¹ Ngecize, omu mutuahonene kulikela caka, tuamuene kuviuka hakusala likalietu kuAtene. ² Kaha tuatumine Tito, ntsongo yetu na vakuetu mutua pangela muli Njambi hamuzimbu ua Kilistu, kukukolesa nakumi kuvendezieka kuku tsiliela cenu, ³ mangana naumo uahi akulinienga nevi vihuli. Muomu enu vavene muantantekeya nguenu vana tutonguelako. ⁴ Vusunga omo mutuakele nenu, tuamilekelele lumo nguetu ntsimbu kanda tumona kayando, kaha mukeko vene mucasolokele, ngue mu muantantekeya. ⁵ Muomu hoho vene naua, omu munjahonene kulikela ceka njamutumine mangana nguange, mangana njantantekeye lutsilielo luenu nguange yanini, hamosi muka kumieseka na mieseka laza, kaha hamosi kupanga cetu cinayi laza muangece vene. ⁶ Vonuni Tito uezile kulietu matangua onu hakufuma kulienu, haku tuzimbuila muzimbu uacili ualu ntsilielo luelo nacilemo cenu, numo mumue kutuanuka muacili vene matangua ose, nakutsila kutumona ngue omu mutuatsila kumimona naua enu. ⁷ Muomu yeci, ntsongo yetu, tuamivendeziekele enu muomu ya lutsilielo luenu, mukayando ketu na hakutsiliela cinu. ⁸ Muomu tuayoya, ngue ukukolesa muli Muata. ⁹ Muomu kutsantsela Njambi tunase kumutsantsela vati halienu hakuviukilila cose citue kuviukilila halienu kumeso a Njambi yetu? ¹⁰ Navutsiki na mutana tuekuvundila cikumakuma, mangana nguetu hamosi tukamimona ceka naua, nguetu tukahetesamo ovio vialisupuho kulutsilielo luenu. ¹¹ Kaha sikaho, Ivene Njambi yetu, Tata, naMuata uetu Yesu, volole njila yetu amba vunoni tuize kulienu. ¹² Kaha enu kuenu Muata akamese cilemo cenu cakulema umo namukuavo, ngue omu mutuekulinga etu naua kulienu. ¹³ Mangana amikamese mitima yenu nakuzila kumeso a Njambi yetu, Tata, yikakale yakuhona cuma cakuyihiela mulonga hakuiza ca Muata uetu Yesu nava kakuzila veni hamo.