¹ Caidalritsaotsa nocantaca Pirso ima Pinaitjaca norso cayoji Piaco icaite capisho warso. Nocaiteotsa coaji ajádalrica Pjia narso njaji walricomanai. ² Ima nocaiteca cayoji: ''Corrin Pitecojletaca Piaco waoya, njite corrinatsa yami carroca Pjia lrioya, cayoji corri capisho Pitecojletaca eeno iofacawa ioya.'' ³ Nonaitja yácoti lriapiya jliaji Noniwananda, nocaite pada yácoti ajádalri norsodalri David irso. ⁴ Corriotsa coancaojlica nowayaketa njaji Pinakjoitéperri, njite caidalri tsaotsa apada pinakjoitédalri italricanatacaotsa pjiapodam nanakjoite njaji walricomanai.'' ⁵ Njaji enocoma naaca matsiadalri Pinaitjaji matsiaperri ikjaote, no-Minalri, naa matsiadalri Pirso njaji iwacaacacape shenacapewa namatsicana ioya corri capoia Pitecojleta Piwaopiakje piaco ioya. ⁶ Ima ¿Capja niinica apada enolricojle Dio icayoshodalri? ¿Capja Dio shoca neenipe njaji icaitecape dionaica? ⁷ Icatsa Dio nanaitjanda irso matsia pekirritsa nawacaaca cádanaco njaji shenitaaca capewa namatsicana ioya, njite mataita canadalricani narso njaji iemacape Lricodapi. ⁸ Iminalriti, na-Diote njaji tsolrodaonai aimadan enolricojle perri, ¿Cocao irso jiida cayoji Picayosho, no-Minalri? Ima Pinaitjaca cayoji Picaite capisho. ⁹ Pjiatsa iají lrinaco jliaji ooni macapawan cafainadalri; kjaida cádanaco oniñokja, Pjiatsa iyamitana. ¹⁰ Pjiatsa ipjoa Rahab jiwida naco cayoji pada capisho inon. Picadaa napocotacawa njaji Picoema Pjida kjaidadalri sho. ¹¹ Piyapeca njaji enocoma, njite jiipai tsakja. Pinaitja jliaji jalredaoca njite pjiomi lri-ricodaperri. ¹² Pinaitja jérri iparrema atsialriema njite inarroema. Tabor njite Hermón icatimatacawa Piipitana naco. ¹³ Kjaidadalrica Pjia, corridalritsa coca itaita Pikjoete, njite kjaidadalri capoa Pjia pitaita pjirretaca picaapi yenonrse. ¹⁴ Jliaji Pitalricanaca corridalritsa imatadaca njite Pinaitjacawa lrico tsakja matsia. Jliaji ipeyokjeti Pinakjoitedalri njite jliaji corricapan Pimatada nacaite piacona Pipjeya. ¹⁵ Matsiaperrica njaji inaiki iacape Pirso matsiadalri, no-Minalri, nanaitja matsia pipeyajle. ¹⁶ Nacatimatacawa Piipitana naco jalredaoca icoam, njite matsia capoa Pjia njerreta Piipitana yenonrse. ¹⁷ Icatsa Pjia jidati macadalri ikjaidatacadana, njite Pikitsindata capoa fa picadaa famaca wacoema. ¹⁸ Ima Dio iyadaca jliaji idanatacada fa; njite jliaji watalricana lriyadacan jliaji Mamatsicanadalritsa Irael lricoda. ¹⁹ Opi pia caacoca Pjia narso njaji shepacaperri piaco ajádalri njetapon lrico capisho; piaco narso: ''Nocadaca apada kjaidadalri jiwida naco a papoco corona; Njorretandaca jliaji noniwananda nanakjoite njaji nonaikite aimadan. ²⁰ Njoatsa iniwana jliaji Norsodalri David; Noarro jliwida naco no-aceiteni matsiadalri sho Noniwana cádanaconi. ²¹ Njoa watsa icada lriemawa Njoida sho, njite Nocadaotsa jlidawa tsakja; corriotsa apada neenipe njaji matsioerrimi inaiki jirrapitetani. ²² Corriotsa pada lricoema imañetaotsani; corriotsa matsiperri yenipe jirrapitetaotsani. ²³ Nacapatsaotsa coajica nopjoaca njaji nacoema napeyajle; Noino caotsa naoyawa njaji matsiperri icapaca narso. ²⁴ lrinai catsaotsa Noaco ajádalri njite nonaitjaotsa cayoji nocaite capisho lrirso; njite jliamacaotsa lricoema Noipitana ikjaote. ²⁵ Nocadaotsa lricapi manoa naco njite lrinapa atsialriemadalri nanaco njaji ooni. ²⁶ Lriwanaotsa Noikjaolre: ''Icatsa Pjia njonirri, no-Diote njite iyomjetacaita njoa.'' ²⁷ Njite njoa Nocada tsakjaotsan cayoji Noenipe pjerriti sho, napeyonda pja nanakjoite njaji talricanatinai jalredaoca lricoperri. ²⁸ Nonaitjaotsa lrirso cayoji Nocaite capisho nonaitja caotsa caidalriwetsa; njite corriotsa coca itaita shenitaotsa jliaji yacoti Nonaitjalri lriapiya. ²⁹ Corriotsa nocadaa carroca lrinakjoitéperri iwayacacao njite caidalri catsaotsa natalricanatacaotsa njaji lrinakjoiteperri caidalriwetsa. ³⁰ Corri cadetsa njepa Noaco njaji lrienipe njite namjepata cadaa noaco inacoapanaperri, ³¹ corri cadetsa njeepa njaji nonalri nanaitjaca, corri cada nanaitja cayoji Noaco icaite capisho narso, ³² nini pedaotsa Njorrapiteta caotsana jaico sho namjepacan njite Njorrapiteta caotsana namatsicana ima iñakjeti sho. ³³ Mitsa corriotsa yamí carroca Nopeyocani caidalritsa njite nonaitja watsa njaji Nocaiterri Nonaitjaca lrirso. ³⁴ Corriotsa Nomacoadatá carroca Noacoam lriapiyadalri, corrin tsakjaotsa notecojletá carroca njaji yacoti Nocaiterri lrirso Nonoma sho. ³⁵ Nocaiteca papienirri njite caidalriwetsa icaona, yacoti ajádalri sho Nocaiteca Njoa mamatsicanadalritsa, corrin nocashataca David irso, ³⁶ corriotsa nawayacá carroca njaji lrinakjoitéperri njite natalricanata caotsa caidalritsa Nopeshete cayoji corri capisho yami jérri imotocawa. ³⁷ Corriotsa coca iyamita natalricanaca cayoji corri capisho coca iyamita kérri icanaca, njite jliaji eeno yajintsa cayoca.'' ³⁸ Mitsa Pjia, opina pimenatani njite opina pipeconi; ima kerroaca Pjia lriapiya jliaji talricanati Piniwananda. ³⁹ Opi yami Pinaitjaca cayoji Picaite capisho pia Pirsodalri irso. Opi Pimacoadata jliaji corona jliwida nacoda Pipeco cádanacon jiipai nacojle. ⁴⁰ Opina pipeco njewao yacalre iwai. Opi Pimatsiketa jliaji yacalre taimídalri nadawaca carroda lrico. ⁴¹ Pjiomi njaji inaiki jiyapajicape niini nañaitocani. Pjiomi njaji inaiki lricodapiperri nadofiacani. ⁴² Corrinatsa Pikitsindatani Pjida kjaidadalri sho lricoema ikjoete; Opi Picadaa nacatimatacawa pjiomi njaji lricoema. ⁴³ Opi pimatsica namatsetan iema njite corrinatsa Picadaa nemacawa njeponda ikjoete owi rico. ⁴⁴ Corrinatsa Pjiaca nainai; opi Picadaa mjaidaca jliaji natalricanaca. ⁴⁵ Kjeyenatsa Picadaa pekipenaica njaji yempetiapape toa. Opi Pipaimanietani matsiapen. ⁴⁶ ¿Coancaojli pjenaotsa , no-Minalri yaminaotsa Pidawacawa waoya? ¿Coancaojli pjenaoysa yami kerraca tiye sho Pirroa wanacojle? ⁴⁷ Matsiadalrica Pjia, niini piwaopia medadalri catsa jliaji nocafica, ima cayoca Pinaitjaca njaji inaiki mikjapanperritsa jalredaoca lricoperri. ⁴⁸ ¿Coca itaita iofacawa njite corritsa mayamicani? o ¿Yomjecani jliwacawacatsa mayamicalrio ioya? ⁴⁹ No-Minalri, Pinaitja pjiomi cayoji Piaco icaite capisho, Pinaitja capisho pia David irso oopi. ⁵⁰ Piwaopia no-Minalri coajica inaiki icaaca Pirsodalri ikjoete, njite nodeji nocaolre ricó coajica nacaite matsi nonaco njaji apana inaiki. ⁵¹ Matsi cacoca njaji Picoemanaipe, no-Nominalri; njite necaaca lricao jliaji Piniwananda no-Minalri, a kjerrecawajle catsa lriajiwa. ⁵² Caidalriwenatsa wacaiteca matsia wa-Minalri naco. Cayoatsa, cayoatsa. Cuatro shopa paperra.