¹ Dio, kjena picapaca njoa, pimatsiaca naco; ima pinaitjaca aima njaji matsiaperri ima kjena capoa picapaca narso, pjiata noora njaji nonaitjaji maatsi. ² Pideeca noya pjiomi nomatsicana njite pjita noya ojiomi matsirri nocaolre ricope. ³ Ima noaji matsia coajica nomacoadatalrica ikjaote piaco, njite corrin notaita nomaodacaca naoya njaji nomatsicana. ⁴ Pikjoete, icamitsa pikjoeteca nonaitja nomatsicanawa, nonaitjaca njaji corri-perritsa matsia picapaca irso; corrin Pimatacada nanaco njaji picaiteri caaco cádanaco Pjia; corrin Pimatadaca picaite cádanaco wamatsicana. ⁵ Picapa, jico njoa imaytsicanati ricó; njodoa imotoita cádanacotsa njoa, ikena norsoca imatsicanati. ⁶ Panaya, Pioma ajádalrica njoa nocaolre ricó; ima nocaolre rikjoiteca Picadaotsa noají-carro yajíkjeti. ⁷ Pimapirrataca njoa matsirri ioya, njite icamitsaotsa mapirraca njoa; picotso nocaolre, njite icamiotsaotsa jalre caotsa nocaolre cayoji itamana sho. ⁸ Picada njomica itimati njite catimacalri ima picoyolretaca nocaolre pekirritsa. ⁹ Mawaopiatsa nomatsicana naco njite pjita pjiomi njaji nomatsicana. ¹⁰ Dio, Pinaitja nocaolre walridalri maopitjadalri, njite piwalridalritaca nowaopiakje wade nomatada minicatsa. ¹¹ Mjetatsa njoa Piofacawa lrikjoite, njite mjetatsa jliaji Caolriti Mamatsicanadalritsa Pinakjoitedalri noya. ¹² Pidieta tsenakja norso jliaji itimati piyomjeta capoa njoa, njite piwapaca njoa pipomenata njoa nocaolre ricó. ¹³ Nininaotsa nocantacaotsa njaji imacoadatacaperri piaco coajica pioma wanaitjaca pirso, njitenaotsa njaji camatsicanaperri napadametacaotsa nacaolre nadiácarro naoma Pjia. ¹⁴ Pjiyapeta pioyao jliaji imatsicanati nonaitjalri pirso nomacapoa apada ipecoca lrirrana, Pjia Dio iyomjetacaita njoa, nowana caotsa kjaida catima capoa nocaolre matsia capoa Pinaitjaca. ¹⁵ No-Minalri, Pia iyecati nonoma lrico notaitá-carro cacoca matsia njoa pinaco. ¹⁶ Corrin catimaca Pjia naikjaote njaji maficalri wainolri mana pirso, ima cayo cadantja, opipienantja nonaitja cayo; corrin tsakja nacatimata Pjia njaji ofrenda wamjaitanda Piorso. ¹⁷ Njaji jirrapitakjeti icatimatalri Pjia icatsa jliaji yajiacacadawa corricatsa cocacani Pipeyajle. Pjia Dio, corrin pjienetaca pioyao njaji inaiki caiwiperri iaca inaco nanaitja capoa matsi njite coyolreca nacaolre ricó naikjaote. ¹⁸ Pinacodalri capoa matsiadalri, pinaitja matsia Sión irso; pjirreta tsenakja Jerosalén iwaiwa. ¹⁹ Nininaotsa Picatimatacaotsawa nanaco njaji jirrapitacaperri imatsicanati ioya, nanaco njaji maficalri wamjaitaji Pirso, njaji ofrenda iwayacalri imacawa pjiomi; ikenaotsa njaji wakitsiñape aimadan namjaitaotsa pirso toro Pi-altarni naco.