Capítulo 5 - Napeecopjiomi njaji corriperritsa matsiacana naofacawa ioya
1
Caaco jliaji Iminalriti Moise irso. Lriaco lrirso:
2
''Imotoetaotsa iofacawa ioya pjiomi njaji irsocape irrenati nadada nacó, cayaoni-perri corri petsa yaawawa, njite njaji maatsiperrimi nanota capoa mayamperrimi.
3
Atsia cadaa o ínarro cadaa, irsotsa imotoeta cana ioya iofacawa lrikjoite. Corrin nataita namatsiketaca iofacawa lrico, ima Noofaca iinani niinio.''
4
Njaji Iraelnai nanaitjatsa cayo. Namotoetana pjiomi njaji carrenaperri naofacawa ioya, Dio inaa capisho nanaitjaca Moise nakjoite. Njaji Iraelnai njeepa njaji Dio inaalri nanaitjaca.
5
Caaco tsenakja Dio Moise irso, Lriaco lrirso:
6
''Picaite narso njaji Iraelnai. Pada atsia o apama ínarro cadaa inaitja imatsicanao pada ikjoete, njite lrimacaca Njoa, jliaji inaiki lrirsotsa lricaoñaca jliaji lrimatsicana.
7
Niini lrirsotsa lricaiteca lrimatsicanaa lrinaitjalri. Lrirsotsa lricaoñaca pjiomi lrimatsicana ikjaote, njite lrirsotsa lricadaa pjaaca lrinacojle. Lrirsotsa jliacana lrirso jliaji lrinaitjalri irso maatsi mikjapantsa.
8
Mitsa jliaji inaiki lrinaitjanda irso corri cadaa lrirso lrikitsiñape tsoomi lrioya itaitacape naaco irso njaji nacaoñashopani, lrirsotsa lriaca lrimatsicana icoada Norso sacerdote nakjoite, njite lrisotsa jliaca apana carnero lripiyo shopa lrimatsicana.
9
Nacoana njaji ofrenda nanda njaji Iraelnai, njaji nananipe njenitaji, nadeji sacerdote irso njaji Iraelnai, lriyapecana jliaji sacerdote.
10
Pjiomi njaji ofrenda nadenda njaji Iraelna, lriyapecana jliaji sacerdote; Njite coca cadaa iá sacerdote irso coca catsa, lrirsotsa lriaca lriyarro nakjoite.''
11
Caaco tsenakja Dio Moise irso, Lriaco lrirso:
12
''Picaite narso njaji Iraelnai cayoji: njite cawilre cadaa rsoaji ínarro roinirri ioya, ronaitjaca maatsi rodaki sho pada iapiya roinirri ioya.
13
Njite ape atsia idakita roapiya. Cayo cádanaco, icaamitsa maatsica rsoaji ínarro corri cadanatsa roinirri icapano o lriajicantja lrinaco jliaji ronaitjalri, njite corri cadatsa coca icapano ronaitja cádanaco maatsi, njite corrin coca yaji romatsicana nacó,
14
njite pada ikaolreti ikerriakjeti nacó icadaa lriaji jliaji roinirri maatsica rsoajilriino. Mitsa jliaji ikaolreti ikerriakjeti nacó papiape corrin lricaite ajádalri sho lrirso jliaji atsia lriino nacó lricaite cádanaco lrirso maatsica rsoaji lriino.
15
Cayo cádanaco, jliaji roinirri lrirsotsa lrideeca lriino sacerdote ikjaolre, njite lrirsotsa lrideeca tsakja apjeco nairranda ofrenda sho rorsodalriope. Lrirsotsa lridee tsakja yamada kilo harina cebadape. Corritsa lriarro carroca aceite nanaco, corrin tsakja incienso ima pada ofrenda napia iinaca nakjoite ikerriakjeti naco, paniati iinaca nakjoite cadaa jliaji ofrenda lricaite shopa niinica imatsicanaati.
16
Jliaji sacerdote lrirsotsa lrideecano tsoomi lricadá-carro roemawa Dio ipeyajle.
17
Ikena sacerdote irsotsa jipaca ooni njenitanda matsiadalriwa lriarroda lrico njite lritaipe nawacaaca-carroda lricoda. Lripecoatsa jliaji lritalripe ooni ricó.
18
Sacerdote icadaotsa rsoaji ínarro Dio ipeyajle njite lriwataca caotsa rotsicolre irroa rsoaji ínarro rsowida nacope. Njite lricadaotsa rocaapi rico njaji ofrenda napania iinaca, njaji paniati ínaca ikerriakjeti nacoda. Jliaji sacerdote jlipaotsa lricaapi ricó jliaji ooni jiipitiajai imalri cantja maatsicano.
19
Jliaji sacerdote inaotsa rocaiteca yaacoti ajadalri sho, lricaiteotsa rorso cayoji: ''Corri cadatsa ape atsia idakita piapiya, corrin pinaitja maatrsi pínirri irso njite corrin maatsica pjia, niini corriotsa lridee carroca pinacojle maatsidalri jliaji ooni jipitiajai.
20
Mitsa rsoaji ínarro, ronaitja cadaa maatsi roini ioya, njite maatsi cano, ape atsia idakita cada roapiya,
21
niini pedaotsa jliaji sacerdote inaotsa rocaiteca yacoti ajadalri sho ideecaoda ronacojle mátsirri, njite lricaite pjaotsa coajica. JLIAJI IMINALRITI ideotsa pinacojle mátsirri njite njaji inaiki aimadan nacapaotsa coandalrica jliaji imatsicanaati. O corricaotsa Dio icadaa kenipeca pjia njite pienipjiarroda ishacaotsawa.
22
Jliaji ooni ideecada mátsiperri shewaotsa piñjajiarroda lrico njite lrimaotsa pienipjiarroda ishacaotsawa niini corriotsa keenipé carroca pjia.'' Njite rsoepaotsa rsoaji ínarro: ''Ajã, picadaa noirrani, njite ajãdalri camatsicanaaca njoa.''
23
Njite sacerdote idanaotsa paperra macapjai ricó pjiomi njaji imatsicanaati, njite lricotsoatsa njaji imatsicanaati lridanaji paperra naco ooni jipitiajai ricó.
24
Sacerdote icadaotsa roirra jliaji ooni jipitiajai ideecada mátsiperri. Niiniotsa jiipitica pjiomi rodada lrisho.
25
Njite sacerdote jitaotsa rocaapi rikjoite njaji ofrenda paniati ínaca nacope ikerriakjeti nacoda. Njite jlirretaotsa Dio ipeyejle jliaji ofrenda paniati ínaca njite lrideotsano altar nacojle.
26
Sacerdote jipaotsa lricaapi pema lrico njaji paniati iinaca inacope ofrendape pjiomi capisho, njite lrimjaitaotsana altar nacó. Njite lricadaotsa roirrao jliaji ooni jipitiajai.
27
Lria cádanaco roirrao jliaji ooni, njite maatsi
cadatsano ronaitja capoa romatsicana roinirri ikjoete, niiniotsa jliyapaotsa rowawa lrico jliaji ooni ideecada mátsidalri ronacojle njite jiipiti caotsano. Camalrena caotsa roenipjiarroda niini corriotsa rotaita keenipecano. Maatsidarro caotsa rsoaji ínarro royacalremnanai ipecolrico.
28
Mitsa corri cadaa camatsicanaaca rsoaji ínarro, niniotsa corritsa maatsi carrocano. Rotaitaotsa rorsoca roenipe.
29
Icatsa yacoti kjaidaperrica ikerriakjeti nacope. Icatsa yácoti kjaidaperrica nanaco njaji inaitjepe imacacape nainirri njite maatsicano lrikjaote.
30
Icatsa yacoti kjaidaperrica lritso jliaji atsia cakeriakjedalri lriino ikjaote. Lrirsotsa lrideeca lriino Dio ipeyajle, njite jliaji sacerdote irsotsa inaitjaca pjiomi cayoji lricaite capisho njaji yacoti kjaidaperri nanaco njaji caiperri.
31
Corriotsa maatsi carroca jliaji atsia lridee capoa
sacerdote ikjaolre rsoaji lriino. Njite rorsotsa rsorapitaca romatsica ipamna coandalricatsa imatsicanaati rorsolri.''