¹ No-Minalri, Pjimi notatjaca piinai; Pjimi coajica notatjaca piinai caiwi-ricotsa. Ajádalri capoa pjia njite inaitjacaitaca matsia Pjia, Pjiepa njoa. ² Pinaitja matsiacalri, manaitja toa maatsi pirsodalri irso lrimatsicana ikjaote, ima corrin pacapa apada mamatsicanadalritsa Pipeyajle. ³ Jliaji nocoema yanji ioma njoa lrinaitjácarro norso matsi, lridoitena njowawa jiipai ricó; lricadaa nofacawa aima walria cadaoca-werrico naofacawa lrico njaji mayamperrimi. ⁴ Mjaidakena njoa matsinaa; corrinatsa notaitaca noají. ⁵ Nowada mana coaji piaca oopi; nowaopia nanaco njaji Pinaitjaji; nowada mana coaji piaca pinaitja pitaitácarro pinaitjaca pjiomi. ⁶ Nopiajleta nocaapi Pikjaolre notatja cádanaco Piinai; ima nomaca Pjia matsinaa lri-ricoda jliaji jiipai metadalri ricó. ⁷ Pjiepa kjeya njoa, no-Minalri, ima mjaidakena njoa. Madawatsa Piecoa noya, ima mayami caotsa njoa corri cada Piocapa njoa. ⁸ Picadaa njomica Piaco matsiadalri naco deepi toa, ima nocadaca nocaolre Pinaco. Picañjata nocapa coajica pioma nofacawa cayoji Pioma capisho. Ima norreta nowaopiakje Pikjaolre. ⁹ Piyomjeta njoaya njaji nocoema, no-Minalri; njoecoa Pikjaolre piwapácarro njoa. ¹⁰ Picananta njoa noajícarro nonaitjaca njaji Piomalri nonaitjaca Pirso, ima no-Dioteca Pjia. Picaolrini matsiadalri ikitsindata njoa noajícarro matsia anji jalredaoca lrico. ¹¹ Nominalri, Ipeyocaita capoa Pjia, macadatsa mayamica njoa; Pi matsiaca sho, pjita njoa jirrapitinaperri ioya. ¹² Corri capoa Pimatada Piacoam naco, piino noya njaji nocoema njite piwayaketa pjiomi jipondatacape njoa, i ma Pirsodalrica njoa.