¹ Pjia Iminalriti, Icatsa Pjia idanatacadaca fa caidalritsa. ² Lripjeya toa pinaitjaca njaji jiipana, lripjeya toa pinaitjaca jiipai njite jliaji jalredaoca, miyacadalri catsa Pjia, ima Dioca Pjia. ³ Pidieta tsenakja njaji inaiki jiipai-carro tsenakjana, njite Picaite: ''Idienawa sha inaiki inakjoite-perri.'' ⁴ Mil onia, caotsa Picapana padaa capishotoa jalredaoca jitapawa, o padaa capishotoa deepi jiyapawa. ⁵ Piwayaketa njaji inaiki no-Minalri, Piticometana ooni sho; ima cayocana nacayosho njaji canapirri imotolriwa piyompinaco toa. ⁶ Piyompinaco neewi imotoa njite nataoñawa; njite dainomajle jiwirrina, icamitsa metacana. ⁷ Ajádalri, oopi Pino fa pirroa lrico, njite aima wafiocawa wacapa capoa pirroa. ⁸ Pideeca Picada njaji wamatsicana Pipeyajle, Picapa pjiomi njaji wamatsicana, njite Picapa tsakja pjiomi njaji wamatsicana wanaitjaji dawacalri ricó. ⁹ Fenana iocawa jlinana lrico Picadanda warso Pírroa lrico. Njite kjeyatsa pekirrica fa cayotsaji pjerra capisho pacaolrewa. ¹⁰ Icamitsa mayamica fa setenta walria, ochenda cada matsia cadatsa wadada lrico; caicayatsa aima warsoca jirrapitinaperri njite inonacalri pekirri cayamitsa fa. Ajaca, kjeyatsa waofacawa jalredaoca lrico, njite icamitsa mayamica fa. ¹¹ Corrin coca ianjí coshoca lrimacadalrica jliaji Pírroa. Cayoshopa corrin coca ifio Piwana nanaitja cádanaco namatsicanao. ¹² Cayoshopa, Pikitsindata fa wajícarro coshoda catsa lriwiaca jliaji wacafica wataitácarro waofacawa cayekja tsa jalredaoca lrico. ¹³ Picapa waikjaolre tsenakja, wa-Minalri. ¿Coancaojli pjenaotsa yami kerroaca Picapaca norso? Kjena Picapa narso njaji Pirsoperri. ¹⁴ Picadaa matsia wajiacacawa piyompinaco icoam corri capoa Pimaodacaca lrioya jliaji yácoti Pinaitjalri wapiya, wataitá carroatsa wacatimatacawa njite catimacarro waofacawa cafi cádanaco toa fa. ¹⁵ Coshoda piaca lriwiaca Pjirrapitetaca fa cayo tsakja lriwiaca Picadaa catimaca fa. ¹⁶ Picada Pirsoperri icapaca njaji Pinaitjaji, njite Picadaa wenipe icapaca Pitalricanaca. ¹⁷ Waoma matsiaca Picapaca warso, Pjia wa-Minalri Dio; Picada capedaca matsia wadejicalre; Picadaa matsiaca pjiomi wadejicalre.