¹ Hakuhua ca miaka itanu na ivali itanu na ivali ukecele. ² Kaha eci cikeko cifua ca kuecela: uose mukandando akecele cize cana kumuisa kuli mokuavo; kali kacitambula naua kuli mukuavo nakuli muanaye; muomu vanambulula kuecela ca Yehova. ³ Kuli ngindzi ukuasa kucitambula; vunoni nkala cuma cove cili kuli muanoko, livoko lika cela. ⁴ Vunoni, hakati kenu kati hakale cihutu (muomu Yehova vusunga akumivezikisa muci fiti cize canamihie ngue vusuna vuakupita), ⁵ Ngue ukulema na kualakana kuli lizi lia Yehova Njambi yenu, kuniunga masiko ose asikile na lelo. ⁶ Muomu Yehova Njambi akumivezikisa, mukuyula vifuti viavingi vunoni kavakatula enu. ⁷ Ngue hakati kenu hali cihutu, umo uakuli vana vanoko, mukati kankala mbelo yove mucifuti cove calikuhia Yehova Njambi yenu, kati ukalese mitima cipue kuzenga mavoko hali muanoko; ⁸ vunoni vusunga uatela kusokolola mavoko kuli ikeye kaha vusunga vuavele vianahono. ⁹ Zangemu kutina kukakala cisinganieka cacipi mumutuma uove, nguevo, Muaka uamucitanu namiaka ivali, muaka uakuecela uli hahiehi; kaha liso liove likale lialipi kuli muanoko navimo viahi viakumuhia; uatela kulila kuli Yehova haliove, kaha vunapu vupi haliove. ¹⁰ Vusunga uatela kumuhia, kaha mutima uove kauatela kulikonekela ngue ukumuhia, muomu mukuhiluisa halieci Yehova Njambi yove akukuvezikisa muvipangi viove nahaze hose hauekuhaka mavoko. ¹¹ Muomu vahutu kava kalikela mucifuti; ngoco Ange njikukusika nguange, 'Muavusunga ukamufukuile muanoko livoko, kukutonda cove, nakuli vuhutu vuove mucifuti cove.' ¹² Ngue muanoko, kaHevelu uampuevo, vamulandesa kuliove nakukupangela mika itanu naumo kaha kumua ua mucitanu na ivali ukamuece kuli ove. ¹³ Ngue ukumueca aye kufuma kuliove, kauatela kumueca aye mavokovoko. ¹⁴ Uka muhie viavingi viakufuma kulimba liove, ngue muze muanaku vezikisa Yehova Njambi uatela kumuhia. ¹⁵ Uatela kuanuka nguove uakela ndungo mucifuti ca Ingito, kaha Yehova Njambi yove akakuovola; ngoco Ange njinakukusika lelokulinga eci. ¹⁶ cikasoloka ngue akuhandeka kuliove, 'Kanjikufuma kuliove, ' muomu akulema na ndzivo yove, kaha muomu ali muacili kuliove, ¹⁷ kaha ukanone mumba nakumutuva nauo kuli tuitui liene kulipito, kaha akakala ngamba yove ua mpuevo muukalinga. ¹⁸ Kaci kakala cuma cacikalu kuliove muukamueca akaye, muomu nakupangela miaka itanu naumo na mukuouisa luvali fueto yamuka fueto. Yehova Njambi yenu akukuvezikisa muviose veuekupanga. ¹⁹ Vandala vose vasemuka kuvutanga vuove nakulimba liove ukava lelesa kuli Yehava Njambi yove. Kaupanga amba cino ngue vandala vaku limba liove, cipue kati ukateule ndala uakulimba liove. ²⁰ Uatela kumulia kumeso a Yehova Njambi yove hamuaka ha muaka mucihela cize Yehova canakusakuila ove nava kandzivo yove. ²¹ Kaha ngue ali nalipenga cimosi- kuvendutuka cupue kupuputiya - kuli Yehova Njambi yove. ²² Ukamulia mukati kazimbelo ziove; mukavisako namuka kulela vose ngue livonge na ngue ntava. ²³ Vunoni kaukalia naninga eni; uatela kumuaniena maninga hamavu ngue mema.