Capítulo 15 - Jliwalria nacadaa cawa nacoentoni jiyapacawa nakitsinda irsonda naapiya
1
Siete walria iwayaca cádanacoatsa, pirsotsa pimaodacaca nacuentoni ioya njaji idewe-cape pia pjiá.
2
Cayoatsa inaitjaca: icoanami sha icodapí-perri jitaji iinai palrata; corriotsa lricaité carroca lriacona jliaji lricodapí-dalri o lrikitsinda nadewenda nacó lrirso ima Dio inaaca neñetá carro naoyani.
3
Njaji inaiki tekjoité-perri nja dekja irsotsa icaoñaca jliaji nadewecalre, mitsa naoya njaji pikitsiñape, pirsotsa piñetaca naoyani.
4
Niinimtja, corritsa pacapá carroca kjenaperri ipecolrico (ima Jliaji i-Minalri lrinaitjaotsa matsia irso lri-ricoda jliaji jiipai Lricadañri iyadá carroni),
5
cayoatsa nocaite capisho shepa cadaaa ajádalri Jliaji i-Minalri Dio, inaitja cadaa cayoji nacaite capisho njaji inakjeti nocaiterri iorso panaya.
6
Lrinaitja cádanacoenaotsa irso Jliaji i-Minalri Dio cayoji Lricaite capish; yacatoatsa iyarro nakjoite aima inaki irso pada jiipai nacoperri, mitsa pjia, corriotsa pitatjá carroca nainai nayada nakjoite; pitalricanata caotsa aima jiipai nacó, mitsa corriotsa natalricanatá carroca pinaco.
7
Niini cada ape atsia kjenadalri ipecolrico, pada inakjoite iyacalre ricó, lri-ricoda jliaji jiipai Jliaji i-Minalri Dio icadalri irso, mjerrapitetatsa jliaji pikinda wadee corrica pioma pikitsindataca jliaji pikitsinda kjenadalri;
8
mitsa noajintsa pikitsindatacani njite pia catoatsa lrirso lricoa lrirso njaji canacaiperri lrirso.
9
Picapaotsa pioyawa wadee pirsoca pada iwaopiakjeti matsidalritsa picaolre ricó, picaite cantja cayoji: ''Siete walria lricó, jliaji oonia pañetacawa pada idewenda parso, tsoomikenani,'' wadentja matsica picapaca pikitsinda kjenadalri irso njite corrintja coca piá lrirso; ima lritaita lricaiteca piacona Dio irso, njite icatsantja pimatsicanaca Dio ipeyajle.
10
Noajintsa pirsocatsa piaca lrirso, njite corrin pitaita pinonataca picaolre lrikjaote jliaji pialri lrirso, Jliaji pi-Minalri Dio matsia watsa lrinaitjaca pirso pjiomi pidejicalre naco pinaitjaji picaapi shó.
11
Corritsaotsa coancaojlica nawayacawa njaji kjenaperri jalredaoca lrico; cayoshopa nocaiteca pirso cayoji: ''Pirsotsa caponca pjia pikinda iinai, njaji kljenaperri, jliaji canacaidalri irso piyacalre ricoda.''
12
Ape pikitsinda, hebreo tsakja picayosho, o apama inarro hebreo tadoa, nawende pirso njite nadeji pirso sei walria, njite siete walria lrico pirsotsa picadaaca nawa pioya, corrinatsa pjiaca naminalri.
13
Picada cádanaco naca pioya, macadatsa nacawa njenaa lricotsa.
14
Pirsotsa piaca narso pípirra nakjoite, piñjaope nakjoite aima sho, njite pirraope nakjoite. Ima aimaca pi-Minalri Dio iaca pirso, niini pirsotsa piaca lriso nanakjoite.
15
Pirsotsa pianjica narsodalri piaca tsakja pjia oopi Egipto jipaite lrico, pi-Minalri Dio jitalria pia ioshete; cayoshopa panaya Nonaca pjia pinaitjá carro cayoji Nocaite capisho panaya.
16
Mitsa corricada lrioma lriaca pioya, lripeyo capoa pjia njite piipaneta, matsia capoa lrianjí lriofacawa piinai, cayoatsa pinaitjaca,
17
pjipaotsa pada kemjewi pijolrontá-carro jlieni atsia lriema panti-inomakja nacó, icatsaotsa cayo pirsodalricani piketem. Cayo tsakjaotsa pinaitjaca rsoaji inarro, corricadaa roma roaca pioya.
18
Maifarrotsa lriaca pioya jliaji pirsodalri, ima lridenjinina pirso sei walria njite yamapiape pjaaca lricaoñaca pirso naoya njaji pirsoperri picaoñaji irso nadejicalre icoada. Jliaji pi-Minalri Dio inaitjaotsa pirso matsia pjiomi njaji pinaitjalri.
19
Pjiomi njaji initacape imotocawa naoya njaji pípirra pirsotsa pjienitacana pi-Minalri Dio irso. Corriotsa pidejí carroca nasho njaji initacape imotocawa naoya njaji pípirra, corrin tsakja piyoá carroca neeyo.
20
Pawalria icoam piñja caotsa piipaneta yapiya Jliaji pi-Minalri Dio ipeyajle, akjerrecawajle cada lriniwana pirso pinaitjaca piipanawa.
21
Lrirso cada lrimatsica, pokjondalrim cadaa, o matjidalri cadani, o coandalricatsa lrimatsica, corriotsa pitaitá carroca pinocani Jliaji pi-Minalri Dio irso.
22
Pñjaotsani piyacalre lrico; nataita naiñjaca pinai njaji inaiki matsiperri njite njaji matsiaperri, piñjaotsani paiñjacaji nerri tsoni o macani.
23
Icamitsa corrin pitaita piñjaca lrirranafie; pirsotsa picadaaca lrirrana yarroa jiipai rico ooni capisho.