Capítulo 4 - Moise icaitena kjaida coajica narsotsa njepaca Dio matsia
1
Pnaya Irael, jimi coajica irsotsa inaitjaca, njaji yácoti pinaitjaoda nocanantalriotsa inaco sha icamina jliaji, inaitjá carroatsa njaji yajirri watsa; itaitá carroatsa iofacawa matsia, shewa cádanacoatsa jipaite ricó iferrinaipemi i-Minalri Dio icadalri iyadá carroni.
2
Corriotsa iyatá carroca paana pja iacoti nanacojle njaji iacoti nocadalri irso, corrin tsakja jita cantja yácoti naoya, itaitá carroatsa inaitja cayoji nacaite capisho njaji yácoti Nocadaalriotsa irso Njoa IMINALRI Dio inaitja carrona.
3
Itji icapjenina coajica Dio inaitjaca Baal Peor imatsicana ikjaote; ima i-Minalri Dio iwayaketaca
ioya pjiomi njaji yacapempia jliapodam.
4
Mitsa sha corri perri imaca pia ioyawa i-Minalri Dio cafin toa sha panaya, icoanaa.
5
Icapa coajica nocanantaca pjia yacoti kjaidadalri inaco njite yacoti coají-carro paofacawa, cayotsaji NOMINALRI DIO icaite poaca njoa nonaitjá-carro lripecolrico jliaji jiiapica jliaji initalrina shewacawa iyadá carroni.
6
Niini, imatsieta inacoa jliaji yácoti inaitjá-carro cayoji nacaite capisho; ima icatsa pianjikjeca jliaji njite pianjirri inaco nacapa cawa njaji inaiki, njaji jimirriotsa nanaco njaji yácoti njite nacaiteotsa cayoji: ''ajádalri njaji inaiki aimadan pacua inaiki iyacalre cajikjé-perri, yajicape pjiomi.
7
Corrin pacapa pacoa yacaalre macaite irsocada nadiote corridalritsa imacana, cayodalriji wa-Minalri Dio icayosho jliaji jimicada warso waoma cádanaconi.
8
Corrin pacapa pacoa yacalre macacoe irsocaé yácoti kjaidaperri icaoitecape cayoji paoma capisho cayoji irsocapisho shá panaya.
9
Icamitsa piwapa pjimi matsia piicao, pimatsietá-carro pinacoa cayekjatsa, wadee pimaodacaca naoya njaji pitji icapalri pia, wadee piñetaca picaolre ioya caafi cádanaco toa pjia. Picanantaotsa nanaco pienipe irso njite narso njaji pienipe yénipe.
10
Jliada pia noemacawa pi-Minalri Dio ipeyajle Horeb lricó, lricaite cádanaco pia Njoa JLIAJI IMINALRITI cayoji: ''Piwaketa Norso pjiomi njaji inaiki nocadaa carroatsa njemi Noaco, nají carroatsa nanaco njite nafio carroatsa Noiwana cafi cádanacona jalredaoca lrico, njite nataitá carroatsa nacantaca neenipe.''
11
Pitsomitani njite piema jiipana icodapi. Njite lrimacawa jliaji jiipana tiyé macadalri jirracadawa eenolricojle, njite lricadaa iyadaoca cadaoca-dalri.
12
Caaco irso JLIAJI IMINALRITI tiyé rikjoite; jimi coajica lriacoam icaiteca, mitsa corrin icapa coandalrica jliaji caacolri irso; icamitsa jimica lriacoam
13
Lricaite jimi matsia lrinaco jliaji Yácoti lrinaitjanda iapiya shepá carroni, njaji die Injakjeti. Lridana piacana yamaita jipadaitape nacó.
14
JLIAJI IMINALRITI lrinaa pia jliawajli nocanantá-carro sha nanaco njaji yacoti inakjeti lrinashopa fa, itaitá-carro shepacana matsia lri-ricoda jliaji jiipai iyoetalrina ikjaolre jipá carroena iyadawa.
15
Niini icapatsa ioyawa ima corri piaca cocaca jinapjiami icapalri caaco caojli pia irso JLIAJI
IMINALRITI tyé ipecolrico Horeb lricó.
16
Corriwatsa inaitjá carroca coca jinapjiami irsowawa coca sho cantja icapacana, atsia icapacana cantja o inarro cadaa,
17
o maficalri jinapjia cada jalredaoca lricoda, o njenapjia cada njaji yarrajicapewa eeno yecoa nacó,
18
o njenapjia cada njaji maaficalri iacapewa nacoda sho jiipai nacó, o copje jinapjia cantja njaji ooni ricope o jipai yapjitepe.
19
Corriotsa picapá carroca yenonrse piá-carro matsiadalri jérri irso, o kérri irso, o jiwirsida irso cadaa, corrin tsakja narso njai tsolrodaonai aimadan eenolricojlé-perri, wadentja iomaca iaca narso matsiadalri, ima Dio inaitjajica narsowalre pjiomi njaji inaikinai jalredaoca lricoperri.
20
Mitsa Dio jipa idee sha lrioya jliaji jiiapi nacada cawa pia idejica jamówerrico cayoji padeji capisho tsipalra tiyé yarroda lricó, Egipto lricoda, lrinaikité-carro sha, lriyape catsa, cayo carroena sha panaya sho.
21
Kerroa noapiya JLIAJI IMINALRITI ikjaote; Lricaitenorso yacoti ajá-dalri sho corricaotsa noyoeta iinai jliaji Ooni Jordán, njite corricaotsa njoewacawa lri-ricoda jliaji jiipai matsiadalri, Jliaji i-Minalri Dio icadalri irso iyadá carroni.
22
Icatsaotsa mayamica njoa lri-ricoda jiipaica jliaji; corrin notaita noyoetaca jliaji Ooni Jordán; mitsa pjia dekjaotsa jiyapawa njite piyadacaotsa jliaji jiipai matsiadalri.
23
Iwapa jimi matsia icao, wade lriñaca ioya jliaji yácoti Lrinaitjalri iinai Jliaji i-Minalri Dio, wadentja inaitjaca irsowawa coca jinapjiam cantja Jliaji i-Minalri Dio ifarrolri ioya inaitjaca.
24
Ima tiyé iwayaketa cadaca pjiomi Jliaji i-Minalri Dio, Dio cakerriakjé-dalricani.
25
Irso cádanacoenaotsa yénipe, njite idakenaina, njite wiá cayamina iofacawa lri-ricoda jliaji jiipai, njite imatsicaacawa jiwacatsa njite inaitja irsowao coca catsa jinapjiami inaitjá-carro maatsi i-Minalri Dio ipeyajle ikerroatá carrotsani.
26
Nocaiteca irso panaya eeno icapawe-rico njite jiipai icapáwe-ricó, kjeyacaotsa iwayacacawa lrioya jliaji jiipai jipalriotsa iyadawa icamina iyoeta cádanacoa jliaji ooni Jordán, corriotsa jalripá carroca iofacawa lri-ricoda, icamitsaotsa iwayacacawa lrioya.
27
Jliaji wa-Minalri lricadaotsa iacawa napecolrico njaji apacoa inaiki iyacalre iofá carroatsa nirse, corrinatsaotsa aimadan carroca sha yalriotsa iofá niini.
28
Icatsaotsa iaca matsiadalri na-diote irso, nanaitajnda jaico sho, jiipada sho, atsianai inaitjaji, njaji dionai corri-perritsa itaita icapaca, corrintsakja njemica, naiñaja njite corrin tsakja nataita nemjiaca.
29
Mitsa nirse cadanaotsa sha, iomaotsa JLIAJI IMINALRI Dio, njite ioketaotsani, ioma cádanacoatsani icaolre sho njite icafica sho.
30
Ikjeyapita cádanacoatsa, njite naoca cádanacoenaotsa inaco jliaji nocaiterri, pekirri cádanacoetsa sha, idia tsenakjaotsa ioma Dio njite jimicaotsa coajica lricaiteca irso.
31
Ima Jliaji i-Minalri DIo kjenaitetsa icapaca parsó; corriotsa Lrimacá carroca shá, corrin tsakja Lrimaodacá carroca lrioya jliaji Yácoti lrinaitjalri yácoti ajádalri sho narso njaji Jinirrinai oopi.
32
Panaya notatja njomio shá, njaji inaiki ipeyajle-perri pia, njaji Lrinaiji ipjeya toa: ¿Jliadá nakjoite pia Dio inaitjca njaji inaiki jalredaoca lrico, pema eeno inomapiana nakjoite pema nacojle, itatjaotsa jimi nanaco njaji macapa canaperri icapalri, jimirri?
33
¿Capja pada pia inaiki oopi jimi pia caaco Dio tiyé ipecolrikjoite, cayoji jimi capisho, njite inaitja cayoji jimi capisho?
34
¿Capja Dio ianjí tja ioma iniwana inaiki naoshete njaji apana inaiki lrinaikité carrona, matsicalri ricó, manaitjacanapeeri sho, o nacapa capoa matsiaperri, o oowi ricó, o nacapa capoa jliida, o jlia capoa idanatana, o lricadaa capoa nacapa coajica cafainadalri cani; cayoji lrinaitja capisho ikjaote Jliaji i-MInalri Dio Egipto lrico, njite icapatsa njaji lrinaitjalri?
35
Lricadá icapá- carro njaji nocaiterri, yanjí-carro Dio-ca Jliaji IMINALRITI, corrica pacapa apada pja Lrioya cadalriji lricayoshó.
36
Teeco lriofacawa ioya Lricadaa jimíca lriaco, Lritaitácarro lricanantcaca shá jliwacatsa; lri-ricoda jliaji jiipai Lricadalri icapa jliaji tiyé macádalri Lrinakjoité-dalri; jimica llriacoam tiyé ipecolrikjoite.
37
Ima Lripyo piaca njaji jinirrinaipemi, Lriniwana njaji njapodamperrimi mayami cayaminana njite lrideca sha Egipto ioya jliida kjaidadalri sho lriofacawa lrikjoitetsa,
38
lripecó-carro ioya njaji yacaalre macacoepe njite kjaidaperri pjaca ioya, Lridee carroena sha cayoenaji panaya sho lriá-carro irso jiipai iyadawa.
39
Niini njaji piajirri panaya picadana picaolre ricó, pianjikena Dioca Jliaji IMINALRITI eenocoma nacojle, njite jalredaoca lrico tsakja; corrin oacapa apada pja lrioya.
40
Pwapaotsa matsia pinacoa njaji yácoti njite njaji inakjeti nocaiterri inaitjaca panaya, matsia carroatsa sha panayaperri njite njaji yenipe shapodamperri, wiá carroatsa iofacawa jalredaoca lrico lri-ricoda jliaji jiipai i-MInalri Dio icadalri irso caidalriwetsa.
41
Njitedalri, Moise shenita madalricoa yacaalre Jordán pemajle, jérri imotokema,
42
naacawajle nadawaacawa njeponda ioya njaji inocape naiki corricapjitetsa lriomacalreca; icatsa nacawa toa yomjena nirse.
43
Icatsa neepitana njaji: Beser, yacaalre yemacada jalrapocolri ricó, jliaji jiipai pacoaca caita, narso njaji Robén poco; Ramot, Galaad lricoda narso njaji Gad poco; njite Golán Basán lricoda, narso njaji pamoyoa-perri Manase poco.
44
Icatsa njaji yácoti kjaidaperri Moise icadalri narso njaji inaiki aimadan Iraelnai;
45
icatsa njaji yacoti paofashopa paofacawa matsia lrinacodalri jliaji yácoti Dio inaitjalri, yácoti kjaidaperri, njite apana yácoti lricaiterri narso njaji Iraelnai aimadan namoto caojli pia Egipto lrikjoite,
46
naofa caojli pia jérri imotokema Jordán irso, jiipai pacoacaita cawa irso jliaji Bet-Peor dalri, Sehón jipaite, amorreonai italricana, jliaji Moise naapiya njaji Iraelnai shametaji namoto caojli pia Egipto lrikjoite.
47
Njepa njepaitemi nayada capisho, njite Og jipaitemi tsakja, Basaán italricanaa. Icapiatsa njaji yamada talricanaatinai amorreonai, njaji iofalri pia Jordán lrico jérri imoto kema nacojle.
48
Lriawa jliaji jiipai Aroer lrikjoite, pacoacaita cawa lrikjoite jiipai Armón-dalri inomapiana lrico. Jiipana Sión nacojle (jiipana Hermón),
49
jlipa pjiomi pacoacaitacawa jiipai ooni Jordán dalri, teeco Jordán inomapi ioya jérri imotokemjete, Manoa Arabá lricojle, lriyofieta jiipana Pisga itajida.