¹ Njite jliaji profeta Eliseo iako pada profeta irri irso: ''Pimatsietacawa pia-carrotsa Ramot lrikojle, Galaad lrikoda. Pideotsa picaapi riko jliaji aceite lriarroda fie. ² Pioca cádanakoatsa nirse, piomaotsa jliaji atsia Jehú dalri iipitana, Josafat irri, Nimsi irri. Pjiewaotsa lricjaolre njjite pinaotsa jlinikocawa lrikitsiñape ioya, njite pinaotsa jliewaca piapiya pawajle panti riko. ³ Pjipaotsa jliaji botélla njite piarroatsa jliwida nako botélla iitada aceite, njite picaite lrirso cayoji: ''Cayo lricaiteca jliaji wa-Minalri: ''Nocadaaca pjia, pjiá carro Irael italricanaa.'' Njite pimjekoatsa pantinoma, piekoatsa cjaida; meematsaotsa koancawaca.'' ⁴ Ikena jliaji profeta iempetitoa, iawa Ramot lrikojle, Galaad lrikoda. ⁵ Lrioca cádanako nirse, lricapa naofacawa papokotsawa njaji tsolrodaonai icapitamanai. Njite jliaji profeta iempetitoa iako narso: '' Pjia capitama, nodeeca pada iakoti pirso.'' Njite Jehú jiepani, lriako: ''¿Koandalri wanakjoite irso?'' Njite jliaji profeta iempetitoa iako: ''Icatsa pjia.'' ⁶ Ikena Jehú jinikocawa jliewa-carro lriapiya panti rikojle, njite jliaji profeta iempetitoa jipa iarro aceite Jehú jiwida nako, njite lriako lrirso: ''Jliaji Dio, Irael italricanaa, iako cayoji: Icatsa nocadaaca pjiá, pjiá carro nonaikite aimadan italricanaawa, nanako pjiomi njaji Iraelnai. ⁷ Piinoatsa pitalricanaa Acab iipaneta, nocacoadata-carroatsa njaji norsoperri profenai, njite nakoadawa pjiomi njaji Dio norsoperri Jezabel inaji nainoca. ⁸ Korrinaotsa pacapá carroketsa pada Acab iipaneta inakjoite perri. Korriotsa caafi carroca pada iepeti atsiada Acab iipaneta lrikope, narsodalri ienipe cadaa o korridalritsa narsodalri can. ⁹ Nonaitjaotsa Acab iipaneta nonaitja capisho Jeroboam, Nadat irri iipaneta, Baasa, Ahia irri iipaneta sho tsacja. ¹⁰ Njaji tsiino iñjacaotsa Jezabel, njite korriotsa koca pacapa idawacaodano irrirríriko.'' Cayotsa jliaji profeta iempetitoa imjeko jliaji pantinoma njite jliekoa cjaidao. ¹¹ Njite Jehú imoto naicjaolre njaji lrikitsiñape, pada nanakjoite iako lrirso: ''¿Matsiatsa pjiomi? ¿Kocadao lrioma piinai jliaji atsia ipicacadao?'' Njite Jehú jiepani: ''Pianjintsa koanca caacoca njaji profetanai iempetipe toa.'' ¹² Njite naako lrirso: ''Piiwatsa jliajrra. Picaitena femi.'' Niini Jehú iako narso: ''Ajádalri, lricaitjen norso padape iakoti, lricaite tsacja norso cayoji, ''Cayo wa-Minalri icaiteca: Nocadaaca pjia, pjiá carro Irael italricanaa.'' ¹³ Niini nacoamitsa njaji lrikitsiñape natojloeta natsayani nacadaa-carro Jehú ipjoacarro nanako. Ikena napjiaca trompeta njite naako, ''Talricanaatica Jehú.'' ¹⁴ Icapiena cayoji Jehú, Josafat irri, Nimsi irri, yemaca Joram ikjoete. Jliawajli pia, Joram lrinoaca piaca njite lriinai tsacja njaji iraelitanai Hazael ikjoete, Aram italricanaa Ramot lriko Galaad lrikoda. ¹⁵ Mitsa jliaji talricanaati Joram lridiá piacawa Jezreel lrikojle lriawacá carro nirse lriyaoni ioya, ima njaji arameonai nainocani pajlaimini lriinoaca cádanko Hazael icjoete, Aram italricanaa. Jehú iako narso njaji Joram irsoiperri: ''Cayo cadaa iwaopiakje nokjoete, macadaa pedatsa pada inaiki imotocawa yacaalre ioya, wadee napitocawa naacarrontja nacaite jliaji iakoti Joram irso Jezreel lrikojle.'' ¹⁶ Ikena Jahú jinico iemawa lricarretan nakó caballo itsoetanda lria-carroa Jezreel lrikojle; lriwafetampe cadana toa jliaji Joram. Njite nirse cadaana tsacja lriicjaolre Ocozía, Judá italricanaa iáa cada icapa lriderse. ¹⁷ Njite pada iwapacada icapa naicao yeenondalri nakjoite Jezreel lriko, lricapa nanoca naicjaolre Jehú lrinaikite iapiya njecocayawa nacaballon nako; niini lriako: ''Nocapaca paana inaiki aimadan inoca.'' Niini Joram iako lrirso: ''Pimeenaca pada caballo nakó lriá carro lrikoadatana teeko toa; njite pinaa lricaiteca narso cayoji: ''¿Matsia lrikotsa inoca?'' ¹⁸ Niini lriacawa jliaji atsia namenacanda iacawa naicjaolre, njite lriako narso: ''Talricanaati inaa notatjaca jia: ¿Capja matsia lriko catsa ínoca?'' Njite Jehú jiepani: Kotsa koadaca pirso matsia lriko cadaa nonoca.'' Pinoena wainai.'' Njite jliaji icapacada naicawa yenondalri nakjoite iako talricanaati irso: ''Jliaji iáa cada icapa njaji inolri, lriokjeni naicjaolre mitsa korrinatsa lridiawa.'' ¹⁹ Njité lrimeenaca tsenacja yamada shopena atsia caballo nako, lriá carro naicjaolre lrikoadatá carrona, lriako narso: ''Talricanaati inaa notatjaca jia: ¿Capja matsia lriko catsa ínoca?'' Njite Jehú jiepani: Kotsa koadaca pirso matsia lriko cadaa nonoca. Picaboko pinó carro wainai.'' ²⁰ Njite jliaji icapacada naicawa yenondalri nakjoite iako talricanaati irso tsenacja: ''Jliaji iáa cada icapa njaji inolri, lriokjeni naicjaolre mitsa korrinatsa lridiacawa. Mitsa cayoji pacapa lrirso Jehú, Nimsi irri jiekoeta capisho lricaballon. Majicaca ljliecoitaca lricaballon.'' ²¹ Niini Joram inaa namatsietaca lrirso lri caballon cacarretan dalri jliwaaca-carro iáa icapa, njite lriinai Ocozía, Judá italricanaa, naawa pakoacatsa nakoanaa nacaballon nako naacarro Jehú ikjoete. Njite naoketaacacao Nabot, Jezreel dalri pia ikiníkerre lriko. ²² Joram icapa cádanko Jehú cani, lriako lrirso: ''¿Capja matsiacalri rikocatsa pinoca, Jehú?'' Njite Jehú jiepani: ''Korri koaji pamawadacaca korri cadaa yaami idolopeca rsoaji pjidoa njite ronaa tsacja njaji inaiki nanaitjá carro iwiilreti rikó njite malriirri calri riko tsacja.'' ²³ Jliada nakotsa Joram icaboko jiekoa lricaballon nakó njiteo lripitó carro, njite lriako Ocozía irso: ''Opi jliema nokjoete'' ²⁴ Ikena Jehú jitaca jliyawitjioko, jlirra cjaida lriyawitjiapo lriyawitá carro Joram, lriyawitacani lriteda nako; mayacan lricaolre riko, icaamitsa jliwacawa mayamin. ²⁵ Njite Jehú iako Bidcar irso, capitama lrirsodalri: ''Pideeni pipeekó carroni Nabot, Jezreel dalri pia ikiníkerrem lriko. Piwaada koan piaca wanjica fekoji pjinirri Acab jiapodamjite pjia, pjia njite njoa. Jliaji wa-Minalri icaite lrinako cayoji: ²⁶ Daicaya capishotoa nocapa koanca mayamica Nabot njite lrirri tsacja, lriako jliaji wa-Minalri, Niini cayó tsacjaotsa nocadaa nainoca nakoadao lri-rikodatsa jliaji jiipai, lriako jliaji wa-Minalri. Niini panaya, warsa pidee pipeekoni lri-rikodatsa jiipaica, cayotsa wa-Minalri icaite capisho.'' ²⁷ Njite Ocozia, Judá italricanaa icapa cádanko koanca, ikeena lripitocawa lri-rikoda jliaji inipo iacadawa Bet Hagan icjaolre. Mitsa Jehú ipinetani, njite lrinaa njaji lrirsoperri nainó carroni jlieko carrona nakotsa. Niini nainoca pajlaimi lriorroko cayawa yacaalre Gur icjaolre, jliaji yacaalre Ibleam ikodapídalri. Ocozía ipitowa Meguido lrikojle, mitsa mayaica nirseni. ²⁸ Njaji lrirsoperri nadeeni jlieko carrona lrikotsa Jerosalén lrikojle nadawa-carroni lriarroapji rikó nakodapitsa njaji jlinirrinaipemi, David iyacalre roko. ²⁹ Njite once walria nako oonia, talricanaati cayami Joram, Acab irri, Ocozía iniitapia italricanaataca nanako njaji Judánai. ³⁰ Jehú ioca cádanakoa Jezreel lrikojle, Jezabel jimi koanca njeyapacao, niini rodaataca matsia nja rotji, ropiá matsia rotsikolre njite rocapa roventana nacjoite. ³¹ Jehú jiewa cádanakoa pantinoma lriko, Jezabel iako lrirso: ''¿Capja matsiacalri rikocatsa pinoca, ima cayoca pjia Zimri sho, iinocada lri-talricanaa?'' ³² Niini Jehú jirreta icapa vetana icjaolre, lriako: ¿Cjaitenai njaji noinaiperri ¿Cjaitenai?'' Njite yamada o madalrida eunoconai icapa pemajlerse. ³³ Niini Jehú iako narso: ''Ipekono ajaiterra.'' Ikena njepa napekono njitetsa, niini roirrana iwitsica panti iwai nako, njite njaji Jehú jieko carrona nako caballo lricadaa napjoá carrono. ³⁴ Njite Jehú jiewawa talricanaati dapana lriko, lrinja niini, lrirrá tsacja. Litaita cayami, lriako lrirsoperri irso: ''Iáa icapa rsoaji inarro macadawarrotsa idawa-carrono, ima pada talricanaati ienipem piacano.'' ³⁵ Niini naacatja nadawano, mitsa corrinatsa koca naoketa rooya icaamitsa rsowidaapimi, rsoipa njite njaji rocaapi. ³⁶ 36Njite nadiá nacaite Jehú irso lrinako. Niini lriako: ''Cayo pia Dio icaiteca lrirsodalri Elía, tisbita dalri pia inoma lrikjoite: ''Lri-rikoda jliaji jiipai Jezreel dalri, njaji tsiino nainjacaotsa Jezabal iipe, ³⁷ njite matsiketandam shoca Jezabel idadam lri-rikoda jliaji jiipai Jezreel lrikoda, wadentja pada icaitecatoa: ''Icapiatsa Jezabel-ca rsoaji.''