¹ Niini jalredaoca nakjenanatanda panaitácarro jlinana lrico njaji coadaoca panaitja eeno yapjite. ² Niini pada jalredaoca jicócarro njite pada jalredaoca mayamicarro, pada jalredaoca papanácarro njite pada jalredaoca pethácarro njaji papania, ³ pada jalredaoca painócarro njite pada jalredaoca patapécarro, pada jalredaoca pamatsicá-carro njite pada jalredaoca padiácarro panaitja tsenakja. ⁴ Niini apada jalredaoca paiyacarro njite pada jalredaoca pecaacarro; pada jalredaoca inonadalri cawinana cádanaco pja njite pada jalredaoca parrapácarro, ⁵ pada jalredaoca paocácarro jiiáda njite pada jalredaoca paniwácarro jiipada, pada jalredaoca pjeyoácarro apjetsida njite pada jalredaoca yamícarro pjeyoaca apjetsida. ⁶ Pada jalredaoca paomácarro payarroa njite pada jalredaoca yamícarro paomaca payarroa, pada jalredaoca pamatsietácarro payarro njite pada jalredaoca papecócarro njaji payarro, ⁷ pada jalredaoca patsfácarro tsaya njite pada jalredaoca paocócarro tsaya, pada jalredaoca maacócarro pja njite pada jalredaoca caacócarro pja. ⁸ Niini pada jalredaoca paomaacácarro njite pada jalredaoca maatsícawa pacapaaca cawa, pada jalredaoca paofácarro imaodacakjeti ricó njite pada jalredaoca panaitjacarro oowi. ⁹ ¿Cocao lricoadawa jliaji idejicada? ¹⁰ Nocapa njaji idejikjeti Dio icadalri narso njaji inaiki nadejí carroni. ¹¹ Matsiaperrica pjiomi njaji Dio inaitjalri, njite Lricadaa cocatsa jiyapawa njenana lrico. Lricadaa tsakja pajícarro coaji piaca jliaji jalredaoca oopi njite coajicaotsa wapeyajle. Cayo cadanatja, corrin pataita pají nanaco pjiomi njaji Dio inaitjalri. ¹² Nini noaji wanaco fa inaiki, icamitsa wataita waofacawa matsia njite wacatimatacawa nanaco njaji matsiaperritsa caafi cádanaco toa pja, ¹³ njite nataita naiñjáca, nairra tsakja nadeji capoa, matsia nanaitja cayo catima carrona. Nutsa narsotsají icacatsa pada Dio yandaca warso Lrimatsiaca nakjoite macoadatsa. ¹⁴ Njite wají tsakja, corri caotsa nawayacá carroca pjiomi njaji Dio inaitjalri. Corrin wataita wayata pjaca narso o wadajleca cantja naoya; cayotsa Dio inaitjacana nataitácarro natsomitacani njaji inaiki nácarro Lrirso matsiadalri. ¹⁵ Miyacatsa pjiomi njaji wacapalri, njite njaji corripetoa wacapa, wacapa cadaotsana nini cayami piena oopi ricotsa. Dio-tsa icadaa nají njaji inaiki coajica njaji Lrinaitjalri oopi Lridawanda toa naoya. ¹⁶ Nocapa njaji imatsicanati jérri yapjité perri, ninicawantja matsiaperri, njite nanaitjacawantja matsia narsowaca, icamitsa nanaitjaca niini imatsicanati. ¹⁷ Mitsa kjenana capoa pjiomi, niini noaco nocaolre rico cayoji: ''Dio watsa icaite naacona njaji matsiaperri njite njaji maatsiperri njenana ioca cádanacoa, coaji piacana njite coaji piaca nadejica.'' ¹⁸ Noaco tsakja nocaolre ricó: ''Diotsa íwi njaji inaiki jalredaoca lricoperri Lricadácarro najíacawa maficalri sshoperricana.'' ¹⁹ Ima coajicaotsa njeyapacawa njaji atsianai, njite coajicaotsa njeyapacawa njaji maficalri, pacoacatsa lricapacana coajicaotsa njeyapacawa. Coajica mayamica jliaji pada, cayo tsakjaotsa mayamica jliaji apada. Padatsa jliaji caolri icadalri caficana. Corrin nja pjaca irso caolri njaji inaiki maficalri ioya; ima mikjapanperri catsa pjiomina. ²⁰ Padatsa jliaji mayamicalri pjiomi irso. Jiipai sho pjia Lrinaitjana niini jiipaica tsenakjaotsa nadiacawa. ²¹ ¿Coca yanjí atsia icafica iacawa yenonrse-rse njite nacafica njaji maficalri iacawa tjewacajle-rse jiipai yapitje-jle? ²² Niini jliaji noajirri tsakja, corriotsa coca itaita idietaca pja jalredaoca lricojlé tsenakja mayami cayami pja, niini matsia, picatimatacawa pidejicalre naco, ima cayoapeca fa, idejicaope tsa jalredaoca lrico.