¹ Matsiadalrica jliaji wa-Minalri, jliaji idanatacada njoa cayoji jiipada sho, jliaji iyekjetacada nocaapi oowi icaona, wadee mapjica njaji nocapjiwida noinoaca cádanacoa. ² Icatsa inaitjacada yacoti noapiya corridalritsa imatada, nodanaitaca Pjia, jliaji nowacalri yapjite, Jliaji icadacada njoipa yapjite njaji apacoa inaiki. ³ No-Minalri, ¿cocao jliaji inaiki Pirso ima corrica Pimaodaca lrioya, o cocao jliaji inaiki yenipe Piwaopiacarro lrinaco caidalritsa? ⁴ Caidalritsa jliaji atsia lricayosho jliaji caolri pjersanda panacoa; cayotsa lriwiaca lriofacawa jalredaoca lrico iyadaoca jiyapa capishotsa. ⁵ Picadaa eeno iorrococawa jiipai nacojle, no-Minalri; Pinota njaji jiipana njite itacati imotócartro naoya. ⁶ Piyawita Piyawitjioco sho, Picadaa tsakja eeno kjaidaperri napitócarrto macadatsa njaji Picoema. ⁷ Pipiajleta picaapi eenolrikjoite; Piyomjeta njoa manoa ioya, njite naoya njaji inaiki corripetsa noají coamperricana. ⁸ Cacocana ishati nacotsa, njite pjiomi njaji narsolri icamitsa narsocana ishati sho. ⁹ Nocantaotsa Pirso walripeki canción; nocaite matsia Pinaco nocanta cádanaco arpa sho irsocada yamema pacaapi iñada. ¹⁰ Jliaji iyomjetacada njaji talricanatinai nacoema ioya, Jliaji iyomjetacada Lrirsodalri David namatsetan ioya njaji inaki matsiperri. ¹¹ Piyomjeta njoa, njite Piwataca njoa naoya njaji apanatsa inaiki. Ima cashaperricana, njite pjiomi njaji narsolri icamitsa narsocana ishati sho. ¹² Picadaa kjaidaca njaji wenipe cayoji jaico kjaidaperri sho, njite Picadaa njaji waitonaipe nacayosho njaji jaico yemacape pamoyoa panti macade irso, icadacape panti imatsiacao. ¹³ Njite Picadaa pakjamica jliaji panti itawajle wacadacawa lrico iñjaodati pjiomi iñjaodati ioyawaca sho, njite Picadaa aima nenipeo njaji wapirra oveja naofacawa lrico. ¹⁴ Njite njaji buey narsoatsa aima nenipe. Corriotsa coca itaita jiyapawa wayacalre idana ioya; corriotsa nadecarroca wakitsiñape nayacalre ioya njite corriotsa njemata carroca nafio capoa njaji inaiki. ¹⁵ Matsiaperrica njaji yacalfre cayoperri irsoca njaji matsiaperri; catima-perrica njaji yacalre icadacape Iminalritica na-Diote.