¹ Pjiomi nocafica sho, nocaolre rikjoit noa matsiadalri wa-Minalri irso, noa matsiadalri Lripitana matsiadalri irso. ² Noa matsiadalri wa-Minalri irso pjiomi nocafica sho, njite nowadaca pjiomi njaji Lrinaitjaji matsiaperri. ³ Jliyapeta waoya pjiomi wamatsicana; Lrimatsieta fa pjiomi warrena ioya. ⁴ Lriyomjeta fa mayamicalri ioya; Lrinaitja matsiacalri warso cayoji lricaite capisho Lrinaitjaca warso kjena capoa lricapaca warso. ⁵ Lricada aima matsiaperri canacaiperri warso cafi cádanacotoa fa, corrin lricadaa pekirrica pjia kjeya njite lricadaa kjaidaperrica fa cayoji perri irsocada jlida walridalri tsenakja. ⁶ Matsiaperri minitsa Lrinaitjaca jliaji wa-Minalri njite Lrinaitja tsakja matsia narso njaji njerrapiteteaji. ⁷ Lricadaa Moise iají coajica lrioma panaitjaca Lrirso, njite lricada nají nanaco njaji lrinaitjalri, najícarro njaji Iraelnai inakjoiteperri. ⁸ Kjenadalrica icapaca pja jliaji wa-Minalri njite corrin Lrinaitjaca maatsi parso; Iwapacadaca wia; corrin Lrimacoadtaca lriacoam lrinaitjanda waapiya. ⁹ Corrin jlirrapitetacantja pja caidalritsa; corrin Lriocawa kerroa caidalritsa. ¹⁰ Coajidalri cadaa wamatsicana cayotsa Lrinaitjaca warso, coshodalri cadaa wamatsicana cayotsa jlirrapitetaca fa. ¹¹ Icapa coshodalrica lritecoca jliaji eeno jiipai ioya, icatsa lrimacadalrica jliaji ipeyokjeti Dio irsolri nanacojle njaji inaitjacape cayoji lrioma capisho. ¹² Cayoji natecoca capisho naoyawaca jliaji jérri imotolri njitewa njite jérri shewalri nirsewa, corridalritsa wají natecoca naoyawaca icatsa cayo natecoca Dio ipeco waoya wamatsicana. ¹³ Cayoji kjena capisho apada jinirriti icapa lrienipe irso, cayo tsakja kjena Dio icapaca narso njaji inaitjacape cayoji Lrioma capisho. ¹⁴ Ima lriajintsa coaji piaca Lrinaitjaca fa; Lriajintsa jiipai catsa fa. ¹⁵ Njaji malritsi kjeyaperritsa iofacawa jalredaoca lrico, icatsa cayo naofacawa jalredaoca lrico njaji atsianai; lritaoñawa cayotsaji malritsi iiwi itaoña capisho. ¹⁶ Caolri ipjia cádanaco naikjaolre, icamitsa lriñetacana, njite corrin apada itaimitsa icaiteca coancawa piaca lritaoñawa. ¹⁷ Mitsa Miyacaca jliaji yacoti Dio icaiterri Lrinaitjaca narso njaji ipeyocapeni. Njite lrimatsiaca iyacawa nanacojle njaji nadakenai. ¹⁸ Njeepa Lriaco njite nanaitja cayoji Lrinaa capisho nanaitjaca. ¹⁹ Dio icadaa lriofacarrodawa enocoma iicao lricojle, njite Lritalricanataca pjiomi naco. ²⁰ Iá matsiadalri Iminalriti irso, sha Lri-angelenai, sha kjaidaperri, irsocape itaitakjeti njite inaitja cayoji Lriaco icaite capisho, shepacape lriacoam imaolrena icaite capisho. ²¹ Iá matsiadalri Iminalriti irso, pjiomi sha lrirsoperri imaimaca enolricojleperri, Lrirsoperrica sha inaitjacape cayoji Lrioma capisho. ²² Iá matsiadalri Iminalriti irso, pjiomi sha lrinaitjanipe, pjiomi lritalricanata cawa lrico. Noa watsa matsiadalri Iminalriti irso pjiomi nocafica sho.