¹ Vunoni linoka ua vangulikile cikuma kutusitu vose va mumusenge va pangele Yehova Njambi. Ua handekele kuli mpuevo ngueni, ''Cili Njambi na handeka ngueni, 'Kati mulie kala muti ua muihia'?'' ² Mpuevo ua handekele kuli linoka ngueni, ''Tunahase kulia vusuka vua kumiti ya muihia, ³ Vunoni ha vusuka vuakumuti uli mukatikati kalihia, Njambi ua handekele ngueni, ''kati muakalioke, amba kukuatako, ngoco ukatsa.''' ⁴ Linoka ua handekele kuli mpuevo ngueni, ''Vusunga vene kaukutsa. ⁵ Muomu Njambi nantentekeya kuviuka na vupi.'' ⁶ Omuo mpuevo ua muene muti kuviuka, na kuviuka kumeso, kaha naua muti uakele uakulema kuuana mana, uambatele vusoko na kulia. kaha naua uahiele vumo kuli yalieni yakele neni, kaha ua lile. ⁷ Vose vavali meso avo emukile, kaha vantantekeyele nguavo vali vuntselentsele. Vatongele mefuo a mukuyu vose na kupanga via kuli mbandeka viavo vavene. ⁸ Vavuile cizimo ca yehova Njambi akuenda muihia mucinguezi ca litangua, kaha yala na mpueyeni vavandele kumeso a Yehova Njambi mumiti ya muihia. ⁹ Yehova Njambi uasanene kuli yala nakuhandeka kuli ikeye ngueni, ''uli kuli?'' Yala ua handekle ngueni, ''Uli kuli?'' ¹⁰ Yala ua handekele ngueni, ''Njakuvuile muihia, kaha njavuile vuoma, muomu njakele vutseletsle. kaha hanjikuvanda.'' ¹¹ Njambi ua handekele ngueni, ''Iya ua kulekele ngueni uli vutsetsele? unali kumuti unjakusikile nguange kati ukalieko?''' ¹² Yala ua handekele ngueni, ''Mpuevo iuahiele kukala nange, ua njihiele vusuka vuakumuti, kaha njalile.'' ¹³ Yehova Njambi ua handekele kuli mpuevo ngueni, ''Vika evi viunalingi?'' Mpuevo ua handekele ngueni, ''Linoka na liongele kuliange, kaha njalile.'' ¹⁴ Yehova Njambi ua handekele kuli linoka ngueni, ''Muomu unalingi eci, unapu una kusingiua ha vimuna vose nahatusitu vose va muihia. ukendela hazimo liove, kaha ukalia likungu matangua ose a muono uove. ¹⁵ Njikahaka vutozi hakati kove na mpuevo, nahakati kambuto yove na mbuto yeni. Akatika mutue uove, kahove ukamusuma kutsitsino.'' ¹⁶ Kuli mpuevo ua handekele ngueni, ''Njikalanesa kuvavala ha kusema cove vana; muvivavala mukeko muukasemena vana. ukatsa yaliove vunoni akakuyula.'' ¹⁷ Kuli Andama ua handekele ngueni, ''Muom vuila lizi lia mpuevo, na kulia kumuti, unjakusikile, nguange, 'kati ukalieko,' mavu asingiue hamulonga uove; kumilimo yakukola kukeko kuukalia matangua a muomu uove ose. ¹⁸ Vikakuimina mingonga na tundzata kaha ukalia visoka via kumiti yamumusenge. ¹⁹ Kumatukuta akumeso ove ukalia mbolo, nomuukahiluka kulivu, muomu kukeko kuuafumine. muomu ulukungu, kaha naua kulukungu ukahiluka.'' ²⁰ Yala ualukile lizina mpueyeni Eva muomu uakele naye uava kuakuyoya. ²¹ Yehova Njambi ua vapangelele va Andama na mpueyeni vuzalo vua vilambu na kuvazika. ²² Yehova Njambi ua handekele ngueni, ''Vunoni yala napu laza mucifua cetu, kuziva vuviuke na vupi. ngecize kavatela kumutavesa kuolola livoko lieni, kumbata ku muti ua muono, na kulia, na kuyoya cahiaya miaka yose.'' ²³ Ngecize Yehova Njambi ua mufumisile muihia lia endene, na kulima livu lize kuvamufumisile. ²⁴ Ngecize Njambi uafumisile yala muihia, na kuhaka selumbini kumuntuntuko ua lihia lia endene, na musukumo ua mpoko yavuvela kuvali ya kualumuna kuose, linga aniunge ndzila ya kuya kumuti ua muono.