¹ Matsia pjatoa matsia cadaa piacona lrioya jliaji piarroca pinacoa pomeniajai, njite matsia pjatoa mayamica pja lrioya jliaji jíico catoa pja. ² Matsia pjatoa paacawa naikjaolre njaji cawunanaperri, lrioya jliaji paacawa narrapacawa lricojle, ima jliaji irrapakjeti narsoatja pjiomi mayami cádanaco pkja, niini njaji inaiki cafiperri toa narsotsa nawaopia nanaco njaji wacaiterrina. ³ Matsia pjatoa jliaji inonacalri pekjen ioya, ima inona cayami peecoa catima nakja pacaolre. ⁴ Jliaji cajikjedalri lriwaopia tjewaca mayamicalri naco, mitsa jliaji majicadalrim icamitsa lriwaopiaca coajica lricatimataacawa. ⁵ Matsia pjatoa cajikjedalri icoitaca pja, lrioya jliaji pjemica nacantaca njaji majicaperrim. ⁶ Mikjapantsa lricajica jliaji majicadalrim, kjeyadalritsa iwayacawa cayoji malritsi metaperrim imacapisho. ⁷ Jliaji icashatacada ape atsia cajikjedalri lricadaa majicani, njite jliaji icaoñaaca cadawa lriapiyao lrimatsica apada icaolre. ⁸ Matsia pjatoa lriwayacacawa njaji cocacan lrioya jliaji lrinitacawawa; njite njaji inaiki makjeyapicapetsa matsia pjatoana naoya njaji inaiki padalreperrimi. ⁹ Makerroatacatsawa kjeya icaolre ricó, ima jliaji irroati iofawa nacaolre ricó njaji majicaperrimi. ¹⁰ Macaitetsa cayoji: ''¿Matsia pja piatoa jliaji jalredaoca oopi panaya ioya?'' Corrin pitatjeta lrinaco pioma capoa pirsoca yajikjeti. ¹¹ Matsiadalrica jliaji yajikjeti, cayocana nacayosho njaji inaaniti cacoadaperri paferrinaipe imacaji parso. Ima lrinaitja matsia narso njaji icapacape kjaiteca jérri imotowa. ¹² Ima jliaji yajikjeti lriwapa pja matsidalri ioya, cayoji palrata idanata capisho pja tsakja, lrimatsiaca jliaji yajikjeti lricadaca cafi matsia jliaji irsocadani. ¹³ Icapa nanaco njaji Dio inaitjalri: ¿Coca itaita imayacantaca njaji tsikerreperri lrinaitjaca? ¹⁴ Picatimatacawa matsia cádanaco pirso pjiomi; mitsa maatsi cádanaco piyapacawa pirsotsa piwaopia niinica Dio icada cádanaco warso jalredaoca matsiadalri njite jalredaoca maatsidalri tsakja, njite corrin coca yanjí coajicaotsa jliyapacawa lripeyajle. ¹⁵ Corri cadana noyatoa aima oonia jalredaoca lrico lricó, mitsa nocapa aima coajica jliaji jalredaoca; nocapa coajica mayamica njaji inaiki matsiaperri yempetipe toa, njite nocapa tsakja inaiki matsiperri naofacawa aima oonia jalredaoca lrico. ¹⁶ Corritsa matsia, matsia cada calretsa pja; corrin tsakja aima cada calretsa parso yajikjeti; ¿Coadantja paoma pamatsicacawa pjawacatsa? ¹⁷ Corrin matsiaca matsi cadalretsa pja, mkitsa corrin tsakja matsia dawim cadalretsa pja. Corrin matsia mayamica pja pjenana ipjeya toa. ¹⁸ Jipa matsia yapiyao jliaji yajikjeti, mitsa mamacatsa njaji apjetsida. Jliaji ifio cáda Dio íwana matsia watsani pjiomi naco. ¹⁹ Jliaji yajikjeti icadaa lricadaa kjaidaca jliaji atsia irsocadani, kjaida pja die talricanatinai iwapacape pacoatsa yacaalre. ²⁰ Corrin pacapa apada inaiki jalredaoca lrico matsiadalri pjiomi naco njite corridalritsantja inaitja imatsicanawa. ²¹ Mjemitsa piicao pjiomi njaji yacoti nacaiterri njaji inaiki, ima wadetsa pjimica coajica pirsodalri iwadapeca pjia maatsi. ²² Njite pjiajintsa matsia caco mana tsakja pjia maatsia pikitsinda naco. ²³ Nocapjenina matsia yajikjeti sho njaji. Niini noaco: ''Noma norsoca aima yajikjeti.'' mitsa corrin noketa aima yajikjeti ima aimadalrica noya. ²⁴ Téeco noya jliaji yajikjeti, njite tjewacaca nooya. ¿Cocantja itaita ioketani? ²⁵ Nocadaacawa noajícarro, nocapácarro matsia njite nooma noajikjewa, njite notatácarro noajica coajica njaji pacapalri. Njite noaji matsia corricatsa matsia dawinca pja, njite corrin matsiaca pamatadata majica capoa pja. ²⁶ Njite nooca noají pada jipitidalripja mayamicalri ioya, icatsa rsoaji inarro pakjamidarro oowepi shoperri, tooda shoperri rocaolre rico, njite rsopashopaca njaji rocaapi. Mitsa jliaji ipeyocada Dio lripitoatsa rooya, mitsa jliaji ipeyo cada imatsicanati rsopaotsani. ²⁷ Cayo lricaiteca jliaji icanantacaita. ''Aima njaji nooca noaji inaco, nonaitja cayo noma capoatja noaji coanshopaca njaji pacapalri. ²⁸ Noaji cádanaco tja noma noajícarro coajica, icamitsa njaji noketalri. Noketa apada atsia inaitjacada matsia napecolrico njaji atsianai aimadan, mkitsa corrin noketa apama inarro inaitjacada matsia nanakjoite njaji inaitjepe aimadan. ²⁹ Njite icatsa njaji nocapalri inaco: Dio inaitja njaji ianaiki matsiacarrona, mitsa njaji inaiki opi njeena lrioya, icamitsa najica naoma narsowao matsiperri.''