¹ Icatsa njaji yacoti icanantacaita icaitejica, David irri, Jerosalén italricana. ² Cayo lricaiteca jjiaji icanantacaita: ''Mikjapan catsa pjiomi njaji pacapalri, itamano sho, caolri sho, pjiomi nawayacawa. ³ ¿Coca lrimatsiaca lrirso jliaji inaiki jlita cada lricaolre nanaco njaji lridejicalre jérri yapjite? ⁴ Pacoma iwayacao njite walricoma initawa, mitsa jliaji jiipai corrin lriwayacawa. ⁵ Jérri imotoa njite lridia tsenakja jliewawa, njite kjeyatsa lridia tsenakja lrimotowa lrimoto carroji mana njiteo. ⁶ Jliaji caolri lripjiaca jerri iyekema nakjoite njite lriyofiawa inarroema nacojle, cayotsa lriacawa lriapowa lrico njite lridia lriocawa lrinita carrom pia tsenakja. ⁷ Pjiomi njaji ooni yamarracape naocawa manoa nacojle, mitsa jliaji manoa corrin pakjamica nasho. Niini njaji ooni nadia tsenakja namarrawa nano carroji mana njiteo. ⁸ Pjiomi njaji wacapalri nama wacapaca corri capoa wají coajica nanaco. Jliaji watjí corrin matsia lriajiacacawa nasho njaji nacapalri, corrin metamica najiacacawa njaji fenacolrico nasho njaji njemirri. ⁹ Coaji piaca nanaitjaca njaji inaiki oopi, cayo tsenakjaotsa napieta nanatjaca, coaji piaca oopi, cayo tsenakjaotsa panaya. Corrin pacapa walriperri inaitjacalriwa jérri yapjite. ¹⁰ ¿Capja niinica apada wataitalri wacaiteca inaco: ''Picapa, walridalritsa jliaji?'' Pjiomi njaji wacapalri miyaca lricotsa nainitawa, nainiwa wapjeya toa. ¹¹ Njaji inaiki panayaperri corriotsa nawadá carroca njaji nanaitjalri njaji waferrinaipe; njite njaji walricomanai, corriotsa nawadá carroca jliaji nanaitjalri njaji inaiki panayaperri, njite cayo mini tsakjaotsa nainai njaji walriconaipe apapia jalredaoca wapeyajleperri.'' ¹² Icanantacaitaca njoa, natalricana pia njaji Iraelnai Jerosalén lrico. ¹³ Nocadaa nowaopiakje icanantakjeti irso noma capoa noají coajica nanaco pjiomi njaji pacapalri eeno yapjite. Pada idejikjeti jirrapitinaperri Dio icadalri narso njaji inaiki jalredaoca lricoperri wade mekjapancatsa naofacawa jalredaoca lrico. ¹⁴ Nocapjenina pjiomi njaji nanaitjalri njaji inaiki jérri yapjite, njite noají mkikjapancatsa pjiomi njaji nanaitjalri. Jamolri iitaca sho catsana, paoma capisho pjepaca caolri pacaapi ricó. ¹⁵ Jliaji tsikerredalri imotocawa corrin pataita mayacantaca. Jliaji iñácadawa corrinatsa padiá carroca paoketa. ¹⁶ Caaco nocaolre irso cayoji: ''Norso aima pja yajikjeti naoya njaji nopjeyadaperri Jerosalén lricoperri. Jliaji nowaopiakje lriaji aima yajikjeti niini lriaji aima naco tsakja.'' ¹⁷ Niini nocadaa nocaolre lriajícarro yajikjeti naco lriajícarro coajica matsia, noajícarro tsakja coajica nanaitjaca njaji inaiki matsilriperri, njite nooca noají mikjapancatsa jliaji nonaitjalri, cayoji nooma capisho njopaca caolri nocaapi ricó. ¹⁸ Ajádalri nocaite: ''Aima cada pja parsoca yajikjeti, aima pja pjerrapitaca; njite aimacadaa pja pají, aima pja matsiperri inoca paikjaolre.