Capítulo 14 - Irael, Dio inaiki jlienitaji Lrirsowawa
1
Inaiki aimadanca sha i-Minalri Dio iyarrope. Corrin itaita iyoaca idada nacó, corrin tsakja itaita jirritaca itsicolre, inonaa capoa sha mayamperrim ikjaote.
2
Ima inaiki aimadanca sha i-Minalri Dio shenitajica sha lrirsowawa, Jjiatsa iniwana sha naoshete njaji apana inaiki aimadan Lrinaitkié-carro shá.
3
Maiñjatsa njaji Dio ifarrolri iñjaca.
4
Icatsa njaji maaficalri itaitaji iñjaca: Buey, oveja njite cabra;
5
nérri catsowani, nérri tsoni, doito, pjiomi maficalri iñjacaperri malritsi.
6
Itaita iñjaca njaji maaficalri botamperri itsota njite idiacape imotoita naiñjanda nawawa lrikjoite nanoma lricojle tsenakja neñjacotá-carro pja.
7
Mitsa, niini tsakja njaji maaficalri botamperri itsota njite idiacape imotoita naiñjanda nawawa lrikjoite nanoma lricojle tsenakja neñjacotá-carro pja corri-perritsa itaita iñjaca, icatsa njaji: camello, conejo, conejo tsoni; ima namotoita tja naiñjanda nawawa lrikjoite nanoma lricojle tsenakja neñjacotá-carro pja mitsa corripetsa matsiaca iljaca ima mátsica irsona.
8
Jliaji cootsi, yamaitja tja njaji lritsota mitsa corrin namotoita naiñjanda nawawa lrikjoite nanoma lricojle tsenakja neñjacotá-carro pja; maaficalri matsine tsa irso. Maiñjatsaotsa neepe, corrin tsakja itaita inotaca cotsi idada mayandalrim.
9
Njaji caafiperri ooni ricoperri itaitalritsa iñjaca. Njaji irsocape nañopje njite cafí-perri, macapawan lricoperri o tsoopeki lricoperri.
10
Mitsa corri cada narso nañopje njite corrin tsakja narso nafí maiñjatsana; maaficalri matsiperritsa iraso.
11
Njaji kepirre matsiaperritsa itaita iñjaca.
12
Mkitsa icatsa njaji kepirre corri petsa itaita iñjaca: Jáwa, terremalri, pérri iñjacaita copje,
13
wayolri irraini jitaco, wayolri itani, pjiomi njaji perriapa shoperri.
14
Corrin itaita iñjaca njaji wayolri shoperri,
15
Coitsi macani, terreterrepalri, cacoe, pjiomi njaji perriapape depi ricope,
16
bococolri tsoapalri, poopolri macani, poopolri jalrene,
17
malriapa, wayolri, mañoñopalri.
18
Corrin itaita iñjaca tjawa, coandali catsa nanakjoite njaji malriapape, pítirri, pími shoperri.
19
Pjiomi njaji canapje-perri, pjiomi njaji yarrajicapewa papocotsa matsiperrica irso; corrin itaita iñjacana.
20
Icamitsa itaita iñjalrica njaji matsiaperritsa nanakjoite njaji yarrajicapeo.
21
Corrin itaita iñjaca njaji maficalri mayamirri jiwacatsa; iawatsa narso njaji apanatsa inaiki ioya iofacape iyacalre ricó, jlia dekja itaita iñajacana; o piwende tsakja narsoni njaji inaikitsa ioya. Ima pana inaiki shenitaaca capewa i-Mkinalri Dio irso sha. Corrin itaita iyanaca cabra yenipe jlidoa ínia lricotsa.
22
Irsotsa iaca diezmoa nanakjoite njaji ipania ínaca, njaji iniwaji mana ikiníkerre lrikjoite jámolri icoam.
23
Iñjaotsa i-Minalri Dio ipeyajle Lriipana lrico, jliaji lriniwananda irso njaji ipania idiezmo nakjoite, njaji jaicotjeda iana irraope njite aceite tsakja walriajaipe, njite ipirra yenipe inicape imotocawa; icatsaotsa cayo irsotsa yetsica iaca matsiadalri i-Minalri Dio irso.
24
Njite i-Minalri Dio icada cadaa irso aima matsiadalri, mitsa teecotoa iocá carrowa lri-ricoda jliaji Dio ípana lriniwanacawa lripia,
25
niniotsa piwende watsa njaji pi-ofrendani palrata sho, pjipaotsa njaji ofrenda matsia, njite pideena Dio ipina lricojle Lriniwanacawa lricojle jliaji piMinalri Dio.
26
Nireseotsa pitaita piwentaca cocacatsa pioma piwentaca: buey cadaa, oveja cadaa, o piwenta cadaa pirrao potiyajao o capoajai, cojicatsa pinaitjaca nasho; o pijoitacacawa naapiya njaji piipaneta pi-Minalri Dio ipeyajle.
27
Mamaodacatsaotsa lrioya jliaji levita iofalri piyacalre ricó, mamacatsani, ima corridalrica irso jlipaite iinjai lriyadawa.
28
Madalriwalria iacoami, pirsotsa pideeca njaji pidiezmoni piketemwalria ricó, njite piwaketaotsana
piyacalre ricó;
29
njite jliaji levita, cotsa irsocadaca lriyadawa iinai, cayo tsakja njaji inaikinaitsa ioya, njaji maoñjerrinai, njite njaji madoiyoanaipe piyacalre ricope, nanoatsa piderse naiñjá-carro njite kepinapeotsana. Pinaitjaotsa cayó pi-Minalri Dio icadá carroatsa matsiadalri nanaco pjiomi njaji pidejicalre.