¹ Dio, ¿coadadao caidalritsa pimenata fa? ¿Coada Pipojlieta pirroa nakjoete njaji oveja pi-corrarran lricoperri? ² Piwada nanaco njaji Pinaikite aimadan, njaji Piwentaji oopi ricotsa, nja poco njaji Piyometaji Piyarrope carrona, njite Picadaa naofacawa jiipana Sión nacó, piofalri niini. ³ Pino Picapa coajica namatsiketaca wayacalre, oopi namatsica pjiomi jliaji Piipana Matsiadalri njaji jipondati. ⁴ Njaji Picoema nanaitja cayoji kerroa capisho yaawi, Piipana lrico, njite nacada natsidape niini nacaite shopa njaca shamana niini. ⁵ Naoca yoca sho pjiomini njaji Piipana lricope cayoji paoca capisho njaji jaico awacada lricope. ⁶ Yoca sho njite martillo sho tsakja naoca njewao pjiomi njaji nanaitjaji matsiaperri. ⁷ Namjaita Piipana; nanaitja matsi Piofacawa lrico ima opioca napeco jliwao jiipai nacojle. ⁸ Naaco narso njaji inaiki: ''Wawayaketacaotsa pjiomina.'' Namjaita pjiomi njaji yenondalripe nacawa pia matsiadalri Pirso Pjipaite lricoperri. ⁹ Corrinatsa wacapa njaji Pinaitjaji matsiaperri; corrinatsa pacapa njaji inoparrotacaperri, njite corrin apada wanakjoite yanji coancaojli caotsa lriwayacawa jliaji. ¹⁰ ¿Coancaojli pjenaotsa Dio, Pipeco watsa njaji icaitepecape maatsi Pinaco? ¿Capja caidari catsaotsa cacocaotsa matsi Pinaco njaji Picoema? ¹¹ Picadena nacapa Pjida kjaidadalri. ajena Piaca natsayaniwa pjida sho, Pinoenana pjiomi. ¹² Mitsa njoa, no-Talricanaca Dio miyaca lrikjoitetsa, Lrideeca manacocalri jalredaoca lricojle. ¹³ Pimjeco pia ooni macapawan Pjida sho; Piino pia njaji egipcionai paino capisho njaji maficalri macanepe ooni lricope. ¹⁴ Piino njewida naco njaji maficalri macanepe ooni lricoperri Leviatán-perri iipitana; njite Picadaa naiñjao njaji maficalri jalrapoco lricoperri. ¹⁵ Pimjeco naapowao njaji ooni jiwidapao njite oonipai yarrocawa lrico tsakja; Pimetata tjakja ooni macapeki aima cawa jiipa. ¹⁶ Piyadaca njaji jalrewerrico njite njaji deepi tsakja; Picadaa jérri icanaca jalrewerrico njite kérri deepi ricó. ¹⁷ Pjiatsa icadaa a kjerreca naocawa njenana njaji jiipai naoyawaca; Pjiatsa inaitja camoi njite oonia tsakja. ¹⁸ Piwaopia coajica caacocana maatsi Pinaco njaji Picoema, no-Minalri, njite coajica cacoca matsi Piipitana naco njaji inaiki majicaperrimi. ¹⁹ Macadatsa Pinaikite Iraelnai narso njaji inaiki yawi shoperri kerroacana. Macadatsa nañacawa Piwaopiakje ioya njaji Pinaikite aimadan njaji jirrapitacape caidalritsa. ²⁰ Piwada coaji piaca Pinaitjaca yacoti napiya, Ima pjiomi njaji cadaocawa lrico aima nainoca inaiki niini. ²¹ Macadatsa njeyapacawa ipaimanti ricó njaji njerrapitetaji; Picadaa naaca matsiadalri Piipitana irso njaji kenaperri njite njaji canacaiperri irso tsakja. ²² Pjinicoenawa, Dio; njite pinaitja matsia Pinacowacatsa; Piwaopia coajica namacadawalretaca Pjia njaji najicaperri jalredaoca icoam. ²³ Macadatsa njeyapacawa pioya coajica naaco Pinaco njaji Picoema, njite coajica naomaca neemaca Pikjoete njaji inaiki matsiperritsa.