¹ Pjimi norso notatja cádanaco Piinai, no-Minalri; Pjimi coajica noiyaca pirso. ² Madawatsa piecoa noya coancadanaco njorrapitaca matsidalri ikjaote. Pjimiotsa norso nowana cádanaco pjia, kjeyaotsa pjiepaca njoa. ³ Ima kjeyadalritsa jiyapacawa jlkiaji nocafica, njite noaji nodada cayoji lrimacapishoa tiyé sho. ⁴ Aima njotaca nocaolre, njite cayoca njoaji merri capisho malritsi. Corrinatsa noma noiñjaca. ⁵ Mepenatsa njoa corri capoa yami noiyaca icaiyati ikjaote. ⁶ Cayoetsa njoa popolri sho iofacadawa jalrapocolri ricó, awado sho iofacadawa pantiarrom lrico. ⁷ Nocoa cádanaco no-amaki ricó, corrin notaita nomaaca, cayoca njoaji wipjiarro sho yajicadawa padatsa panti naco. ⁸ Jalredaoca icoan nacoitaca njoa njaji nocoema; njaji icacape noicao nacaite noipitana nacaitécarro yacoti matsiperri. ⁹ Noñjaca palripokjoa iñjaodati capisho njite noirraca lrinaco notjiafia tsa. ¹⁰ Pírroa matsinadalri ikjaote, pjirreta njoa yenonrse picadácarro nowawa njiteo. ¹¹ Iyadaoca shotsa nocafica, jliaji kjeyadalritsa iwayacacao, njite opina merri njoa cayoji merri capisho malritsi. ¹² Mitsa pji, no-Minalri, corrin coancaojli mayami Pjia, njite cacona catsa pjia caidalriwetsa narso njaji walricomanai. ¹³ Pjinicoatsawa njite kjenaotsa picapa Sión irso. Icatsa jlinanaca panaya kjenacawa picapaca Sión naco; icatsa lriocakenawa jlinana panaya. ¹⁴ Njaji pirsoperri njepaca nacapi ricó njaji jiipada matsiaperri lrinacoperri njite kjená nacapaca coajica namatsiketacani. ¹⁵ Njaji inaiki jalredaoca lricoperri nafio watsa Piipitana ikjoete, noMinalri, njite pjiomi njaji talricanatinai jalredaoca lricoperri nawatsa matsiadalri Pimatsiaca melremelredalri irso. ¹⁶ Wa-Minalri jirreta tsenakjaotsa Sión njite nacada tsenakjaotsa nacapa coandalricani. ¹⁷ Jliawajli watsa, Jliepaotsa lritatjanda naco jliaji kjenadalri; corriotsa lrimenatá carroca lritatjanda lriinai. ¹⁸ Wadana lrinaco najícarroatsa coaji piaca njaji walricomanai, njite njaji inaiki corri petoa imoto icapa jalredaoca, nacaotsa matsiadalri Dio irso. ¹⁹ Ima Lricapjenina matsiacawa lrikjoite, enolrikjoite waMinalri icapa jalredaoca nacojle, ²⁰ jlimícarro coaji nacajacawa njaji napresotaji, lriyomjetácarro njaji nacaiteji inaco mayamícarrona. ²¹ Niniotsa nacaiteotsa Dio iipitana Sión lrico njite nacataotsa lrinaco jerosalén lrico ²² nawacaaca cádanacoatsa njaji inaiki aimadan njite njaji talricanatinai nadejícarro wa-Minalri irso. ²³ Jlita njoida njonana ipjeya toa. Lrimedataca nooya jalredaoca. ²⁴ Njite noaco cayoji: ''Pjia no-Diote, madetsa njoa njonana ipjeya toa; Pjia catsa nainai pjiomi njaji walricomanai nja cádanaco jimao. ²⁵ 5Miyaca lrikjoite Picada jiipai iofacawa lriofa carroda nacotsa; njite njaji enocoma, icatsa pinaitjajica picaapi sho. ²⁶ Mitsa nawayacacaotsawa, mitsa Pjia corriotsa Piwayaca carrocawa; ima naacaotsa pekipenaina cayoji yamacati sho, njite pipeco caotsana cayoji papeco capisho yamacati opiperrina, icamitsaotsa nawayacacawa. ²⁷ Mitsa Pjia, Pjia catsaotsa; corriotsa coancaojli piwayacacawa. ²⁸ Corriotsa mayami carroca njaji Pirsoperri yenipe, njite nanakjoiteperri naofa caotsawa Picodapi.''