¹ Ajádalri matsiadalrica jliaji Dio naapiya njaji Iraelnai, naapiya njaji inaiki irsocape nacaolre mapirrádalritsa. ² Mitsa njoa, wadepe nopjoaca pajlaimi, wadepe yamica nocadaca nocaolre DIo naco ³ matsiada capoa nocapaca narso njaji padalreperrimi nocapa capoa matsiaca naacawa nadejicalre naco njaji inaiki matsiperri. ⁴ Ima corrin coancaojlica naji icaiyati naco caitsa naaca mayamina. ⁵ Ima corrin coancaojlica canacaica narso nanaco njaji canacaiperri narso njaji apjetsida; corrin njerrapita, njerrapita capisho njaji apjetsida. ⁶ Na patjepica jliaji napadalreca njite natsayani shoca jliaji mamatsicana apjetsidas irso. ⁷ Corri capoa nataita najiacacawa matsia namatsicana ima; niini nawaketaca narsowao aima iwaopiakjeti matsiperri nacaolre ricó. ⁸ Necaa apjetsida iicao njaji padalreperri, njite nafieta njaji apjetsida imatsicanati sho njite njerrapitetana. ⁹ Caacocana maatsi eeno Iminalri ikjoete, njite naji nacaitepe nanacowacatsa matsiaperricana pjiomi najicawa lrico. ¹⁰ Ninina njaji Dio inaikite nadia tsenakja jalredaoca lricojle Lrioya, njite narsoca aima naijaope njite nairraope tsakja. ¹¹ Njite naaco: ''Corriotsa Dio yajícarroca nanaco njaji wanaitjalri. Corriotsa Lriajícarroca jliaji Yenonrsedalri Pja pjiomi ioya wanaitjanada inaco. ¹² Idana nanaco yajícarro: inaiki matsiperricana; corrin coca nacoca njeta nacaolre, njite narsoca aima pja nayarroaji. ¹³ Wadepe mekjapan catsa nowapaca nocaolre matsidalri ioya cocaotsa lrimatsiaca norso njoena cadawa imatsicanati ioya. ¹⁴ Ima jalredaoca icoam njorrapitaca njite njerrapiteteca njoa piyompinaco icoam. ¹⁵ Cayo minitsa cadantja cacoca njoa, opipienantja noma nanaitjaca namatsicanao njaji Pienipe walricoma nai. ¹⁶ Noma cadanatja noajica coamishopaca njaji nocapalri, ima jirrapitinaca noyana. ¹⁷ Njite noawa Dio iipana lricojle ikena noajica a kjerrecaotsa lriocawa. ¹⁸ O Pjia catsa icadaa corricawatsa ipjoa matsia; Pjiatsa icadaa corri carrotsa lrirso lriyarro. ¹⁹ Njite nawayacao kjeya pjiomi njaji lrirsolri. Nawayacawa pjiomi njite cafaina pacapaca nawayaca cádanacoa. ²⁰ Cayotsa na pacapa capisho pjetapon ricó; no-Minalri Pjirreta cádanaco njoa, corriotsa nowaopiacarro nanaco njaji jitaponti. ²¹ Njite nocaolre jirrapitaca pekirritsa, njite aima namatsiketaca nocaolre ricó cayoji lrirso capisho lricaolre. ²² Majicadalrim piaca njoa; canacai piaca norso yajikjeti; cayo piaca njoa maficalri sho Pipeyajle. ²³ Mitsa, Pinai catsa njoa; Pjiatsa ikitsindata njoa Pjida kjaidadalri sho. ²⁴ Pikitsindata njoa Piaco matsiadalri sho njite Picoada njoa Pimatsiaca melremelredalri ricó. ²⁵ Icamitsa Pjia norsolrica enolricojle. Corrin pacapa apada jalredaoca lrico noomanda cayoji noma capisho Pjia. ²⁶ Mjaida kena nodada njite nocaolre tsajha, mitsa Dio ikjaidataca nocaolre ricó caidalriwetsa. ²⁷ Nawayacacaotsawa njaji tecoperri Pioya; Piwayaketacaotsa pjiomi njaji inaitjacape maatsi Pioya. ²⁸ Mitsa njoa, nooma notsomita pjaca Pjia. Nocadaa nocaolre apadatsa Dio naco. Nocaiteotsa njaji Dio inaitjanipe inaco padenirri.