Capítulo 5 - Njaji die yácoti panaitjaope
1
Moise iwaketa pjiomi njaji iraelitanai njite lriaco narso: ''Jimi icao matsia Iraelnai, njaji yácopti panaitjaope njite njaji lrinashopa fa nocaiterriotsa jimi panaya, yají carroatsa jiwida lrico njite inaitjá-carro cayoji nacaite capisho njaji yácoti.
2
JLIAJI IMINALRITI lrinaitja pia waapiya yácoti Horeb lrico.
3
JLIAJI IMINALRITI corri piatsa lrinaitjenca jlipepe yácoti oopi naapiya njaji wapeyajleperrim pia, mitsa lrinaitjaca waapiyani, fa cafi perri panaya.
4
JLIAJI IMINALRITI caaco pia iapiya iekjoete-waaca jiipana Horeb lrico tiyé ipeco lrikjoite.
5
(Noema pia ioyawaaca Dio iapiya jliawajli, nocadá-carro LRIACO, mitsa icamitsa ifiocawa pekirritsa icapa cádanaco jliaji tiyé, njite corrin ioma jirracawa lrinaco jliaji jiipana.) Lriaco JLIAJI IMINALRITI cayoji:
6
Icatsa i-Minalri Dio-ca Njoa, jliaji jitalri sha Egipto lrikjoite, teco lrioya jliaji narsoperricawa pia shá.
7
Corriotsa pirsó carroca apana dionai teecojle Nóya.
8
Corriotsa pinaitjá carroca idolonai njenapjiam njai eenolicojlé perri, o jiipai nacojlé perri o njenapiam cadaa njaji ooni ricóperri.
9
Corrin itaita icoajacawa naikjaolre yaacarrontja narso matsiadalri, ima Njoa, pi-Minalri Dio, Dio cakerriakjédalrica Njoa. Noajintja namatsiacanaa njaji naferrinaipemi niini nocadaaca njerrapitaca namatsicanaa ikjaote njaji neenipe madalricoma njite njaji coatro coma tsakja njaji corriperri pia ioma Njoa,
10
njite nacananta pada yácoti matsia shopa pja narso njajiaimadan, narso njaji ipeyocape Njoa njite nanaitja cayoji Noaco nodananda icaite capisho.
11
Macaitetsa IMINALRI Dio ípitana nacó mikjapantsa, ima njorrapitetacaotsa jliaji icaitecada Noipitana nacó midalri ikjaotetsa.
12
Mamawadaca tsaotsa lrioya jliaji jalredaoca pawafeta carroda lrico, shenitaotsani norsowalreo.
13
Sei jalredaoca pirso pidejícarro pidejicalre;
14
mitsa siete jalredaoca nacó piwafetawa, pjienitanda Norsowaoni, Njoa, pi-MInalri Dio. Corriotsa pinaitjá carroca pada idejikjeti jliadaa jalredaoca-ca, corrin pjiaca, pirrí cantja, piitó, pirsodalri, pirsodarro, pi bueyni, pi borron,corri tsakja njaji vacan corrin jliaca jliaji inocada pada jiipai nkjoite yofacada iinai. Nawafetá carro tsakjaotsa piinai njaji atsianai njite inaitjepe tsakja pirsoperri.
15
Iwadaotsa egipcionai irsoperri piaca sha njepaite ricó, njite JLIAJI IMINALRITI jita sha njite Lricaapi Kjaidádalri sho njite Lricodaitaca sha. Cayoshopa JLIAJI IMINALRITI, Jliaji i-Diote lrinaa iwafetacawa sabado lricó.
16
Pinaitja matsia pjinirri, pjidoa irso irso, cayoji i-Minalri Dio inaa capisho sha, yofá carroatsa aima jalredaoca jecoapi ricó, lrinaco jliaji jiipai nocadaalri irso Njoa, IMINALRI Dio.
17
Mainotsa inaiki.
18
Manaitjatsa maatsi idada irso.
19
Mañaitotsa.
20
Macashatsa pikitsinda nacó.
21
Makemitsa pikitsinda irsonda lriipana lrico; makemitsa pikinda iino, corrin tskja lrirsodalri, corrin tsakja lrirsodarro, corrin tsakja lridejishopa buey, corrin tsakja lriborron, o coandalricatsa njaji lrirsonipe.
22
Icatsa njaji Yácoti kjemádalri lricaiterri JLIAJI IMINALRITI narso njaji iwacaaca-cápewa jiipana icodapi tiyé ipecolrikjoite, iyadaoca lrikjo, njite cadaocádalri lrikjoite; corrinatsa coca pja Lricaite. Njite Jliatsa idanana yamaita jipadaita nacó njite lriaca norsona.
23
Niini, jimi cádanaco Dios Iacoam imotolri cadaocadalri ipecolrikjoite, lrima cadana toa jliaji jiipana, cayo cádanaco natsomita njoa, njaji caconaperri njite njaji iipaneta poco jiwidaapo.
24
Icaite norso cayoji: ''Oopi wa-Minalri icada wacapa Lrimatsiaca melremelredalri njite Jlida, njite femica Lriacoam imotolri tiyé ipecolrikjoite; wacapaca panaya caaco cada Dio lrinaikite aimadan iapiya, nataitatsa cafi catsana.
25
Mitsa ¿Coadantja mayami fá? Ima jliaji tiyé macadalri lrimjaita caotsa fá; njite femi cada pja toatsa wa-Minalri Dio Iacoam, mayami caotsa fá.
26
¿Coca pja waoya njaji jimirri wa-Minalri Caafídalri Iacoam tiyé ipecolrikjoite njite corrin mayamina, cayoji femi capisho fá?
27
Nini pjia tsaotsa ia jimi coajica wa-Minalri Dio icaiterri; njite pidia watsa picaite pjiomi njaji wa-Minalri Dio icaiterri pirso; femiotsana njite wanaitjaotsana.''
28
JLIAJI IMINALRITI i-DIOTE jimi pjiomi njaji iacoti icaiterri norso. Lriaco norso cayoji: ''Njomi coajica nacaiteca njaji inaiki aimadan, coajica nacaiteca irso. Matsiatsa njaji yacoti nacaiterri narso.
29
¡Matsia Noají narso cada nacaolre ricó nanaitjá-carro Norso matsia, njite nanaitja pjiomi coajica Noaco icaiteca Narso, matsiá carroatsa narso pjiomi njite narso njaji neenipe caidalriwetsa!
30
Warsa piá picaitena cayoji; ''Idiawa ipanaita lricojle.''
31
Mitsa pjia, pino piema Nocodapi, njite nocaiteotsa pirso pjiomi njaji yácoti nocaaiterriotsa pirso, njaji yácoti panaitjaope, nonacalre picanantalriotsa inacona, nanaitja carrona pjiomi jalredaoca lrico naofá cádanaco lri-ricoda jliaji jiipai Nocadalri narso.
32
Niini pinaitjaotsa njaji pi-Minalri Dio inaalri pinaitjaca; mjena tsaotsa lriapowa ioya piyekema nacojle corrin tsakja inarroema nacojle.
33
Pjiepaotsa Lriaco caidalritsa nanaco njaji pi-Minalri Dio inalri inaitjaca, itaitá carroatsa iofacawa matsia, njite matsia watsa irso pjiomi njaji idenjirri njite wiá carroatsa iofacawa jalredaoca lrico lri-ricoda jliaji jiipai noalri irso.