¹ Iwadaotsa jliaji kérri Abib, njite iñjaotsa jliaji Iñjaodati Pascua nacoda i-Minalri Dio irso, ima Abib ikerrina naco piaca Dio jita sha Egipto lrikjoite deepi ricó. ² Ínoatsa jliaji maficalri Pascua icaonada i-Minalri Dio irso njite apanape tsakja maaficalri ípirra nakjooite ofrendawa inócarroatsana lri-ricoda jliaji panti i-Minalri Dio iniwacawa a kjerrecaotsa lriemawaji. ³ Iñjaotsa peetje mewitetsa jliada; Siete jalredaoca watsa iñjacawa peetje mewipetsa, jliaji peetje iwada carrona piaca jirrapitaca aima; ima kjeyaca imotocawa Egipto jipaite lrikjoite. Caidalritsata inaitjacani cafi cádanacotoa sha iwada-carro jliada pia imotocawa Egipto jipaite lrikjoite. ⁴ Corriotsa pacapá carroca mojloi pjiomi jiapite jinaa iocacawa siete jalredaoca icoa; corrin tsakja itaita icadaca tjewaijle icaona jliaji maaficalri ípe inonda Pascua inita cadaawa dainoma nacojle. ⁵ Corrin itaita inoca njaji maaficalri Pascua nacoda pada yacaalre ricojle jlioya jliaji pi-Minalri DIo icadalri irso. ⁶ Icamitsa itaita ínoca maficalri Dio ipana lrico lri-ricodadalri jliaji yacaalre Dio iniwananda irso. Icatsa ínoca njaji maficalri Pascua nacoda dainoma nacojle, jape cádanacoena, jlinana lricotsa imotoca walria pia Egipto lrikjoite. ⁷ Iyanaotsana njite iñjaotsa Dio ípana lrico lriniwanacawa lrico Jliaji i-Minalri Dio; njite piyompinacoena pitaita pidiacawa piipana lricojle. ⁸ Siete jalredaoca watsa piñjacawaotsa peetje mewiperritsa; njite siete jalredaoca nacojle watsa iwacacawatsa aimawa i-Minalri Dio irso; njite corriotsa idejí caroca jalrewerrico. ⁹ Iniwetaotsa siete semana, inita caojli pia iyoaca ipaniapji iniwá-carro nainaca; icatsa iniwetacaotsa njite. ¹⁰ Njiteotsa icatimataacawa nanaco njaji semana icatimataaca carroa i-Minalri Dio naco nasho njaji ofrenda idejicalre icoada ideji icaolre rikjoite, cayotsaji i-Minalri Dio icadaa capisho irso matsiadalri. ¹¹ Picatimataacawa piMinalri Dio ipeyajle; pjia, pienipe atsianai njite pitonaipe, pirsoperri atsianai njite inaitjepe, njaji levitanai piyacalre ricoperri, njaji inaikinaitsa pioya, njaji maoñjerrinai, njite njaji madoiyoanaipe picodapí-perri, lri-ricoda jliaji yacaalre pi-Minalri Dio iniwacawa pirso, Lriipana lrico. ¹² Irsotsa iwadaca coaji piaca sha narsoperri cádanaco Egipto lrico; irsotsa iwapaca icapa matsia inaitjá-carro nacaite capisho njaji yácoti inacoapana-perri. ¹³ Siete jalredaoca watsa icatimataacawa lrinaco jliaji icatimataaca carroa inaitja cádanaco pantitape iofa carrodawa toa, iniwa cayamina njite imatsieta njaji ipania ínaca iñjaope njite írraope tsakja. ¹⁴ Catimawatsa sha icatimataaca carroa lrico, pjia, pienipe atsianai njite pitonaipe, pirsoperri atsianai njite inaitjepe, njaji levitanai piyacalre ricoperri, njaji inaikinaitsa pioya, njaji maoñjerrinai, njite njaji madoiyoanaipe picodapí-perri piyacalre ricoperri. ¹⁵ Siete jalredaoca watsa picatimataacawa pi-Minalri Dio ipeyajle anji lriniwanacawa lrico Lrirsowawa, ima pi-Minalri Dio inaitjaotsa matsia pirso nanaco njaji pipania, njaji pidejicalre, njite pjia icamitsa picatimataacawa matsia. ¹⁶ Madalripia watsa nacañjataacawa pi-Minalri Dio ipeyajle njaji pinaikite lri-ricoda jliaji Lriniwananda Lrirsowawa: icatimataaca carroa Pascua lrico, iñjacawa peetjde mewipetsa; Icatimataaca carroa lrico Semana nacopdedrri; njite Icatimataaca carroa lrico nanaco njaji Idawaaca carroadawa lrico; njite corriotsa iácarroca i-Minalri Dio ipeyajle icaapi yapiyatsa. ¹⁷ Pjiomi njaji inaiki narsotsa nadeeca pi-Minalri Dio irso njaji pitaitaji pideeca Lrirso, nininaotsa picapa coaji caotsa pi-Minalri icadaa pirso aima matsiaperri. ¹⁸ Picadaotsa caconaperri, talricanaatinai iyacalre icoami pi-Minalri Dio icadacawa iofacawa; niiniotsa fetacatsa nacoanam nakjoite njaji Irael poco, nja carroatsa icaite naacona matsia njaji inaiki aimadan. ¹⁹ Corrin pitaita piomaca picoadawa pjida shotsa; corrin pitaita pikitsindataca apada pada ioya lricaoña capoa pjia, ima njaji jipacaperri nacoadawa nacaité{carro pada iacona ima corrica lrianjinatsa matsia, ima tecojle kenakja lricapaca lrioya jliaji matsiadalri. ²⁰ Pirsotsa pinaitja minicatsa matsia, icamitsa pinaitjaca njaji matsiaperritsa, pitaitá carroatsa cafica sha njite piofa carroatsa lri-ricoda jliaji jiipai Lricadalri pirso jliaji pi-Minalri Dio. ²¹ Corrin itaita inaitjaca irsowao coandalri catsa nadiote aserá jinapjiami, lricodapitsantja jliaji altar pinaitjanda pirsowao pi-Minalri Dio irsowawa. ²² Corrin pitaita pinaitjaca pirsowaocoandalri catsa jinapjiami jiipada matsiadalri shontja, njaji matsiperri icapaca irso Jliaji pi-Minalri Dio.