kuilu ni cahi? Vaka ku hiluisa ha mavu ku handase Ngue evi vipupu evi via lingika kulienu via lingikile mu Sondoma, nga via sala ku heta helo. ²⁴ Vunoni njiku mileka nguange halitangua lia kusompa milonga ove ukamona kupihia cakama ca ku hiana cize ca Sondoma." ²⁵ Hantsimbu ize Yesu ua handekele ngueni, "Nja ku santsela, Tata, muangana ua muilu na hamavu, muomu viuma evi ua visuekele kuvaka mangana, na kuvaka mana, kaha una vi solola ku vanike. ²⁶ Eua, Tata, muomu ca viuka ku meso ove. ²⁷ Viuma viose Tata navi kundika kuliange; nou naziva muana uahi kuvanga Tata kaha, naua uaziva Tata uahi kuvanga muana kaha nou muana na zange kumu soluelaye. ²⁸ Tuayenu kuliange , enu vose muna ku fuitangana naku lema na viteli, kaha ange njiku mihuimisa. ²⁹ Mbatenu mukambo uange na kukundama ku liange, muomu nja konkama, nji muka ku likehesa mumutima, kaha muka uana ku huima mu miano yenu. ³⁰ Muomu mukambo uange ua uasi na citeli cange ci hehu."