¹ Dio icadaa yacoti Joná irso tsenakja yamapia shopena, cayoji: ² ''Pjinicoenawa, piacarroa Nínive lricojle, jiaji yacaalre macacoe, njite picaite njemi jliaji yaacoti nonaalri picaiteca narso.'' ³ Niini Joná jinicoa Nínive lricojle lrinaitjá-carro jliaji Dio inaalri linaitjaca. Macacoé pia jliaji yacaalre Nínive, madalridaa jalredaoca paacawa pjaipa sho payoetá-carro jliaji yacaalre. ⁴ Joná ínita shewacawa yacaalre ricó njite padaa cayami lriacawa caaco kjaidani, lriaco cayoji: ''Coarenta jalredaoca nacoat sa Nínive iwayacacaotsa.'' ⁵ Njite njaji inaiki Nínive lricoperri njeepa Dio yaaco niini nacaite maijaca-cana. Pjiomi njaji inaiki njeeta nanacoa tsaayawanam, tsodalri pja nakjoite njite pjiomi njaji pekipenai. ⁶ Kjeyatsa lriocawa talricanaati Níinive lricoda jliaji yaacoti. Jlinicoa jliaji talricanaati lritalricanaata carroda nakjoite, ikena jlitaca lrioyao lritsayani talricanaati carrodani, jlieta lrinacoa tsaacowanam njite lriofawa palrippkjoa nacó. ⁷ Niini lrimeenaca yaacoti icaitecada cayoji: ''Njoa, Nínive italricanaa naapiya njaji caconaaperri noinai-perri, nocaite irso yofacape Ninive lrico, corriotsa pada inaiki, o maaficalri cadaa, maaficalri papoco-perri, corriotsa nataitacaotsa naijaca injaodati, corrin tsakjaotsa nairrá-carroca ooni. ⁸ Pjiomi njaji inaiki njite maaficalri tsakja neeta caotsa nanacoa tsaacowanam njite nacaiteotsa Dio kjaida sho. Imacaotsa pjiomi imatsicanaa ipeyoji inaitjaca, njite pjiomi njaji inaitjaji maatsirri icaapisho. ⁹ Wadetsantja Dio itecojletaca lriwaopiakje lrioya jliaji lrioma cawa lripeecoca waikjaolre lriirroa mayami-carro faa.'' ¹⁰ Njite Dio icapa jliaji nanaitjalri, namaca pjiomi njaji maatsiperri nanaitjalri. Niini Dio itecojleta lriwaopiakje lrioya jliaji maatsirri Lricaiterri pia narso lrinaitjaca narso, njite corrinatsa jlirrapiteetacana.