¹ Cayoji dolrio mayamperrimi iecota capisho jliaji pomeniajai, cayotsa pada pamatadanda tsodalritsa lritaita lri macoadataca jliaji yajikjeti njite lriacona. ² Lricaolre jliaji inaiki matsiadalri lriwaopia matsiatsa, mitsa lricaolre jliaji majicadalrim corrin lriwaopiaca matsia. ³ Pada inaiki majicadalrim, corrin coca lriwaopia lriaji cádanaco inipolrico, lricadaca nají lrinaco njaji apetsida inaiki matsilridalrin cani. ⁴ Kerroa cada pirso apada talricanati, mamacatsa pidejicalre. Ima jliaji itarrawatakjeti lritaita jlienitaca waoya irroati matsidalri. ⁵ Niini tsakja apada imatsicanati nocapalri jérri yapjite, apada imatsicanati nanaitjalri njaji talricanaatinai: ⁶ nacadaca majicaperrimi idejicalrewa nainai jliácarro njewidapo, mitsa njaji cajikjaperri corrin nacada nadejica nainai cayo. ⁷ Nocapa coajica njenicoca naofawa caballo naco njaji narsoperri idejicape narso, njite njaji cajikjeperri icamitsa nacadaa nacawa njaipa shotsa. ⁸ Coca cada jíca pada irrirri lritaita lriwacawa jliwacatsa lri-ricoda, njite jliaji idoita cáda panti iwai, pakja ápi itaita imjoacani. ⁹ Njite jliaji imataca cáda jíipada lriyoacacawa lrishotsa, njite jliaji átsia iyoa cáda jaico lriometaacacawa lrisho. ¹⁰ Paita matseta marsocadalritsa iema, njite jliaji idejicada lriso corri cadaa lrianjí lrikématacani, lrirsotsa lrinaitja pjaaca jíidati, mitsa jliaji yajikjeti lricadaa matsiaca pja lrioya. ¹¹ Pakja ápi imjóa cadaa ape inaiki lripjeya toa namerroatacani, niini corritsa coca lridejicalre lrinaco jliaji imerroatacadani. ¹² Jliaji inaiki cayekjaite matsia cáacocani, mitsa lriacoam jliaji majicadalrim lriacoamtsa inaitja maatsoi lrirso. ¹³ Cáaco cadanacotoa jliaji majicadalrim, lrimotoeta yacoti matsiperriomtsa, mitsa yami cádanacoena cáacocani oicamitsa caacocani macadatsa, yacoti matsiperri. ¹⁴ Jliaji majicadalrim aima lrimotoitaca yacoti, mitsa corrin coca yanjí coajicaotsa napeyajle. ¿Cocao yanji coajicaotsa tjewena? ¹⁵ Jliaji majicadalrim idejicalre lria lrimapjitani, cayo cádanaco corrinatsa lrianji jliaji inipo iacadawa yacaalre ricojle. ¹⁶ Kjenadalrica pjia jíipai, yempeti cadatoa jliaji talricananti, njite nainita cada nacatimatacawa piyompinaco toa njaji njewidapo. ¹⁷ Mitsa matsiadalrica pjia, jiipai, cajikjedalri yenipe cadaa jliaji iwapalri pjia, ima njaji njewidapo naiñjaca jlinaana lrico, kjaida carrona, corrin nadewaná carroca. ¹⁸ Íino capoa jliaji inaiki corrin lrimatsieta lriipana itapje, inodalri capoa jliaji inaiki iyao itsakjawa lriipana iwawa lrico. ¹⁹ Njaji inaiki nanaitja iñjaodalri neketaacá-carro naiñja cádanaco, jliaji jaicotjeda ianáa lricadaa najoiwitaacawa, njite njaji palrata icatsa parsoshopaca pjiomi canacaiperri parso. ²⁰ Macaitetsa yacoti talricanati naco, corrin piawaopiakje ricoca, macaitetsa yacoti matsidalri canaanidalri naco pjiwaaca cádanacotsa pimacawa lrico. Ima pada wipjiarro yarrajicadawa itaita ideeca jliaji piacoarrom; coandalri catsa yarrajicadawa itaita ideeca njaji picaiterri.