¹ Muomu enu vavene muantantekeya, vamuanetu, kuiza cetu kulienu kati cangoco. ² Enu muantantekeya guenu kunima tuayandele kaha tuakele nantsoni na kayondo kuli Filipu. Tuasimpile muli Njambi yetu naku miambuluila muzimbu uacili ua Njambi na kulua ca cingi. ³ Muomu kuzimbula cetu kati cakusemuisa, cipue kumazilo, cipue kuku lionga. ⁴ Vunoni, ngue omu mutuamono muacili muli Njambi tuantsiliela namu na muzimbu uacili, kaha tukuhandeka, kati tuvuise muntu kuviuka, vunoni Njambi. Ikeye muka kueseka mitima yetu. ⁵ Muomu na tsimbu nai mo yahi imuatu uanene na mezi a kusangala ngoco, ngue mutuantantekeya, na civembulu ca cipululu - Njambi ikeye mukaleho uetu. ⁶ Katuesekele kumimbata enu cipue mukuavo umo kumulemesa etu. ⁷ Etu menga hulisile vuviuke ngue va positolo va Yesu. Vunoni, tuakele ngue mukuendzi hakati kenu ngue mpuevo akuvendezieka vana veni. ⁸ Kaha etu hakumitsila na ngozi. Katuemuene kuviuka hakumihia muzimbu uacili ua Njambi vunoni na miono yetu naua muomu tuamilemene cikuma. ⁹ Muomu enu munanuka, vamuanetu, kazi ketu na kayando ketu.Vutsiki na mutana tuakele nakupanga mangana tuhone kukala citeli kuli vamuanetu tuemiambuluila muzimbu uacili ua Najmbi. ¹⁰ Enu yenu vakaleho, na Njambi naua, muze tuatuamenene mulu enu vaka kutsiliela nakumuzakama Njambi, nacuma cakutuhielaho mulonga cahi. ¹¹ Njila imolika imua ntantekeya omo mutuakale naumo halienu, ngue tata ali navana veni, ¹² Mangana nguetu tuende ngue omu muatela Njambu, ou mukakumisana mu vuangana na muvuangana vuene. ¹³ Hakeko vene netu naua tuekumutsatsela Njambi matangua ose, nguetu ngue ukutambula mezi aze aua vuile kulietu, uatavele kati ngue mezi akufuma kuli muntu cahi, vunoni ali ngue avusunga ngue muakala, lizi lia Njambi, eli lili hacipangi muli enu muatsiliela. ¹⁴ Muomu enu, vamuanetu, enu muakele vaka kukavangeya vaka zitambele zia Njambi zize zili mu Yuleya muli Yesu Kilistu. Kaha enu naua muayandele cuma cimolika kufuma kuli vaka mafuti ngue muze muva pangele kuli vaka Yuleya. ¹⁵ Vaze vatsihile vose vavali Muata uetu Yesu na tupolofeto, nakutusekula etu. Kavamu suuluisile Njambi. Kaha, veku tangeka vantu vose. ¹⁶ Vekutukanda etu kuhandeka kuli vaka mafuti eka akavovole. kaha nakuhetesamo milonga yavo ya vupi ha matangua ose. Vunoni tsita ineza hali vakeko nomu muali keza. ¹⁷ Vunoni etu, vamuanetu, tuali hanguile kufuma hatsimbu ya indende, mukamenga kati mumitima. Tuakele vacili, tuesekele, cikuma nguetu hamosi tukamimone kumeso enu. ¹⁸ Muomu tuatondele nguetu tuize kulienu - mukeko Ange Paulu, kati kamolika cahi kavali - vuvoni Santana ikeye uatu honouesele. ¹⁹ Muomu lulavelelo luetu, cipue kuviukilila, cipue mucama ua kulisamena kulutue lua Muata Yesu kukuiza ceni? ²⁰ Muomu yenu vumpahu vuetu na kuviukilila.