¹ Jliaji Dio Kjaidadalri, IMINALRITI, caacocani njite Lriwanaca jliaji jiipai jérri imotolri njite jliewalri nirse pjiomi njaji inaiki jalredaoca lricoperri. ² Jiipana Sión nakjoite, Lrimatsiaca matsiadalri, Lricanaca Jliaji Dio. ³ Lrinoca waikjaolre jliaji wa-Diote njite corrin Lrimacoitaca waoya; tiyé imjaita Lripeyajle, njite caolri kjaidadalrica Lriwaida naco. ⁴ Dio iwanaca pjiomi njaji iofacape eenolricojle njite njaji jalredaoca lricoperri nanócarro nacapa coaji caotsa Lricaiteca naacona njaji Lrinaikite aimadan: ⁵ ''Piwaketa Norso njaji norsoperri ajadalriperri ipeyoca Njoa, njaji inaitjacaperri yacoti Noinai njerrapitacarro noikjaote.'' ⁶ Njaji eenocoma nacaite matsiadalrica, ima Dio catsa icaite naacona. ⁷ Jimi norso, sha nonaikite aimadan, caacocaotsa Njoa, icatsa Dioca Njoa, i-Diote. ⁸ Nocoitaca pjia corrin naikjaoteca njaji maficalri inoji Norso; caidalritsa imjaitaca nopeyajle njaji maficalri. ⁹ Cotsa Njotácarroca apana toro piipana lrikjoite, o apana cabra atsiana picorrarran lrikjoite. ¹⁰ Noyapeca pjiomi njaji maaficalri awacada lricoperri, noyapeca pjiomi njaji vaaca jalredaoca lricoperri. ¹¹ Noají coshoapaca njaji wipjiarro awacada lricoperri njite njaji maaficalri njite Noyapeca pjiomina. ¹² Caiwi cadantja norso mawitacai, corri tsakjantja nocaiteca pirso; ima Noyadaca jliaji jalredaoca, njite pjiomi njaji lriricodaperri. ¹³ Cotsa noiñjaca toro iipe, corrin tsakja noirraca cabra írrana. ¹⁴ Idé Norso maficalri inoji iá shopa Norso matsiadalri, njite icaoña jliaji icaiterri icaoñaca Lrirso jliaji Yenonse-dalri Pja Pjiomi ioya. ¹⁵ Iwana Njoa aima cádanaco irso njaji jirrapitinaperri; No manacotaotsa pjia, njite pia watsao Norso matsiadalri.'' ¹⁶ Mitsa narso njaji maatsiperri inaiki, Dio icaite narso cayoji: ''¿Coadantja picaitepe Noaco naco njite jliaji yácoti Nonaitjalri iapiya, matsi cadana pjimica njaji Nomalri pinaitjaca njite corrin piomaca pjiepaca Noaco, ¹⁷ corri capoa pioma pjimica coajica Noma pinaitjaca njite pimenata Noaco. ¹⁸ Pacoaca piwaopiakje picapa cádanaco apada keñaitedalri; njite pjia tsakja nainai njaji inaitjacape maatsi nadada sho naino o nainirri ioya. ¹⁹ Picadaca pinoma matsidalri irso, njite picashataca pinoma sho. ²⁰ Piofa picaitepe maatsi pikitsinda ikjoete; pinaitja ishati macádalri pjidoa yenipe ikjoete tsa. ²¹ Pinaitja njaji nocaiterri, njite macotsa njoa, njite piwada cayodalri catsakja Njoa picayosho. Mitsa Nocitaca pjia lrikjaote, njite nodecaotsa pikjaolre nacoada njaji pinaitjalri picapácarro. ²² Piwaopia matsia nanaco njaji nocaiterri, pjia corridalritsa coadaca irso Dio, corri cada pjiepa jliaji Nocaiterri pirso, noino caotsa pjia, njite corriotsa pacapa apada itaitacada imanacotaca pjia Nooya. ²³ Lriaca matsiadalri Norso jliaji inocada maficalri Norso, njite pjiomi njaji inaitjacape pada iwaoipioakjeti matsiadalri naa tsakja Norso matsiadalri, Nocañjataotsa piají-carro manacotaca pjia Dio iinai.''