¹ No-Minalri, Picañjatenina nacapa coajica Pikitsindataca njaji Pinaikite aimadan; Pimatsietjenina Jacob iofácarro matsia tsenakja. ² Pjiyapetjenina pioyao namatsicana njaji Pinaikite; Pitjenina pioyao pjiomi namatsicana nanaitjada Pikjoete. ³ Corritsa kerroaca Pjia nakjoete; opina pjieneta naoya Pirroa matsinadalri. ⁴ Pjia, wa-Diote imanacotacada fa, Piwalridalrita fa, njite ajena matsi Picapaca warso. ⁵ ¿Capja caidalritsaotsa kerroaca Pjia wapiya? ¿Capja kerroa catsaotsa Pjia napiya njaji walricomanai? ⁶ Pinaitja matsiacalri warso pinaitja matsia tsenakja warso. Nininaotsa catimacaotsa Pikjaote njaji Pinaikite aimadan. ⁷ Mamacatsa fa ima cayo pia Pinaitjaca yácoti wapiya, wa-Minalri, Piyomjeta fa Pinaiwa. ⁸ Njomiwatsa coajicaotsa no-Minalri Dio icaiteca norso, niniotsa Lricada naofa namaodacatsa njaji Lrinaikite, njaji corripetsa imacani. Mitsa corrinatjaotsa napieta nadiacawa njapodamrsewa tsenakja naofa caojli pia najicaperrim sho. ⁹ Ajádalri tsomica naoya Lriyomjetácarrona ima nafioca Lriiwana; nininaotsa Lricadaa nacapa jlia catsa nainai naofacawa lrico. ¹⁰ Corriotsa Dio imacá carrocana njite Lrinaitjaotsa cayoji Lricaite capisho narso; njaji inaiki nanaitja watsa matsia cayoji Dio ioma capisho njite Lricadaotsa naofácawa imaodacakjeti ricó njaji inaiki. ¹¹ Corriotsa wamacá carroca Dio jalredaoca lrico, njhite matsia watsa Dio icapaca warso eeno lrikjoite niniotsa Lricadaa warso shamakjeti. ¹² Ajaca, wa-Minalri icadaotsa barso Lrimatsiaca, njite matsiawatsa wapania wapanaji fepaite ricó. ¹³ Dio imatsiaca iawatsa Lripjeya lricaitécarro Lriacona matsia Lriocaca ipjeya.