¹ Nowaopia nanaco njaji nocaolre ricó notaitácarro noaji coajica njaji inaiki matsiaérri, cajikjeperri njite pjiomi nadejicalre naco. Dio icaapi ricoca pjiomina, corrin apada yanjí coan cádanacoca itimati iocawa lrinaco o irroati cada. ² Niini apada iocalriotsa pjiomi irso. Inaiki matsiadalri njite jliaji matsidalri, pacoaca tsaotsa mayamica fa. Njaji mamatsicanaperri njite njaji camatsicanaperi; njaji inocape maficalri Dio irso njite njaji corriperri íno maficalri Dio irso, mayami tsakjaotsana. Njaji icaitecape yacoti ajádalri Dio naco njite njaji corriperri inaitjaca, pacoaca tsakjaotsa mayamicana. ³ Niini pada matsidalritsa jiyapalriwa pjiomi irso jérri yapjite, padatsa jliaji iwaplri pjiomina. Pakjamica matsidalri sho nacaolre ricó njaji inaik, nanaitja macadatsa cafi cádanacotoana. Njite piketem, icamitsa mayamicana. ⁴ Lriwapa pjatoa matsiadalri jliaji corridalritoa mayami, cacoada pjatoa jliaji tsíino caafidalri yawi mayandalrin ioya. ⁵ Ima njaji inaiki coripetoa mayami nanjí mayamicaotsana, mitsa njaji mayanperrina corrinatsa coca nanjí, corrinatsa narsoca nawaopiakje njite corrinatsa coca iwadana. ⁶ Oopina nawayacawa lrioya coaji piaca lripeyoca, coaji piaca kerroacani, coaji piaca lrikemica. Corrinatsaotsa coancaojlica napieta nanaitjaca jliaji nanaitjapialri pia jérri yapjite. ⁷ Niini warsena piawa, piñjácarro piñjapda, pirra pirraoda, picatimatacawa joiwipe; njite mjetatsa picaolre nanaco ima corritsa matsirrica Dio icapaca pacatimataaca-cadawa matsiatsa. ⁸ Pjietacawa matsia, pimatsietacawa matsiatsa. ⁹ Piofá catima roapiya rsoaji piino piomanda picaolre sho, ima kjeya catsa Dio icada paofawa jérri yapjite. Icatsa jliaji parsolritsa panaitjaca caafi cádanacotoa pja jérri yapjite. ¹⁰ Pioketa cádanaco icoam pidejicalrewa, pinaitja matsia jliaji pidejirri. Ima mayami kenaotsa pja corriotsa padejí carroketsa, corritsa parso carroketsa pawaopiakje, corrinatsa coca panjí, corritsa parso carroca yajikjeti, iyecati walriotsa nirse pjiomi fa. ¹¹ Nocapa tsakja pada matsidalritsa anji jalredaoca lrico: Corrin jlia minicatsa shama lricoema shecocawa jliaji kjeyadalri shecoca naoya, njite njaji kjaidaperri pjaca inoacacawa corrin nja minicatsa shama nacoema; njite jliaji irsocada yajikje corriotsa yamícarroca kjenacani; jliaji yajicada coajica lrinaitja lrirsocarro lrinaaniwa corriotsa cayarroanjicarroca aima pja, njite jliaji iinaiki matsiadalri corriotsa matsia minicatsa nanaitjaca lrirso. Niini jalredaoca matsia cádanaco ioca parso o maatsi cádanaco iocawa panaco. ¹² Corrin pada yanjí coancaojli caotsa jlinaana iocawa lrirso, cayoji corri capisho copje yanji coancadanacoca lricalrapiacawa tooda lrico, o cayoji wipjiarro írro capishowa nerroetanda lrico napia. Cayo tsakja njaji inaiki, corrin nanjí coancadanacoca matsidalri ioca jípana. ¹³ Nocapa tsakja inaiki cayekaperri inaitjacape matsia njite matsiatsa nocapa jliaji nanaitjalri. ¹⁴ Niini pia apacoa yacaalre corricawatsa pacapa aima inaiki, njite apada talricanati kjaidadalri iawa naikjaolre lriinó carrona, lriyofietana lrinaikite sho, njite lrinaitja njerracarronawa yacaalre iwai naco. ¹⁵ Mitsa lri-ricoda jliaji yacaalre niini pia apada atsia cawaopiakjédalri mitsa kjenadalritsa, niini lrinaitja pada lriwaopiakje lriyomjetácarro njaji inaiki ninperri. Mitsa jliapodami, corrinatsa nawadaca jliaji atsia kjenadalri cajikjedalri iyomjetalrina nacoema ioya. ¹⁶ Niini nocaiteca cayoki: ''Matsia pja catoa jliaji yajikjeti, jiidati joya, mitsa lriajikje jliaji atsia kjenadalritsa corrin coca iomani, njite corrin coca jimi lrirso cáaco cádanaconi.'' ¹⁷ Matsia pja njaji yacoti pada canjikjedalri icaitenda tacaa lricotsa naoya njaji yacoti lricaiterri kjaida sho jliaji talricanati majicadalrim. ¹⁸ Matsia pjatoa jliaji yajikjeti naoya njaji nainoaca shopawa oowi ricó, mitsa apada majicadalrimtsa lritaita lriwayaketaca maatsitsa pjiomi.