¹ Piwapa matsia pinaikica pia cádanaco Dio iipana lrico. Pia nirse pjimicarro picao. Matsia pjatoa pjemica paicao naoya njaji inaiki matsilriperrimi nadee cádanaco ofrenda corri cadana nají matsi catsa jliaji nanaitjalri. ² Makjeyapitatsa caacócarro pjia nanaco njaji piomalri picaiteca Dio irso, macadatsa picaolre ikjeyapita piapiya wadee corrica pinaitja njaji picaiterri pinaitja caotsa. Ima Dio iofacawa eenolricojle, njite pjia, icatsa piofacawa jelredaoca lricotsa. Niini macaitepetsa aima yacoti. ³ Ima pirso cadaa aima pidejicalre njite pjita picaolre naikjaote, nacadaotsa matsica pjitaponca. Niini lricoatsa caacoca pjia, wadee mikjapanketsa cacopeca pjia. ⁴ Picaite cádanaco Dio irso, jliá watsa nonaitja Pirso, cayo cápadanaco kjeya pinaitjacan, ima corrin catima Dio icapaca narso njaji majicaperrim. Niini pinaitja jliaji picaiterri pinaitja caotsa. ⁵ Matsia pjatoa corrica pinaitja yacoti lrinaco jliaji piomalri pinaitjaca, lrioya jliaji picaiteca njite corrin pinaitjani. ⁶ Manaitjatsa pimatsicanao lrisho jliaji picaiterri. Macaitesa lrirso jliaji sacerdote: ''Corrin nomacalreca jliaji nocaiterri.'' Cayo cadaa pinaitja, pikerroata caotsa pirsowao Dio lrikjaote jliaji picaiterri, njite Lriwayaketa caotsa pioya pjiomi njaji pirsolri pjitaji pidejicalre icoada sho. ⁷ Macadatsa namatsiketa pjia njaji piwaopiakje aimadalri, njite piaco aimadalri tsakja, mikjapantsana. Pirsotsa pifioca Dio iwana. ⁸ Picapa cadaa pada italricanatacawa lrico coajica jlirrapitetaca njaji inaiki niniperri, coajica lriñaitoca nadejicalre matsiaperri naco, mjetatsa picaolre nanaco, wadee piwaopiaca corrica coca yají lrinaco jliaji matsirri lrinaitjalri, ima njaji talricanatinai cayoperri narsoentsa natalricana iwapacapena, njite nanaco njaji talricanatinai, niini apada naicao dalri pjatoa yajicada nanaco. ⁹ Njite jliatsa jliaji talricanati jlipa tsakja lriyadawa nainai nanakjoite njaji nañaite. Njite jliaji apacoa irricoca naaca narsowaca njaji idejicape niini. ¹⁰ Njaji ipeyocape palrata, naoma pjatoa palrata, corrin mapjica naomaca; njite njaji ipeyocape aima nanaaniwa naoma pjaotsa aima narsowao. Mikjapantsa njaji cayoperri. ¹¹ Aima cada pja nataoñacawa njaji panaani, aima tsakja inaiki itaoñawa iñjacapena. Niini icamitsa lrimatsiaca lrirso jliaji cayarroajidalri lritaita catsa lricapaca lritji sho njaji lrirsolri. ¹² Jliaji inaiki idejicada lritaita lridiaca lrimaa lrimaodacatsa, lriñja cadaa aima o tsootsa mitsa lrimaodacatsa; jlia cadana jliaji cayarroajídalri corrin lritaita lrimaaca lrimaodacatsa ima jlitaca lricaolre nanaco njaji lrirsolri. ¹³ Niini pada inonadalritsa nocapa jérri yapjite; njaji iwaketacape aima nanaaniwa, icamitsa lrideca narso matsiperri. ¹⁴ Lria cádanaco kjena jliaji ricodalri pia, corri capoa lriwapa matsia njaji lrirsolri pia, icampjatsa kjena catsakja jliaji lrienipe. ¹⁵ Cayoji matsayan capishotsa lrimoto lricapa jalredaoca jliaji inaiki jíco cádanaconi, cayo tsakjaotsa lridiá cádanaco lrioya jliaji jalredaoca. Corrin lritaita lrideeca pada nanakjoite njaji lridejicalremi. ¹⁶ Inonadalritsa nocapa jliaji corrica pataita padeca painaiwa nanakjoite njaji padejicalre, icamitsa padiacawa cayotsaji jíco capishotsa pja. Niini mikjapantsa padejica kjaida parsocarro aima panaaniwa. ¹⁷ Njite icamitsa paofacawa coyolrekjeti ricó, irroati ricó, iyamikjeti ricó, njite cocacatsa ima pacapaca. ¹⁸ Niini norso njoa, matsia pjatoa paiñjaca, pairraca pacatimataaca carroa nanaco njaji parsolri padejicalre icoada, padeji cádanaco toa jérri yapjite, Dio icada cádanaco toa caafica pja. Ima cayoadaca Dio icadaa fa jalredaoca lrico. ¹⁹ Dio iáa cada apada irso aima lrinaaniwa, piñja, pirra tsakja picaolrewa nanakjoite; picatimatacawa nanaco njaji pirsolri ima pjirrapita pidejica pirsocarrona, njite cayotsa Dio icadaca pjia pirsocarro njaji pirsolri. ²⁰ Njite Dio icada capoa catimaca pjia picaolre ricó, mjetatsa picaolre coajicaotsa piofacawa caafi cádanaco toa pjia.