¹ Nits jyäjty ku Apolo jem y´ijty Corinto, Pablo y´ijty jem nyexy jem it jotm nits jyä´áyt mëj käjp jotm Efeso nits päyoywyëtëjk jem tpäjty. ² Pablo nyëmxë: ¿mkuentëpëktë miits je wä´äts jäwën ku xtëyjyäw eedyë? Nits je wyäntë: Ke nijunë ëets nkämädoy wä´áts jäwën jye. ³ Pablo Wyääny ¿pën xyëëw këxm miits mnëpet të? Nits je wyäntë: Juan nyëpetën këxm. ⁴ Nits pablo y´ätsooy ku Juan y´ijty yëknëpety je nëpejtën ku twinmäyëmpit të tyäkoony. Je y´ijty nyëjm jeepy jääy mädi ix ojk päminjëp je´ets tyëy jyäwë dëp Jesus je. ⁵ Ku jääy tmädoodë yä´ät nits ojts nyëpet të wintsën Jesus xyëëw këxm. ⁶ Nits ku Pablo tkënixäjy jedë nits wä´äts jäwën myiiny mä jemtë nits tkäpxtë jäduk ayuujk nits näy nyäjmë ojts t´ákäpxtë. ⁷ Nimäkmetsk y´ijty je yä´ájtyëjk. ⁸ Pablo tyëjk ëëy mä yoymyuktäjk tuwëëk po´o ojts jep nä mëk kyepxy ke txyëgë tä´äwääny jets tuk tëyjyäwë Dios myëj äjtën. ⁹ Ku nidugën judíos tëjk mädiwë kämädoodë jets nyäk jyu´nëdë Nits jedë tkäoytyij äxäjtë Cristo tyu´u mä nimäy jyääy. Nits Pablo jem t´oknikeknëdë nits tpäwääy tëyjyäw eewyë jäkem mä´äm jedë nits tä´äwääny wen jäwom jep tikypy má jep Tirano y´ixpëktäjk. ¹⁰ Näjts tuuny metsk jumëjt jets nidukëyë pën jety jem tsëneedyëp jem Asia je wintsën y´ääw ayuujk äkipxy Judios mëët Griegos. ¹¹ Dios y´ijty tyumpy mëj kajenexy tyunk nyikejx jë´ëky Pablo kyëjë´m. ¹² Nä y´ijty je päyë mëét wintëy mädi tyonmetxypy Pablo jets ku yëktä´änëkx eedyë pä´ám jäáy jets ojts pyä´äm txyok këxtë jets kyäoywyë jyäwën nyiwäjtsëdë. ¹³ Jem y´ijty exorcistas Judios tyuyo´oydyë mä je área. Jets jedë nä je y´ijty Jesus xyëëw tyëktujnëdë tso këm tämädä´äktët tmëdëdët mëk äjtën tso tmumädä´äktët kyäoywyë jyäwën ku nä wyä´äntë: "Je Jesus xyëëw këxm mädiwë Pablo nyimätyekypy ixyämyë ëts mits nëjmë pitsëm. ¹⁴ Madiwë näj ädëtstëp y´ijty ni wixtujk nä y´ädëts të teety nyiwintsën myääjnk tu´uk judío mädi txëëw Esceva. ¹⁵ Nits tu´uk kyäoywyë jyäwën y´ätsojë: n´ixy ëts je Jesus jets Pablo nänyäj; ¿mpën miits të? ¹⁶ Nits je kyäoywyë jyäwën mädiwë jem yä´äytyëjk jotm nits nyi ixpujt jëëkë ätyëy jem mä´äm y´ijty exorcistas nits yëk xon yëkmätstë yëk koxpä ooktë. Yëkxon txyetxy kyëxtë nits kyektäkoydyë niwä´äts. ¹⁷ Nidukëyë ojts tnijäwëdë nä judíos mëët Griegos mädi y´ijty Efeso tsëneedyëp. Jedë txyëjk eedyë mëknexy, nits je wintsën Jesus xyëëw këxm twinysëjk eedyë. ¹⁸ Mëët nimäy tëyjyäw eewyë myintë nits tkäpx wäts kexy tukëyë käoy mädiwë të tuny. ¹⁹ Niumäy mädiwë y´ijty tum tso´oktë tyëk minkëxtë nyeky nits tëk tooy mä nimäy jyääy t´ixtë. Ku jedë twinmäy pyitsëmtë nixyën je y´ijty xyowääty je y´ijty wixtekxy myääjnk mil pujx meeny. ²⁰ Nits je wintsën y´ääw ayuujk wyäkx tä´áky mäwäät tso´om myëk äjtën këxm. ²¹ Ixyäm ku y´ijty të Pablo tyëkpuk kexy ministerio jem Efeso je ojts tniwinmäyë jäwën këxm nits nyäxt jem Macedonia mëët Acaya mä tyu´u Jerusalén. Nits wyääny: "Ku ëts jem njemët nits ëts nikxy Roma n´is ixy." ²² Pablo nimetsk tpäkejxy pyäyoywyë Timoteo mëët Erasto jem Macedonia mädi y´ijty të pyutëk etyë. Nits kë´m jem tyääny jem Asia tu´k tyempë. ²³ Tu´k tyempë ná jyääjty tu´u tujkën weenë mä jem winkon tu´u Efeso. ²⁴ Tu´k platero mädiwë xyëëw Demetrio mädiwë y´ijty yëk oy y´eepy äwonäx pujx Diana nits tänimiiny mäy negocio mädi jem artesanos tuntëp. ²⁵ Nits twäämujky mädi je tunk jyät tëp nits wyääny: "Wintsëntë, mnijäw eedyëp miits ku yäät tooky jä´äp mäy myeeny. ²⁶ Miits të m´ixtëp nits xmädowdë ku ke yä jeyë Efeso nidukëyë Asia, Yä´ät Pablo të nimäy jyä´äy yëtë äyäm jääy tyëk nëkx kexy yë nä wän ookp ku nipën diostë kyäpën ity mädi oy eepy. ²⁷ Nits ke jeyë ätsu´ux jety py ëdëm ntunk ke jyä ok yëk tsoknë näjts mëët je tsäptëjk mädiwë mëjnexy Diosa diana ke y´oktsowätnë je mádiwë tukëyë Asia mëët näxwiiny." ²⁸ Ku jedë tmädoodë yä´ät ääw ayuujk nits y´ämpëktäkoydyë kyäpxkektë wyän ooktë: "¡Më nexy je Diana madiwë je Efesios!" ²⁹ Je käjp tukëyë ke t´oknijäw eenyë nits jetyë jem nyëkxtë mä teatro. Jedë y´ijty të tmätstë Pablo myugu´uk tëjk Gayo mëët Aristarco mädiwë y´ijty tyu´u yo´y yën tyun nempy mädiwë jem mimp Macedonia. ³⁰ Txyëkypy je y´ijty Pablo tyëkët mäjyääy ägujky nits päyoywyëtëjk ke kyupëjkë. ³¹ Mëët nidugën oficiales mädiwë jep i´ijty Asia mädiwë Pabloi myugu´uk tëjk tänikexëdë tu´uk ääw ayuujk nits nyëmxëdë mëknexy jets ke tyëkët mä je Teatro. ³² Nidugën jeyë kë wiijnk wyäntë tu´uk jänidu´uk ku je nimäy jyääydyë ke y´ijty t´okniujäw eenyë. Nimäy je y´ijty mädiwë tkänijäw eepy putigëx je y´ijty të yoymyuktë. ³³ Nidugën mä je nimäy jyääydyë t´ixtë je Alejandro mädiwë judíos tëjk y´ijty nyästijë y´ookyë winjtujy näjts Alejandro kyë´ ë tyëk yo´ojy nits y´jty tjäwän wäjnë mädi y´iijty të yoymyuktë. ³⁴ Ku jedë tkuentë tuntë ku judío je y´ijty, nidukëyë äkipxy kyäpxkektë metsk horë näj tyän eedyë: "¡Mëj nexy Diana mädiwë Efesios jye´edë!" ³⁵ Ku je jäywyë mädi jem käjp jotm të y´ijty tyëk ämeny mäy jyääy je wyääny: "Miitstë yä´äy tyëjk jääydyë mädiwë Efesios, ¿madiwë yä´äy tyëjk mädiwë yä tkänijääw eepy ku yä´ät käjp mädiwë Efesios je ixy ijtën tsäptëjk mëjnexy Diana mëët je äwonäx mädiwë jem winäjk tsäpwinm? ³⁶ Ku je t´ixtë jets ntso jyäkwä´ä ntët miitstë ämenyäyë mtsëënëdët jets niti xkätuntët ädëts pekyë nyexy. ³⁷ Ku miits të xyék mintë yä´ät yä´äjy tyëjk nikyä meetspë yë mädiwë jep tsäptikypy nitkä oytyijy ëdëm Diosa. ³⁸ Jekëxëm tse ku Demetrio mëët Artesanos mädi jem myëët jegëxëm je mëët niwämpejtën mëët opyënë. Corte äwä´äts je jem procónsules mätstu´ut të wen nyänyiwëk tsow etyëdë tu´uk jänidu´uk. ³⁹ Ku miitstë x´ixtädët otyijë jäduk ayuujk jeptxyë nyi´oyët mäjep käpxmujkën tyunyë. ⁴⁰ Tëynyexyëm ëdëm n+´ijtyën ätsu´ux jotm ku ëdëm nyëk niwämpejtën ku näj të jääy nyänyiwutëgyë kä tyi´ity tigëxëm näj të jääy nyänyiwutëgyë nix kämäyty tso y´ixë ëëts nikäpxt." ⁴¹ Ku nä wyääny je ojts tmëtnäwyekxyë yoymyukpëtëjk.