¹ Niini pada imatsicanati nocapalri jérri yapjite, pada matsidalritsa narso njaji inaiki. ² Dio itaita iaca apada irso lri-ricocawa, inaaniti, njite naminalri carroni wadee canacai catoa lrirso cocacan, mitsa mikjapan catsantja lrirsocana ima corrica lritaita lriofacawa lrimaodacatsa naikjaote. Icamitsantja apadenakjantja jipa lrioya njaji lrirsonipe. Mikjapan perritsa njaji. ³ Pada atsia itaitantja irsoca aima lrienipe njite njitentja lriofacawa aima walria jalredaoca lrico, mitsa corri cadantja lricatimatacawa cafi cádanaconi, o corri cantja nadawani mayami cádanaconi, niini noaco lrinaco, cacoada pjaca jliaji yempeti mayamirri jlidoa iwawa lricotoa lrioya jliaji pekirri. ⁴ Ajaca mikjapancatsa jiicoca jliaji yempeti mayandalrim, njite kjeyatsa nadawani niini corritsa coca ianjí lrinaco. ⁵ Jliaji yempeti corrin lricapa jérri icanaca, njite corrin tsakja coca lriají, mitsa jliaji yempeti lrioketa pja matsiadalri lrioya jliaji pekirri corridalritsa icatimatacawa nasho njaji Dio ialri piatja lrirso. ⁶ Lritaita pia cantja lriofacawa do mil jamolri mitsa corri cadaa lriají coajica matsiaperri naco, lri-rico minitsa lriawa naacawa lrico pjiomi. ⁷ Mitsa pjiomi njaji idejicape nadejica naiñjacarro, mitsa corrin kepinacana naijaoda sho. ⁸ Niini corritsa cocaca teecojleca jliaji cajikjedalri lrioya jliaji majicadalrim. Corritsa coca lriaji jliaji kjenadalri lriema cadaa napeyajle njaji inaiki lriaji cadana tja coajica lricoadatana. ⁹ Matsialrina pja nasho njaji pacapalri patji sho lrioya jliaji pajica paoma parsowao njaji corripetsa parso, Mikjapantsa pja, cayoji paoma capisho pjeepaca caolri pacaapi sho. ¹⁰ Kepitanaperri kena oopi ricotsa pjiomi njaji pacapalri, cayotsaji kepitana capisho njai inaiki oopi ricotsa. Niini mikjapantsa pja corri cadaa pacoaca pawaopiakje lriinai jliaji icaitecada waacona kjaidadalri, jliaji yanjicada wanaco pjiomi. ¹¹ Aima cadaa pja caacoca pja, aima tsakja njaji pacaiterri mikjapantsa. ¿Cocantja lrimatsiaca lrirso jliaji atsia cayodalri? ¹² Ima ¿Coca itaita yajica cocaca jliaji matsiadalri lrirso jliaji atsia cafi cádanaco toa jalredaoca lrico, jliaji jamilri idanapiam shodalritsa? ¿Coca itaita icaiteca apada atsia irso lrinó carrontja jérri yapjite lripjeya toa mayamicani?