¹ Noa watsa matsiadalri Iminalriti irso pjiomi nocafica sho, No-Minalri Dio, Ajádalri macadalrica pjia; Talricanatica pjia irsocada tsaya melremelredalri. ² Piñampacawa camarrai sho ima tsaya capisho pirso; Pitiota njaji eenocoma cayoji patiota capisho plastico papanaitawa. ³ Pinaitja Piipanao yenon iyadaoca iocacawa naco; njite iyadaoca idee Piipana canani cádanacona; Piajicawa caojli kjaidaperri naco. ⁴ Lricadaa caolri idecaope lriaco, njite lricadaa njaji tiyé kerraperri Lrirsoperri carrona. ⁵ Jliatsa icadaa jiipai iofa carrodawa, njite corriotsa coancaojlica cananica njiteni. ⁶ Picada pia ooni itaca jliaji jiipai cayiji tsaya ita capisho padada; ooni iita pia tsakja njaji jiipana yenonperri. ⁷ Cáco cádanaco pjia kjaida, ikena nadiacawa njapomrsewa njaji ooni; nadia napitowa njemi cádanacotsa Piaco kjaidadalri imaolrena. ⁸ Njenicoa njaji jiipana, njite njaji jiipai pacoacaitacawa naa naofawa akjerreca picada naofácarroa. ⁹ Picada narso njenana imacaiteca iocacawawa nacoana, corridalritsa nataita njeyapetaca; niini jliaji ooni corrinatsa coancaojlica napieta watsa naitaca jliaji jiipai tsenakja. ¹⁰ Lricadaa ooni yamarracawa onipao lrico yamarracapewa jiipana ipecolrico naocá carrowa ooni macapeiki nacojle. ¹¹ Icatsa nairraca pjiomi njaji maficalri awacada lricope; njaji borro mapirracanaperritsa icatsa nairraca ooni nini. ¹² Njite ooni inomapi rico wipjiarro inaitja narropocoa; njite nacantaca jaicoki nakjoite. ¹³ Lricadaa ooni yarrowa Lriwaketacawa lrikjoite ooni enolricojledalri. Aima njaji matsiaperri Lrinaitjalri jalredaoca lrico. ¹⁴ Lricadaa malritsi itaoñawa naiñjacarro njaji maficalri, njite Lricadaa tsakja paniati itaoñawa inaiki yapan+a carroatsa nanakjoite lritaitácarro lrirsoca lriñjaope. ¹⁵ Lrinaitja tsakja jaicotjeda iana icatimadacaoda inaiki jalredaoca lricoperri, Lrinaitja tsakja aceite naiñjetacarro nadada naco, njite Lrinaitja tsakja iñjaodati cafishopa njaji cafiperri. ¹⁶ Wa-Minalri iarro aima ooni iyao naco nanaco njaji lripania, Njaji cedronape Lriapanampe Libano lrico. ¹⁷ Icatsa wipjiarro inaitjaca narropoco nanaco. Njite nanaitja tsakja naofacarrodawa jaico cipre naco njaji wipjiarro. ¹⁸ Njaji nérri naofacawa jiipana ipolrico naco; njite nanaco njaji jiipana yenomperri icatsa nanaitjaca naofacarrodawa njaji conejo awacada lricoperri. ¹⁹ Lrinaitja jliaji kérri lrikjenanatácarro coajica lriacawa jliaji jalredaoca; njite jliaji jérri lriaji coajikena lrirsotsa jliewacawa. ²⁰ Pinaitja cadaoca jliaji deepi, niini cayo cádanaco namotoa njaji maficalri iofacape awacada lrico. ²¹ Njemata kjaida njaji yawi naají cádanaco naoma nawiniwa, natajaca Dio iinai Lricarro naiñjawa. ²² Jérri imoto cádanacoena naikjaolre, ikena nácawa nemácarro nárroda lrico. ²³ Njite njaji inaiki, naa nadeji njite yami nadejica a kjerreca deepi naicao. ²⁴ No-Minalri, Pjiatsa inaitja pjiomi njaji pacapalri, njite Piajícarrom pinaitja pjiomi njaji Pinaitjalri; aima njaji Pinaitjaji jalredaoca lrico. ²⁵ Picapa jliaji manoa pinaitjanda, tjewacadalricani, macaite, pakjandalri nasho njaji iofacape lri-ricoda, maficalri tsoperri njite macanepe tsakja. ²⁶ Icatsa najicawa lri-ricoda njaji varco macafianipe, njite nini tsakja lriofacawa jliaji maficalri macani Leviatán dalri iipitana,m jliaji maficalriu Pinaitjanda Pitopitaoda iapiya manoa lrico. ²⁷ Pjiomi njaji maficalri nawapaca Pjia, nawapa Piaca naiñjao. ²⁸ Nawacacawa pjiomi njaji maficalri Piá cádanaco naiñjao; njite naiñjaca njaji matsiaperritsa Picadalri naiñjacarro. ²⁹ Pidawa cádanaco Piecoa naoya, ikena inonacana; njite corri cádanacoetsa pia naijao, icamitsa mayamicana njite nadia tsenakjawa jiipaiwa. ³⁰ Mitsa Pipjiá cada caolri Pinakjoitedalri, icamitsa walriperrica tsenakja pjiomi jalredaoca lrico. ³¹ Dio imatsiaca iofacaotsawa caidalriwetsa, Dio icatima taaca carroatsa naapiya njaji Lrinaitjaji pjiomi. ³² Lricapa cádanaco jiipai nacojle, icamitsa lritetjecawa; Lrinota cádanaco njaji jiipana ikena itacati imotacawa naoya. ³³ Nocanta catsaotsa no-Minalri irso caafi cádanaco toa njoa; nocaite caotsa matsia no-Minalri naco nocanta cádanaco lrirso caafi cádanaco toa njoa. ³⁴ Noma Dio icatimatacawa nasho njaji nowaopiakje; ima icamitsa jliaji icatimatalri njoa. ³⁵ Picadaa nañacawa jalredaoca ioya pjiomi njaji camatsicanaperri, corri carroenatsa pacapa njaji inaitjacape maatsi. Noa matsiadalri Iminalriti irso pjiomi nocafica sho. Iá matsiadalri Iminalriti irso.