¹ Mitsa corrin Joná ipeyo icapaca jliaji, niini kerroacani pekirritsa. ² Niini Joná itatja Dio iinai, lriaco cayoji: ''Icatsa jliaji yacoti picaiterri norso a cádanacotoa njoa noyacalre ricó. Niini nopitotja pioya Tarsis lricojle, ima noajica Dio matsiadalrica pjia, kjenadalritsa iapa parso, merroadalritsa kjeya, ipeyocada aimatsa njaji inaiki, njite teecojlenakja piwaopiakje lrioya jliaji piomalri pjirrapiteetaca isho njaji inaiki. ³ Niini panaya no-Minalri, notatjaca piinai caiwi ricotsa piinó-carro njoa, ima matsiá pjaaca norso mayamica njoa lrioya jliaji caafica njoa.'' ⁴ Niini wa-Minalri iaco lrirso: ''Cotsa matsiaca pirso kerroaca pjia.'' ⁵ Jona iawa yacaalre ioya njite lria lriofawa jeerri imokema nacojle yacaalre irso. Lrinaitja lripanapoco njite lriofacawa lriapjite corricawa jamo lriaji, lricapaá-carro coajicaotsa jliaji yacaalre. ⁶ Dio icadaa adapikjaape itaoñawa Joná ipanapoco nacó lridaanatá-carro lrioya jamolri ima matsinaa piaca jámoca niini. Catiima Joná lrikjaote jliaji adapi itaoñalriwa lripanapoco naco. ⁷ Mitsa Dio icadaa tsakja pada acorro lripia jliaji paniatikja, niini jaalrecatsa lrikjaolre tjewaijlena, acorro injaca jliaji adapikja niini meerricani. ⁸ Niini tjewaijle piyompinaco jeerri imoto cádanacoenawa, Dio imeenaca caolri jamódalri jeerri imotolri njiteo. Niini jamolri iinoca Joná njite lriá mjaidani. Njite Joná yoma tja mayani cani. Lriaco lrirsowaaca, ''Matsia pja norso mayamica njoa lrioya jliaji caafi catsa njoa.'' ⁹ Njite Dio iaco Joná irso: ¿Coada kerroaca pjia lricaote jliaji paniatikja?'' Joná shepani: ''Matsiatsa kerroaca njoa, niniotsa kerroaca njoa jlia carrotsa iino njoa.'' ¹⁰ Dio iaco lrirso: ''Kjena picapaca lrirso jliaji paniatikja corridalritsa piapanaca, corridalritsa pideji ikjaote, corrin tsakja picadaa lritaoñawa. Lritaoñawa deepi ricó njite deepi ricotsa mayamini. ¹¹ Kjena nocapaca narso njaji inaiki Nínive lricoperri, jliaji yacaalre macacoédalri, irsocada aima pjaa ciento vente mil inaiki niini corriperritsa iajíi nanaitjalri maatsí cadaa o matsiadalri cadaa, aima tsakja naapiraa vaaca niini.''