¹ Vuno hanima yevi viuma, Muangana ua hanguile veka makumi atanu na vali, na kuvatuma vavali vavali kulutue luenii kumembo ose nakuvihela kuze kuazangele ivene kuya. ² Uahandendekele navakeko ngueni, ''Vimbuto vialana, vunoni vaka kutia vakeha. ngoco vundilenu Muangana mukavimbuto atume vaka kutia muvi mbuto vieni. ³ Hemenu munjila yenu. Talenu, Ange njikumituma ngue vana vampanga mukati ka tungunge. ⁴ Kati mumbate nkombe ya zimbongo, cipue mukompio cipue zinkaku, kaha kati mumenake amba umo munjila. ⁵ Ndzivo yose imukengila, mukahandeke nguenu, 'Ciyulu cikale muli ino ndzivo!' ⁶ Ngue muntu uaciyulu muali, ciyulo cenu cikakala hali ikeye, vunoni ngue cahi, cikahiluka kulienu. ⁷ kalenu muze mundzivo nkana, lienu na kunua viose viva kaviukisa,muomu mukakupanga natela fueto yeni. kati muende nakuzingluka kufuma ndzivo nakuya ndzivo. ⁸ Mbaka yose imu kengila, kaha vaka mitambuila, kalienu viose viva kamiviukisila ⁹ kaha kakanguisenu vavezi vaze kuze. kahandekenu kuli vakeko, 'Mungana vua Njambi vuneza kuhiehi nenu.' ¹⁰ Nkala limbo limu kengila kaha kava kamitambuila enu, hemenu munjila na khandeka nguenu, ¹¹ 'Cipue lukungu lua kufuma kulimbo lienu luze luekukuata kuvimbunga vuetu tuka lutotomona halienu! Vunoni muantantekeya eci: Mungana vua Njambi vuli muhiehi.' ¹² Ange njiku handeka kulienu nguange litangua lia kusompesa likakala lialipi kuhambakana Sondoma. ¹³ ndzita kuli ove Kolazine! ndzita kuli ove Mbetasainda! muomu ngue vana vilingile mu Tile na Sindone, manga valumukile laza, nakutumama na vikeleya na mu mato. ¹⁴ Vunoni haku sompa enu mukamona kupihia cakama cakuhiana cize ca Tile na Sindone. ¹⁵ Ove, Kapenama uasinganieka nguone vakaku zundula nakuya muilu? cahi, vaka kuneha hamavu ku vatsi. ¹⁶ Uze akumihalakana anjihalakane nange, uze akumi viana enu navia ange, nou akuviana nge naviana uze uanjitumine nge.'' ¹⁷ kaha vaze makumi atunu na vavali vahilukile na ndzolela, vahandele nguavo, ''Mangana, cipue vandemone vana tuononoka muli zina liove.'' Yesu uahandekele kuli vakeko ngueni, ¹⁸ ''Ange njamuene Satana ana kulahuka kufuma muilu ngue mihiato. ¹⁹ Talenu, Ange njamihie zindzili zia kuliata manoka na manieue na ndzili yose ya citozi, kaha navimo viahi viali kamilinga enu. ²⁰ Cipue ngoco kati muzolele omu vimbemesi vina miononokela enu, vunoni zolelenu muomu mazina enu vasoneka muilu.'' ²¹ Ha ola ize vene ua viukililile mumzimu ua kulela, na kuhandeka ngueni, ''Ange njami zumbangeya enu, Tata, Muangana ua muilu na hamavu, muomu viuma evi uavi suekele kufuma kuli vaka mana na kuntantekeya na kuvasola vakeko kuli vaze vava honene kulongsa, muakufua ngue vana vavandende. Mukeko, Tata, muomu muaviuka kumeso ove. ²² Viuma viose vavi tsilielele muliange kufuma kuli Tata, kaha naumo uahi nantantekeya iya Muana yanasakula Tata, kaha naumo uahi nantantekeya iya Tata yanasakula Muana na vaze Muana vana sakula kumusolola ikeye ²³ Kaha ualumukile nakutalesa kuli vandongesi zieni uava lekele kualikaliavo ngueni, ''Kuvezika vaze vali vameso akumona vimuli nakumona enu. ²⁴ Ange njiku handeka kulienu nguange, tupolofeto vavenge na miangana vekuzanga kumona viuma vimue kumona, kaha kavekuvimona, na kuivua viuma vimue kuivua, kaha kavekuvivua.'' ²⁵ Zangamenu, mulongesi ua zisimbi uakatukile mangama amueseke ikeye, kuhandeka ngueni, ''Longesi, njikulinga vati Ange amba njisuane muono uahaya miaka?'' ²⁶ Yesu ua handekele kuli ikeye ngueni, ''Vosoneka vati mumu kanda ualusimbi? Ueku utanga vati?'' ²⁷ Uamu kuaniene nakuhandeka ngueni, ''Lema Muangana Njambi yove namutima uove uose, na muono uove uose, na zindzili ziove ziose, na mana ove ose, kaha lema mumuatungila ngue ove yavene,'' ²⁸ Yesu uahandekele kuli ikeye ngueni, ''Uakuania muacili. Linga eci, kaha uku yoya.'' ²⁹ Vunoni ikeye, uazangele kuli sambesa ivene, kuhandeka kuli Yesu ngueni, ''Iya mutuatungila?" ³⁰ Yesu uamukuaniene ikeye na kuhandeka ngueni, muntu umo uafumine ku Yelusalema kusikumuka ku Yeliko. uali uanene na mihuza vamu zulile vuzalo, na kumutingula, kaha vamusile kuhiehi nakutsa. ³¹ Kaha ngue kutuluka sasendote umo akele nakusikumuka munjila ize, kaha omu muamuene ikeye, uamo kondokelele ku nkanda ikuavo. ³² Cocimolika na ka Levi naua umo muahetele hacihela cize kaha uamuene ikeye, uamukondolokelele ku nkanda ikuavo. ³³ Vunoni Kasamaliya umo, muakele nakuenda vungendzi, uezile haze hakele. Omu muamu muene ikeye uendele na cikeketima. ³⁴ Uamusuenene ikeye na mukuta ha zimbandu zieni, nakumu muaniene mazi na viniu hazimbandu. Uamu hakele ha haka nima yaka , situ, kaha uatualele ku ndzivo yava ngindzi, na kumuniunga. ³⁵ Halakaca uanonone zimbongo zivali zia palata uazi hiele ivene ndzivo, na kuhandeka ngueni, Muniunge muacili, kaha viose viukumuhia, omu Ange munjikuhiluka, Ange njikuku fueta.' ³⁶ Una singanieka iya hakati kava vatatu uakele mukuavo ua uze uali uanene namihuza?'' ³⁷ Uahandekele ngueni, ''uze uasoluesele ngozi hali ikeye.'' Yesu uahandekele kuli ikeye ngueni, ''Hamoye ukalinge mumolika.'' ³⁸ Vuno omuu muvaile munjila yavo, vakovelele mulimbo, kaha mpuevo umo lizina lieni Mata uamu tambuile mundzivo yeni. ³⁹ Uakele na ndumbueni lizina lieni Maliya, ikeye uatumamene kuvi liato via muangana na kuivuilila mezi eni. ⁴⁰ Vunoni Mata uomine mutima na vi pangi viavi vingi. Uezile kuli ikeye nakuhandeka ngueni, ''Muangana, kauomine mutima omu ndumbuange na njiseza lika liange? Ngecize muleke linga anjikuaseko ange.'' ⁴¹ Vunoni Mungana uamu kuaniene na kuhandeka kuli ikeye ngueni, '' Mata, Mata, uli na kuma mutima unakuli katiesa ha viuma via vingi, ⁴² vunoni cuma cimo catu pande. Maliya nasakula viacili, vize viva kahona kumutambula kufuma kuli ikeye.''