¹ Jliaji iofacadawa Dio iwapacawa lrico, lriofáca niini caidalritsa Jidati Iminalri iwapácarroni. ² Nocaiteotsa no-Minalri irso cayoji: ''Icatsa Pjia, iwapacadaca njoa njite iacada njoidawa tsakja, no-Dioteca Pjia, nocadalri nocaolreo inaco.'' ³ Ima Lriyomjetacaotsa pjia iwinitacada iowepi ioya njite naoya njaji maficalri imjoacape capoaperri itaitacape inoca pja. ⁴ Lriwapaotsa pjia njite lriyomjetacaotsa pjia matsirri ioya. Picadaa picaolre lrinaco Lritaitá carroatsa Lriwapaca pjia. ⁵ Corriotsa pifió carroca cadaocadalri ifaina ikjoete, corrin tsakja nakjoete njaji iyawitacape jalrewe-ricó, ⁶ corrin tsakja nakjoete njaji yococape yajicape deepi-rico, corrin tsakja iyamikjeti ikjoete yajicape jalrewe-ricó. ⁷ Mil matsiperri jiwantja picodapitsa njite die mil jiwantja piyekema nacojle, mitsa corrin pada nanakjoite jiwa pinaco. ⁸ Icamitsa picapaca mananitsa coajica njerrapitaca njaji inaiki matsiperri. ⁹ Ima no-Minalri catsa jliaji iwapalri njoa. Ioma tsakja irsowao Dio Jlia-carro iwapa sha. ¹⁰ Corriotsa pada matsirri jipaotsa pjia; corriotsa pada jirrapitakjeti inotaotsa piipana. ¹¹ Ima lrimenaca watsa pikjaolre njaji Lri-angele nawapácarro pjia, nja carroatsa iwapa pjia nanaco njaji pinaitjalri jaredaoca icoam. ¹² Napiajletaotsa nacaapi pikjaolre pipjoácarro nanaco wadee pitodaca pjipa jiipada naco. ¹³ Pipjoa caotsa mayami yawi njite api tsakja pjipa sho; piemajicaotsa yawi kjaidaperri naco njite api naco tsakja. ¹⁴ Lripeyo capoa njoa, Noyomjetaotsani. Corri capoa lrimaca Njoa Nowapaotsani. ¹⁵ Lriwana cádanaco Njoa, Njoepaotsani. Njoa tsaotsa lrinai lrirso cádanaco aima matsirri; Nocadaotsa jliametácarro njaji matsirri njite Nonaitja watsa lrirso matsia. ¹⁶ Njite matsiá carroni Nocadaotsa lriofácarro viá jalredaoca lrico njite Nocadaotsa lriají Njoaca jliaji iyomjetani.