¹ Caaco jliaji Iminalriti Moise irso njite Aarón irso tsakja. Lriaco narso: ² ''Iniwetaotsa njaji atsianai Coat inakjoite-perri Levitanai inakjoite-perri, naapana icoam njite coandalrica naferrimi. ³ Iniwetaotsa pjiomi njaji atsianai irsocape trenta walria ipekirrica nakjoite atee njaji irsocape cincoenta cinco walria napekirrica nacojle. Njaji atsianai, narsotsaotsa naaca nadeji nainai iwacaaca-carroda lricojle. ⁴ Njaji Coat inakjoiteperri, narsotsaotsa nawapaca matsia pjiomi njaji Njoenitaji Norsowao matsiaperri iwacaaca-carroda lricoperri. ⁵ Imatsietaaca cádanacoatsawa yacarro pjawa ipjeyajle; Aarón njite njaji lrienipe njeewaotsa njeewaotsa iwacaaca-carroda lrico njetá-carro jliaji yamacati máca idanatacada jliaji corricawatsa pacapa imatsicanaati njite lrishotsa jliaji yamacati máca naitaotsa jliaji patowana, Yácoti yárroda. ⁶ Itaotsa jliaji patowana maaficalri íya matsiaperri sho. Njite ipecoatsa lrinaco yamacati jipolre máca. Shetaotsa jlinacolrico njaji jaico iwakje shopani. ⁷ Ipeeco tsakjaotsa yamacati jipolre máca lrinaco jliaji mesa lriofacawa jliaji peetje nacadanda Dio ipeyajle. Njite lrinaco jliaji yamacati jipolre máca icadaotsa njaji parrato, cucharaitape, poncherapipe njite nárroda tsonipetsa nárro shopa mana njaji ofrenda nadejῖ mana. Corritsa dekja shenitaca jliaji peetje mesa ioya. ⁸ Itaotsani yamacati írrai máco sho njite lrinacó, ipeeco tsenakja maaficalri íya matsiadalri. Shetaotsa jaico mesa jinacolrico iwakje shopani. ⁹ Njepaotsa yamacati jipolre máca naita shopa jliaji camarrai jirricona njite njaji lampara, njepaaca carrona, parratoita macaapi, njite pjiomi njaji lampara iitada yarrodape. ¹⁰ Irsotsaotsa icadaaca njajilampara njite njaji lridakipe maaficalri íya matsiadalri ricó, njite icadaotsana ideecarroda jamiñadalri ricó. ¹¹ Ítaotsa jliaji altar owirrona yamacati jipolre máca sho. Njite ipeco paotsa lrinaco maaficalri matsiadalri, njite shetaotsa jlinacolrico jaico iwakje carrona. ¹² Jipaotsa iñampa pjiomi njaji idejishopa Noopana lrico yamacati jipolre máca sho. Iñampa pjaani maaficalri íya matsiadalri sho njite iorrocoetaotsana idecarroda lrico jamiñaperri. ¹³ Jitaotsa pjiomi tiyepokoam altar ioya njite iñampaotsani yamacati amolre máca sho. ¹⁴ Njite iorrocoetaotsana idecarroda lrico jamiñaperri pjiomi njaji idejishopape altar nacó, njaji lridaana jalrajalradalri, ketsane, palaitape, poncherapipe, pjiomi njaji idejishopa altara nacó. Ítaotsani maaficalri íya matsiadalri sho jliaji altar njite shetaotsa jlinacolrico njaji jaico iwakje carronani. ¹⁵ Njite Aarón lrienipe yapiya nataita cayamina namatsietaca, naita cayami pjiomi jliaji Dio iofacawa lrico njite pjiomi lrinaanipe, njite nadee carroenani naacarroa, ikenaotsa nánoca njaji Coat inakjoiteperri nadé-carroenani. Njite nanota cadaa njaji lriitada mamatsicanaperri, mayami caotsana. Icatsa nadejicalreca njaji Coat inakjoiteperri, nadeeca pjiomi njaji nawacaaca-carroda lrico inaanipe. ¹⁶ Eleazae, sacerdote Aarón irri, icatsaotsa jliaji icapalrica matsia catsa na-camarra iitada, incienso potiyaperri, njaji napania ínaca naoda ofrendawa, njite jliaji aceite naiñjetashopa inaiki nacó. Lriwapaotsa lricapa matsia pjiomi jliaji nawacaaca carroda, njite njaji lriitada lriwawalricope, Dio iofacawa lrico njite pjiomi lriitada tsakja.'' ¹⁷ Caaco Jliaji Iminalriti Moise irso njite Aarón irso tsakja. ¹⁸ Njite Lriaco narso: ''Macadatsa namatadacawa njaji Coat inakjoiteperri poco wadentja Nowayaketacana naoya njaji Levitanai. ¹⁹ Iwapaotsana, wadee mayamicana dajicalre ikjaote, natsomita cádanaco njaji nonanipe matsiaperri, ²⁰ corrin nataita njeewacawa nofacawa lrico corrin tsooca, wade mayamicana. Niini Aarón lrienipe yapiya watsa njaji shewalriwa lri-ricoda, njenaotsa icadaa nadejicalrewa nacoana njaji coatitanai, idejikjeti naicaonada catsa.'' ²¹ Caaco tsenakja Jliaji Iminalriti Moise irso tsenakja. Lriaco lrirso: ²² Panaya pidana neepitana njaji Gerso inakjoiteperri, nanakjoite njaji naferrinaipemi, njite naapaneta. ²³ Iniwetaotsa pjiomi njaji atsianai irsocape trenta walria ipekirrica nakjoite atee njaji irsocape cincoenta cinco walria napekirrica nacojle. Njaji atsianai, narsotsaotsa naaca nadeji nainai iwacaaca-carroda lricojle. ²⁴ Icatsaotsa nadejicalreca njai gersonitanai, nadeji calre nacasha cádanacoa. ²⁵ Njaa watsa idee njaji yamacati máca nawacaaca-carroda lricope, lritapjé, lriwaipe,njaji waaficalri íya matsiaperri lriicaoperri, njite njaji yamacati mácape lripananoma nacoperri jliaji nawacaaca-carroda. ²⁶ Njaji yamacati lriyacalrcoa iwai nacoperri, lripananoma nacoperri, tsoomidalritsa nawacaaca-carroda ioya,altar ioya tsakja, lriñadape njite pjiomi lricaonaperri. Coca cadaa nadejirri niini, njaa irsotsa inaitjaca. ²⁷ Aarón lrienipe yapiya watsa icaite njaji gersonitanai poco coajicaotsa nadejica nanaco njaji naderriotsa, pjiomi idejikjeti nacó. Pjia watsa icaite coca caotsa nadejirri. ²⁸ Icatsaotsa njaji idejirrica nanakjoite njaji gersonitanai poco iipaneta nawacaaca-carroda nacó. Itamar, sacerdote Aarón irri watsa idejirri naapiya nadeji cádanaco. ²⁹ Piniwetaotsa njaji Merari inakjoiteperri naapaneta icoam, coca piaca naferrinaipe iipaneta, ³⁰ Iniwetaotsa pjiomi njaji atsianai irsocape trenta walria ipekirrica nakjoite atee njaji irsocape cincoenta cinco walria napekirrica nacojle. Njaji atsianai, narsotsaotsa naaca nadeji nainai iwacaaca-carroda lricojle. ³¹ Icatsaotsa nadejicalreca nawapaope nawacaaca-carroda lrico. Nawapacaotsa nawacaacacarroda ípje, jliecolrena, lri topjirre, neema-carro poco, ³² cosoca njaji lriyacalre coa iwai ípje, neema-carro poco, napapi carronape, lriiñadape, njite pjiomi lricaonaperri. Pidanaotsa narso pjiomi njaji naderriotsa. ³³ Icatsa nadejicalreca njaji Merari poco inakjoiteperri iipanata, jliaji naderriotsa nawacaaca-carroda nacó, coajica Itamar, sacerdote Aarón irri inaa nadejica.'' ³⁴ Moise, Aarón njite njaji nawapaji yaapiyawanai naniweta njaji coatitanai inakjoiteperri nanakjoite njaji naferrinaipemi. ³⁵ Naniweta njaji irsocape trenta walria ipekirrica nakjoite njite njaji irsocaperri cincoenta oonia ipekirrica. Naniweta pjiomi njaji idejicaope nawacaaca-carroda lrico. ³⁶ Naniwetana do mil seteciento cincoenta atsianai naapanetada lrico. ³⁷ Moise, Aarón yapiya naniweta pjiomi njaji atsianai coatitanai poco iipaneta lricoperri njaji idejicaope nawacaaca-carroda lrico. Nanaitja cayo, njeepa capoa jliaji Dio inaalri nanaitjaca Moise nakjoite. ³⁸ Naniweta njaji Gersón inakjoiteperri, njaji naapana lricoperri, njite njaji naferrinaipemi iipaneta nanakjoitepe. ³⁹ Naniweta njaji irsocape trenta walria ipekirrica nakjoite njite njaji irsocaperri cincoenta oonia ipekirrica. Naniweta pjiomi njaji idejicaope nawacaaca-carroda lrico. ⁴⁰ Niini naniwetacana do mil seiciento trenta atsianai, naapanaeta nacope njite naferrinaipe iipaneta nakjoitepe. ⁴¹ Moise, Aarón yapiya naniweta pjiomi njaji atsianai Gersón poco iipaneta lricoperri njaji idejicaope nawacaaca-carroda lrico. Nanaitja cayo, njeepa capoa jliaji Dio inaalri nanaitjaca Moise nakjoite. ⁴² Naniweta njaji Merari inakjoiteperri, njaji naapana lricoperri, njite njaji naferrinaipemi iipaneta nanakjoitepe, ⁴³ naniweta njaji irsocape trenta walria ipekirrica nakjoite njite njaji irsocaperri cincoenta oonia ipekirrica. Naniweta pjiomi njaji idejicaope nawacaaca-carroda lrico. ⁴⁴ Niini naniwetacana tre mil dociento atsianai, naapanaeta nacope njite naferrinaipe iipaneta nakjoitepe. ⁴⁵ Moise, Aarón yapiya naniweta pjiomi njaji atsianai Merari poco iipaneta lricoperri njaji idejicaope nawacaaca-carroda lrico. Nanaitja cayo, njeepa capoa jliaji Dio inaalri nanaitjaca Moise nakjoite. ⁴⁶ Moise, Aarón njite njaji nawapaji yaapiyawanai naniweta njaji Levitanai naapaneta lricope naferrinaipemi inakjoiteperri. ⁴⁷ Naniweta njaji irsocape trenta walria ipekirrica nakjoite njite njaji irsocaperri cincoenta oonia ipekirrica. Naniweta pjiomi njaji idejicaope nawacaaca-carroda lrico, nadee carrona njite nawapa-carro tsakja pjiomi njaji lriitada. ⁴⁸ Naniwetana ocho mil quiniento ochenta atsianai. ⁴⁹ Dio inaacalre ricó, Moise iniweta njaji atsianai padape, njite a kjerreca lricadaa nadejica nacoana. lriniweta tsakja cocacaotsa idenjikjeti jliaji nanjerri inaco. Nanaitja cayo, njeepa capoa jliaji Dio inaalri nanaitjaca Moise nakjoite.