Capítulo 3 - Iraelnai shameta Og, Basan italricanaa
1
Njitedalri wadiawa wá-carro Basaán lricojle. Niini Og, Basaán italricanaa íno lrinoacá-carro wakjoete yacaalre Edrei lrico, jlia njitenaapiya pjiomi njaji lrinaikite.
2
Lriaco norso Jliaji Iminalriti: ''Mafiotsawa, ima opikena Nocadaa shamácarrona, Nocadenina sha-carro yanjí nanaco njaji nayacalrem, njite njepaite naco. Cayoatsa pinaitjacana pinaitja capoisho Sehón irso, natalricana njaji amorreonai, yofacape pia Hesbón lrico.''
3
Niini Waminalri Dio icadaa famaca njaji Og, Basaán italricanaa, lricadaa wacaapi ricó pjiomi nayacalre. Waino pjiomina, corrin coca wacadaa caafi nanakjoite.
4
Jliawajli pia feta naoya pjiomi nayacalre; corrin pacapa pacoa yacalre corridalrintja feta naoya; sesenta yacaalre padeniiri, pjiomi njaji Agrob lricope, Og italricanatacawa Basán lricó.
5
Njaya yacaalre taimí-perri iwai, yenomperri tsakja; capananoma-perri irsocape naitashopa taimí; nacodapi perrica njaji yacaalre aimaperri marsocapetsa nawai.
6
Wapeco pjiomina, cayoji wanaitja capisho Sehón, Hesbón italricana, wawayaketa pjiomi nayacalre, pjiomi atsianai, inaitjepe, njite pjiiomi njaji yempetipe.
7
Mitsa pjiomi njaji navacan njite njaji nayarroaji nayacalre ricoperri, fepa warsowao nayarro.
8
Jliawajli pia fepa nacapi lrikjoite njepaite njaji yamada talricanatinai Amorreonai, njaji pemajle-perri Jordán irsó. Pacoacaitacawa jiipai lrikjoite Armón dalri, Jiipana Hermón lricojle.
9
(Jliaji Jiipana Hermón njaji Sidonionai nají piacani Sirión, njite njaji amorreonai nají piacana Senir)
10
njite pjiomi njaji yacaalre malritsicoa lricoperri, pjiomi Galaad njite pjiomi Basaán lricoperri, pjiomi njaji inipo caji lricoperri yacadawa Salca njite Edrei lrico, njaji yacaalre Og italricanatacawa lrico pia Basaán lrico.''
11
(Ima nanakjoite njaji inaiki macanipe Refain lricoperri, icamitsa Og, Basaán italricanaa jliaji iofalriwa. Cuatro metro njite paita pja lrinacojle pia lriorsoacarroita jiwalripaca, yamaita metro lrimacaiteca, nini piacatoana Rabá lrico nayacalre njaji amonitanai.)
12
Njaji jiiapi fepalri pia warsowao jliawajli pia, Aroer lrikjoite, pacoacaitacawa jiipai naco kema Amón lrico, njite pamoyoa pja jiipana lrima kema Galaad lricope, pjiomi nayacalrem. Noaca narso njaji Robén poco, njite narso njaji Galad poco irso.
13
Njite Galaad inacope njite pjiiomi Basaán, Og italricanatacawa pia, noaca narso njaji pamoyoaperri Manase poco: pjiomi Argob cawa njite pjiomi Basaán tsakja. (Jliamitsa jiipai najirrica Refaim).
14
Jair, pada nanakjite njaji Manase poco, njepa narsowao pjiomi Argob kema, teeco lriocawa Gersonitanai jipaite iocacawa nacojle njite njaji Macateonai. Niini lricadaca padenakja neepitana njajia jiiapi, coshoca Basaán tsakja, Havot Jair, ate panashete toa.
15
Noa Galaad Maquir iorso.
16
Njite narso njaji Robén poco njite njaji Gad poco, noaca njepaitewa Galaad nakjoite teeco pacoacaita cawa nacojle jiipai Armón dalri, pamoyoa nacojle jliaji pacoacaitacawa jiipai icatsa njepaite jinaa iocawa, njite lrinakjoite Ooni Jaboc nacojle, njepaite jinanena njaji Omón inakjoité-perri.
17
Pada tsakja njepaite iocacawa jina icatsa jliaji jiipai pacoacaitadalri Ooni Jordán lricoda, Cineret nakjoite Manoa Arabá lricoda nacojle (jlia minitsa najirrica Manoa Piwajai) teeco Jiipana Pisga itajida nacojle jerri imoto kema nakjoite.
18
Cayo nocaiteca narso jliawajli: ''Iminalri Dio icadaca irso iyadacarro jliaji jiipai; pjiomi sha, pjiomi njaji inoacacapewa oowi ricó, nja watsa iawa ipeyajle sha nakitsiñape, Iraelnai.
19
Mitsa njaji ininai, yenipe tsoperri toa njite ivacani (noajintsa aimaca njaji ivacan), icatsaotsa naofacawa iyacalre ricó njajim noajina irso,
20
a kjerre caotsa Dio icadaotsa naofa namaodaca njaji ikitsiñape njepaite ricó, cayoji Lrinaitja capisho iapiya, a kjerrecaotsa Dio icadaotsa njepaitewa Jordán pemajle; icatsaotsa itaita idiacawa pjiomi sha atsianai jipaite lricojle nocadaji irso.''
21
Nocaite pia Josué irso jliawajli, cayoji: ''Picapjenina pitji sho catsa pjiomi coajica pi-MInalri Dio inaitjaca narso njaji talricanatinai; cayo tsakjaotsa Dio inaitjaca narso njaji talricanatinai jipaite pjiyapalriotsa nirse.
22
Mafio tsaotsa naiwana, ima jlia tsaotsa inoaca pikjaote Jliaji pi-Minalri DIo .''
23
Notatja pia DIo inai jliawajli caiwi ricotsa cayoji:
24
"Pjia no Diote matsiadalri, Picañjata kena pirsodalri icapa pimacadalrica, pjiida tsakja; ima, ¿capja niinica apada dio eeno lricojle itaita cáda inaitjaca cayoji Pinaitja capisho, kjaidá-perri cayó picayosho?
25
Picada noaca nirse, notatjaca piinai caiwi lricotsa, nocapá-carro jliaji jiiapi matsiadalri pacapalri Jordán pemajle, matsiacoe cawa jiipana lrima njite Libano tsakja.''
26
Mitsa kerroa piaca wa-Minalri noapiya ikjaote; Corrin Jlimica norso. Lriaco norso jliaji no-Minalri: ''Ajena pjia pjia nooya, ajena picaiteca Norso lrinaco jliaji pitatjalri Noinai:
27
Pjirrawa lrinaco jliaji Jiipana Pisga njite pjirreta picapa jérri shewa kema nacojle, lrimoto kema nacojle, atsia lriema nacojle njite inarroema nacojle tsakja; picapá-carro tekjoite tsa, ima corriuotsa piyoetá carroca jliaji ooni Jordán.
28
Picananta matsia Josué piarrontacao, pjirreta lriwaopiakje njite pipomenatani, ima jliacaotsa njewidapo njai inaiki, jliawatsa iá naapiya lricada carroatsa nayadawa jliaji jiiapi picapalriotsa.''
29
Njite wemacawa pacoacaita cawa naco jiipai, Bet-Peor icoawajli.