¹ Jimi jliaji nocaiterri, pjiomi sha inaikinai aimadan jalredaoca lricoperri; iwapa jimi matsia, ² njaji tjewacajleperri njite njaji yenonperri, cayarroaji perri njite kjenaperri padenirri. ³ Cacocaotsa njoa nonoma sho yajikjeti naco njite njaji nowaopialri inaco nocaolre ricó nacadaotsa yajícarro nanacoapana. ⁴ Nowapaotsa njomi matsia noicaowa nanaco njaji pajishopa; noinitaotsa jliaji pajishopa nocaiterri inaco arpa nakjoite. ⁵ ¿Coadantja nofiowa naiwana njaji jalredaoca matsiperritsa, nayofieta cádanacoatsa njoa njaji nocoema? ⁶ ¿Coadantja nofiowa naiwana njaji icadacape icaolre njaida nacowacatsa njite nacada tsakja nacaolre nayarroaji aimadalri naco. ⁷ Ajádalri corrica pacapa apada itaitacada iwentaca Dio ioya lrikitsinda, ⁸ corrin pacapa palrata pataitá-carro pawentaca apada icafica ima cacoadacani, njite corrin pada itaita icaoñaca wadewecalre apada irso. ⁹ Corrin pada itaita yofacawa jalredaoca lrico caidalriwenatsa njite corrintja mayamicani. ¹⁰ Icamitsa mayamiope-cafa padenirri. Mayamitsa jliaji cajikjedalri; cayo tsakja njaji matsilriperrimi njite jliaji marsocadalri aima iwaopiakjeti, mayamica pjiomi njite nacadaa na-ricoca apjetsida irso. ¹¹ Nawada pia nacaolre ricó corricaotsa coancaojli watsa mayamica njaji nakitsiñape, njite nayacalre tsakja, njite pjiomi njaji nanakjoite-perri; nacada njepaite iipitanawa najishopana. ¹² Niini jliaji atsia aimadalri iparatani, corriotsa lriwada corricaotsa mayamini; ima cayocatsani nacayosho njaji maficalri mayamirri tsakja. ¹³ Icatsa cayoji nawayacacawa njaji icadacaperri icaolre nanacowacatsa, njaji iacaperri matsiadalri nanacowacatsa. ¹⁴ Narso njaji inaiki cayoperri, cayocanaji nacayosho njaji iwapacaperri oveja idee capisho irrirri lricojlena. Njiaji matsia perritsa inaikica, nja watsa italricanata nanaco jalre cádanacoenaotsa naicao, njaji matsiaperritsa inaiki njawatsa shamana, njite mjaida kenaotsa nadada lrico niini lriaca lriwayacawa irrirri lricojle, njite corriotsa a kjerre carroca lria lriofa lrioya njite. ¹⁵ Mitsa Dio iyomjetacaotsa njoa irrirri ioya; Jlia watsa icoadata njoa. ¹⁶ Mafiotsawa picapa cádanaco ricoca pioya apada, njite picapa cadaa aimaca matsiaperri lripana lricope. ¹⁷ Ima mayami caojliotsani, corriotsa cocá carrocaotsa lrideeca nanakjoite, corriotsa lriyarro iorroco caotsa lriinai irrirri lrico jliapodam. ¹⁸ Catimaca lriofacawa cafi cádanaco toani, njite njaji inaiki caco matsia lrinaco aima capoa lrinani. ¹⁹ Icamitsaotsa mayami caotsani jlinirrinaipe sho, njite corrinatsaotsa lridiá carroca cafini jalredaoca lrico tsenakja. ²⁰ Jliaji irsocada aima palrata mitsa corrin lrirsoca yajikjeti, cayocaniji navcayosho njaji maficalri, icamitsa mayamicani.