¹ Noaco nocaolre rico cayoji: ''Panaya nowoacawa nanaco njaji icadalri catimaca pja. Niini nonaitjaca njaji icadalri catimaca njoa.'' Mitsa mikjapan tsakja njaji nomalri, cayocana paoma capisho pjepaca caolri pacapi ricó. ² Mikjapantsa pecaaca coca nacoca; njite mikjapandalritsa jliaji paomalri pacatimataacawa ikjaote jalredaoca lrico.'' ³ Nocaolre rikjoite nocadacawa irraodati irso nowícarro cayocantja matsia njoa. Mitsa nocada jliaji nowaopiakje lridecarro njoa yajikjeti sho, nonaitja cadana macadatsa nodewana cádanaco. Noma pia nonaitjaca coaji cantja matsiaca jliaji inaiki caafi cádanaco eeno yapjite. ⁴ Ninaitja aima idejikjeti, Nonaitja nopanao njite nonaitja nokiníkerrewa. ⁵ Nonaitja norsowao paniapjida matsiaperri njite njite naofacarrodawa njaji inaiki; noapana aima paniati matsiaperri paiñjaca napecolrico. ⁶ Nonaitja pada ooni yarrodao macadalri noarrocarro nanaco njaji jaico nataoñácarro matsia. ⁷ Nowenta norsowao norsoperri atsianai njite inaitjepe tsakja; norso cadana tsakja norsoperri jicoperri talricanati dapana lricotsa. Norso pia tsakja aima vaaca papocoperri naoyawaca, aima pja pia norsoca nópirra naoya njaji apana talricanatinai nopjeyaperri pia jerosalén lrico. ⁸ Nowaketa pia tsakja palrata njite owirro tsakja norsowao nayapepem njaji talricanatinai iwapacape jiipai macacoepe njite jiipai tsokjoe tsakja. Norso njaji icantacape norso, atsianai njite inaitjepe, nocatimatacawa nápiya njaji noninai njite njaji inaitjepe norsoperri, cayoji nacatimataacawa njaji atsianai. ⁹ Niini canaanidalri pja piaca njoa naoya njaji apjetsida talricanatinai nopjeyaperri pia Jerosalén lricope, njite corrin noajikje imaca njoa. ¹⁰ Pjiomi njaji nokemiji notji sho, norsoca norsowao. Corrin pacapa pada njaji icatimatalri njaji inaiki corridalri nonaitja, ima nocaolre icatimatacawa nanaco pjiomi njaji nodejicalre, niini nocatimatacawa nodejicalre icoada sho. ¹¹ Njite nocapa pjiomi njaji nodejirri nocapi sho, njite njaji nodejicalre nonalri nadejica, mitsa nopieta nocaiteca, itamanatsa njaji nocaiterri, cayoji paoma capisho pjepaca caolri pacaapi ricó. Corrin pacapa pjetanda nasho jérri yapjite. ¹² Njitena nodia nowaopia lrinaco jliaji yajikjeti, njite njaji nonaitjaji nomajican lrico tsakja. ¿Cocantja lritaita lrinaitjaca jliaji walridalri talricanati njoapodamdalri njaji corridalrintja nonaitja toa? ¹³ Ninina noaji aima pjacatoa lrimatsiaca jliaji yajikjeti naoya njaji panaitjaji pamajican lrico, cayoji matsia capisho pja jliaji camarrai cadaocadalri ioya. ¹⁴ Jliaji atsia cajikjedalri, cayocani lricayosho jliaji atsia icapacada matsia lriicao lritji sho akjerreca lriawa, mitsa jliaji majicadalri lriajicawa cadaoca cawa lrico, mitsa noaji cayo minicatsa pjiomi njaji inaiki. ¹⁵ Nini noaco nocaolre ricó: ''cayoji jliyapa capisho jliaji majicadalrim, cayo tsakjaotsa njoyapacawa nacayosho. Niini, mikjapantsa cajikjeca njoa.'' Niini noajpi nocaolre ricó: ''Mikjapantsakjani, itamanatsa pjiomi.'' ¹⁶ Jliaji inaiki cajikjedalri njite jliaji majikjedalrim, corriotsa nawadacarroca wia njaji inaiki. Yamiketsa nawadacana. Mayami jliaji atsia cajikjedalri mayami capisho malritsi. ¹⁷ Niini matsi noaji cafica njoa ima matsiperri catsa norso njaji idejikjeti padejirri jérri yapjite. Mikjapan catsa pjiomina, cayocaji paoma capisho pjepaca caolri pacaapi sho. ¹⁸ Matsi nocapaca pjiomi njaji nodejicalre nonaitjalri jérri yapjite ima nomacacaotsana mayami kenaotsa njoa lrirso jliaji njoapodada. ¹⁹ Ima corrin noají cajikje caotsani o majicacani. Mitsa, jliacaotsa natalricana pjiomi nanaco njaji nodejirri iyecato ricó jérri yapjite. Mikjapan tsakja pjiomina. ²⁰ Niini, noinita piena njotaca nocaolre nanaco pjiomi njaji nodejicalre nonaitjalri jérri yapjite. ²¹ Ima jliaji idejirrina lrinaitja njaji lridejicalre iyecati sho, yajikjeti sho ima cayecadalricani, mitsa, lrimaca caotsana apada irso corridalritsa irso njaji. Mikjapan tsakja njaji, inonadalritsa. ²² Ima, ¿cocao lrimatsiaca lrirso jliaji idejicada kjaida njite lrinaitja jidati lricaolre ricó lriwayaketácarro matsia lridejicalre jérri yapjite? ²³ Jalredaoca icoam aima njerrapita nadejica njite kerroacana, njite deepi ricó corrin nawafetacawa matsia. Mikjapantsa pjiomina. ²⁴ Niini matsia pjaca paiñja catsa njite pairraca kepinacarro pja padejicalre icoada sho. Njite nocapa ajádalrica jliaji Dio icaiterri cayo cada panaitjaca. ²⁵ Ima, ¿cocantja itaita iñjaca o cocantja itaita icatimatacawa corri cada Dio lriinai? ²⁶ Ima coca cadaa icatimata Dio, Lria watsa lrirso yajikjeti, iyecati njite itimati. Mitsa jliaji inaitjacada imatsicanao, Lricadaa lridejicalreo lriwaketácarro lricada carroenakja lrirso jliaji icatimatacada Dio. Mikjapantsakjana, cayoji paoma capisho pjepaca caolri pacaapi sho.