1 Iaca matsiadalri Dio irso, itatja Lriipitana naco; Icada naji Lrinaitjanipe nanaco pjiomi jalredaoca lrico. 2 Icanta Lrirso, icaite matsia Lrinaco icantanda lrico; icaitepe nanaco njaji Lrinaitjalri matsiaperri. 3 Matsia yajiacacawa Lripitana Mamatsicanadalritsa ikjaote; Catima icaolre sha iomacape Dio icaolre rikjoite. 4 Ioma irsowawa Dio njite Jliida tsakja; ioma Dio caidalritsa. 5 Iwada nanaco njaji lridejicalre macadalripe njite matsiaperri, njite iwada tsakja njaji yacoti Lricadalri irso; 6 sha Lrirsodalri Abraham inakjoiteperri, sha Jacob yenipe, Lriniwananipe Lrirsowawa. 7 Jliaji wa-Minalri Dio, Jliatsa italricanata pjiomi jalredaoca lrico Lriaco sho. 8 Mil comanai cadantja jiyapawa, corrin Lricadaa nañacawa njaji yacoti Lricaiterri pia irso. 9 Lriwadatsantja njaji yacoti Lricaiterri pia Abraham irso, jliaji yacoti ajádalri Lricaiterri Isaac iapiya. 10 Cayo Pia Lricaite Jacob irso, yacoti nanaitjaoda, Lrinaitja shopa yacoti Irael iapiya corridalritsa iwayacawa. 11 Lriaco pia: ''Noá watsa pirso Canaán jipaite nakjoite piyadawa.'' 12 Tso piacatoa namaimaca jliawajli, pana inaiki corripetsa nají njaji iofacape niini. 13 Naawa pada jiipai nakjoite pada nacojle njite, njeyapawa pana italricanaca lrikjoite pada nacojle. 14 Corrin Lricadaa nanaitjaca narso maatsi; Jlirrapiteta njaji talricanatinai naikjaote. 15 Lriaco nanaco cayoji: ''Manotatsa njaji Noniwananipe, njite manaitjatsa maatsi narso njaji inoparrotacaperri noyarrope.'' 16 Lricadaa mawitacai njepaite ricó, corrin Lricadaa naiñjao. 17 Lrimeenaca ape atsia napeyajle; José lriipitana, nawendenta narso natrsodalrí carroni. 18 Napapi taimi jlipa, njite nacadaa tsipalra jamiñadalri lriwedalrico cayoji lripatjepi capisho, 19 a kjerreca jlinana iocawa Lrinaitjácarro lriapiya cayoji Lrioma capishoena, njite Dio íwi pioacani Lriaco sho. 20 Talricananti imenaca lrirsoperri nawatacá carroni; yacalre iwapashona icada lrimotoa. 21 Lricadani jliacarro iwapa lripana njite jliácarro yají nanaco njaji lrirsonipe lripana lrico 22 lricanatácarro caconaperri yenipe cayoji lrioma capisho njite lricanantácarro yajikjeti naco narso njaji caconaperri pekipenai. 23 Cayotsa Irael iocawa Egipto lricojle, Jacob iofawa kjeya pjatsa Cam jipaite lrico. 24 Dio icada nataoñacawa njaji Lrinaikiote, njite lricada kjaida pjacana naoya njaji nacoema. 25 Lricadaa matsi nacoema icapaca Lrinaikite irso, njerrapitetácarro njaji Lrirsoperri. 26 Lrimenaca naikjaolre lrirsodalri Moise njite Aarón tsakja, njaji lriniwananipem. 27 Nanaitja manaitjacanaperri egipcionai icapao, Lricañjata Jlida matsiaperri Cam jipaite lrico. 28 Lrinaitja cadaocádalri njite Lricadaa cadaocá cawa lrico jliaji jiipai, mitsa njaji Lrinaikite corrin njepa Lriaco. 29 Lripadameta irranatiwa naonite njite mayami pjiomi njaji copje lriricodape. 30 Lripakjanta njepaite paitsi sho, pjiomi nemacawa lrico njaji talricanatinai Egipto lricope. 31 Caconi njite icamina dolrio njite mapirri ipakjantaca pjiomi njepaite. 32 Lriyamita iyao njepaite ioya, njite Lricada iyao jipada shoperri jiwacawa njepaite rico, njite tiyé tsakja. 33 Lrimatsiketa naoya nakiníkerre pjiomi napania; lripeco njewao njaji jaicolrima Egipto. 34 Caco tsenakjani, njite icanina tsacarra ipakjanta njepaite ricó, aima tsacarra jiwacawa njepaite ricó. 35 Naiñja pjiomi napania njepaite lricoperri. Naiñja pjiomi paniati imotocapewa jiipai naco. 36 Lrino pjiomi njaji pjerritinaipe njepaite ricó, njaji inicape neenipeca. 37 Njitedalri Jlita njaji Lrinaikite, Lricadaa nadeca aima palrata njite owirro tsakja; corrin pada nanakjoite njaji Lrinaikite poco natoda njaipa nacayao inipo lrico. 38 Metam najiacacawa njaji Egipto lricoperri nacapa cádanaco nacawa naoya, ima nafio piaca naiwana. 39 Lricadaa iyadaoca naicao nadanao, njite Lricadaa tsakja tiyé icanacaoda nanaco deepi ricó. 40 Njite njaji iraelitanai natatja naiñjao Lriinai, njite Lrimenaca narso corrowao njite Lricadaa naiñjao petje enolrikjoite-perri, njite naiñjaca kepinapena. 41 Lrimakja jiipada, njite ooni imotocawa lrioya; lriamarra njite onipao sho jalrapocolri ricó. 42 Ima Lriwaopiaca jliaji Lriacoam matsiadalri Lricaiterri pia Lrirsodalri Abrham irso. 43 Catima namotocawa Egipto lrikjoite njaji Lrinaikite, njaji Lriniwanampe. Njemata kjaida nacayao catima capoana. 44 Lria njepaitewa njepaitemi njaji apanatsa inaiki, njite njepaca nayarroa nayapem njaji apjetsida inaiki 45 Dio inaitja narso cayo nataitácarro njepaca Lriaco matsia, nanaitjacarro cayoji Lrioma capisho nanaitjaca. Iá matsiadalri Dio irso.