¹ Mutsimbu yayindende, makombakazi avantu akungulukile hamo cikuma nakuliliatangela hali umo namukuavo,aputukile kuhandeka kuli vandongesi zieni cakuputukilako cose,''Zangamenu na cimbaluila cava faliseo,ava vakulionga, ² Vunoni kakuesi cuma civakasueka civakahona kusolola,cipue cakusuama civakahona kuziva. ³ Kaha viose viua handekele mumuilima vakavivua muku munika, kaha viose viuahandekele mulituitui mukati kandzivo vakavihandeka helu lia ndzivo. ⁴ Njikuhandeka kulienu,masepa ziange nguange, kati muivue vuoma kuli vaze vekutsiha mivila, kaha kufuma haze novivakulinga viaha. ⁵ Vunoni njikumivezulako enu imuatala kuivia vioma.Vuoma kuli uze, ngue vamutsihi, ali nazindzila zakumimbila enu mungehena.Mukeko,Njikuhandeka kulienu nguange,muivuenu vuoma. ⁶ Kumani tundzili vatanu kavakuasa kuvalanda na peni yayindende?kakuesi umo hakati kavo ivakusuva kumeso a Njambi. ⁷ Vunoni cipue zinkambu ziakumutue uove ziose vazitanda. kati uivue vuoma. Enu mualema kuhambakana tundzili. ⁸ Njikuhandeka kulienu nguange,uose akutavela ange,mukati kavantu,muana muntu naua vakamutavela mulati kavangelo zia Njambi. ⁹ Vunoni uose uze akunjikana ange kumeso avantu vakamukana mukati kavangelo zia Njambi. ¹⁰ Uose uze akuhandeka lizi lialipi hali muana muntu vakamukonekela,Vunoni kuli uze akatuka muzimu uakulela, kavakamukonekela. ¹¹ Tsimbu kanda vakuneha ove kusinangonga,vakakuyula, naua vaka vuangana, kati ukevue vuoma omu mukahandeka mukuliohela, cipue ukahandeke vika, ¹² Muomu muzimu uakulela ukakutangesa muli ize tsimbu mu uatela kuhandeka.'' ¹³ Kaha muntu umo kufuma halivunga ahandekele kuli ikeye ngueni, ''Longesi,muanetu uayala tulipangele vusuana nange.''' ¹⁴ Yesu ahandekele kuli ikeye ngueni, ''Muntu,anjilingisile ange kukala mikaku sompesa cipue mukakupangeziela mukati kenu?'' ¹⁵ Ahandekele kulivakevo ngueni,Litalenu lilamenu enu vavene kufuma kukutsila califua, muomuo kuyoya camuntu kacesi havupete vueni cahi.'' ¹⁶ Kaha yesu avalekele mucisimo, ngueni ''Lihia lia yala umo piti atiele mbuto yacili, ¹⁷ Kaha alihulisile yivene, ngueni, Njikulinga vika, muomuo kanjesi nacihela cakulamenamu zimbuto ziange?' ¹⁸ Ahandekele ngueni, Omu mukeko unjekulinga.Njikupuzula visete viange na kutunga viakama, kaha muze mukeko munjikalamena zimbuto ziange naviuma viange. ¹⁹ Njikuhandeka kumuono uange, ''muomuo,uli na viuma viavingi viua lame mumiaka yayingi, huima muacili, lia, nua, viukilila.''' ²⁰ Vunoni Njambi ahandekele kuli ikeye ngueni,Yala kuhulama, vutsiki vialelomuono uove vakukutambulauo, kaha viuma viose viua viukisa, vikukala vieya? ²¹ Mukeko muazangele muntu umo uze atumbikile cikasa ceni helu ivene kaha kuli Njambi kapitile?'' ²² Yesu ahandekele kuli vandongesi zieni ngueni, ''Aha njikuhandeka kulienu nguange,kati muivue vuoma nakuyoya cenu, vika vimukulia; cipue hamivila yenu, mukuzala vika. ²³ Kuyoya cahambakana kulia, kaha muvila naua uahambakana viakuzala. ²⁴ Singanyekenu makololo, kavekukuva cipue kutia. kevesi na ndzivo yakulamenamo cipue cisete cahi, vunoni Njambi ekuvalisa vakeko.Enu mualema kuhambakana tuzila! ²⁵ Iya mulienu nalizakamena nahase kuhakelako tsimbu yimo mukuyoya ceni? ²⁶ Ngue ngoco kumukuasa kulinga kacuma kakandende,muomuo vika munakuvuila vuoma havavengi? ²⁷ Singanyekenu zitemo, omu muziekukala navipamgi, cipue kuhosa. Vunoni njikuhandeka kulienu nguange,cipue Solomoni mukutsimana ceni kacazalele ngue hali cimo halievi. ²⁸ Ngue Njambi ekuzala muila uamumehia, ou uliko lelo, kaha mene vaka umbila mutuhia,kaha enu akumizika vangahi,enu muli nalutsilielo lualundende! ²⁹ Kati mutale vika vimukulia kaha vika vimukunua, kaha kati mulizakamene. ³⁰ Vaka mavu nava kalifuti vekuvitondo evi viuma, kaha isuenu naziva ngueni munakuvitonda. ³¹ Vunoni tondatondenu buangana vueni, kaha viuma viose vakamihakelako enu. ³² Kati muivue vuoma,enu vuntanga vuavundende, muomuo isuenu naviukilila kumihia enu buangana. ³³ Landesenu vupite vuenu muhie vakakuyanda.Pangenu vikuama enuvavene viakuhona kuhulika,mukale navupite viakuhona kukuma muilu muze kamuesi muizi cipue vantakuizi kuenyeka. ³⁴ Kuze kukula cikasa cove kukeko kukakala mutima uove naua. ³⁵ ''Kalenu vakulizitikila lumo vizalo kaha na cimuni cimunike, ³⁶ Kaha kalenu ngue vantu vanakutonda mukuluntu uavo tsimbu yalikufuma kucilika cakumbata,kaha vunoni ngue nahiluka ukutota hacikolo, hazevene vakumusokoluela ikeye. ³⁷ Kukisuila kuli vaze vangamba vali mukuluntu akuvauana vanakutalela kuiza ceni.vusunga njikuhandeka kulienu nguange,akulizitika ivene nakuzata kaha akatumama navo kutebulu, kaha akeza nakuvazatela. ³⁸ Ngue mukuluntu akeza mucilo camucivali cavutsiki, cipue mucilo camucitatu, nakuvauana valiviukisa, kukisuila kuli ovo vangamba. ³⁹ Vunoni ivuilinu evi,ngue mukuluntu ua ndzivo azivile tsimbi yalikeza muizi,kali kueca ndzivo yeni kuyi puzule. ⁴⁰ Liviukisenu nenu,muomuo kamukantantekeye tsimbu yalikeza muana muntu.'' ⁴¹ Petulu ahandekele ngueni, ''muangana, anakutuleka eci cisimo yetu kaha, ini kuli vose?'' ⁴² Muangana ahandekele ngueni, ''Iya napu mukakutsiliela kaha ntuamena uamana ou muangana uini akatumama hali vangamba vavakuavo nakuvahia cihanda cavo caviakulia hatsimbu yacili? ⁴³ Kukisuila kuli uze ngamba uze muangana ueni akamuuana anakulinga vize hatsimbi yalikeza. ⁴⁴ Vusunga njikuhandeka kulienu nguange akamutumamesa ikeye havikuata vieni. ⁴⁵ Vunoni ngue uze ngamba akuhandeka mumutima ueni, ''Muangana uange muzendzekesa kuhiluka ceni; naputika kuveta vangamba vava mala nava vava mpuevo nakulia nakanua nakukala vakupenda, ⁴⁶ Muangana ua uze ngamba akeza muli tangua hatsimbu yakuhona kuziva mutsimbu yalikahona kuziva kaha akamuteta ikeye muzipindi nakumukundamesa kuciheka ceni naua vakuhona kutsiliela. ⁴⁷ Uze ngamba, hakuziva visinganyeka via muangana ueni nakuhona kulivuikisa cipue kulinga kuesekesa navisinganyeka vieni, vakamuveta navikote viavingi, ⁴⁸ Vunoni uze kazivile kaha alingile muakuhona kutambuila vikote, vakamuveta navikote viavindende. vunoni vose vaze vavanehie viavingi, kufuma kuli vakeko vakavahulisa,kaha uze ivatsilieka cikuma, kuhambakana vakamuhulisa cikuma. ⁴⁹ ''Njineza nambila tuhia helu lia mavu,munjinakusinganyeka nguange vatsimika laza. ⁵⁰ Vunoni njili naluzimiko luvakanjizimika naluo, kaha vikeko ange vinjili nakuyandela kuvanga nakukukumisa! ⁵¹ Kamuasinganyekele nguenu njezile nakuneha kuunda hamavu?cahi, Njikumileka nguange,kanjanehele kahandu. ⁵² Kufuma lelo nakulutue vakakala vatanu mundzivo imo kulifumbukila- vatatu hali vavali, kaha vavali vantu hali vatatu. ⁵³ Kukakala kulifumbukila,Ise namuana kaha muana na Ise, Naye namuaneni uampuevo kaha muana ua mpuevo na Naye,Nyotomueno na Nyotomueno yeni uampuevo Nyotomueno yeni ua mpuevo na Nyotomueno yeni.'' ⁵⁴ Yesu akele nakuhandeka kuli vunga ceka ngueni,''Tsimbu mukumona liselua linakuntuntuka kufuma kumuntuntuko, hazevene mukuhandeka nguenu, 'kufukumuka cinakuiza,'kaha cekusoloka. ⁵⁵ Hatsimbu yaluhundzi luekufuma kutsulo lunakupekula,muekuhandeka nguenu,' kukukala mutana uatuima,' kaha cekusoloka. ⁵⁶ Vakakulionga, muezi kulumbununa muhekusoloka hamavu na muilu,vunoni muomu vika kamuantantekeyele kulumbununa tsimbu ino? ⁵⁷ Vika vimuekuhona kusompa haviacili enu vavene? ⁵⁸ Hatsimbu yi unakuya nou yi unalivulumuna neni kuli muka kusompesa,munjila muhulise muacili hacihande mangana kati akutuale kuli vaka kusompesa, kaha mukakusompesa kati akuhetese ove kuli tupokola, kaha Tupokala kati vakumbile mukamenga. ⁵⁹ Njikuhandeka kulienu nguange, kaukafumamo kuvanga ukafuete zimbongo ziazindende.''